ឯកឧត្តម យិត បុណ្ណា ដឹកនាំកិច្ចប្រជុំពិនិត្យ និងពិភាក្សាលើពង្រាងបទដ្ឋានបច្ចេកទេសតាមផ្នែកនីមួយៗសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់
ភ្នំពេញ៖ នាថ្ងៃពុធ ទី២៣ ខែតុលា ឆ្នាំ២០២៤ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ (Steering Committee) និងក្រុមការងារបច្ចេកទេស (Technical Working Groups) ដើម្បីពិនិត្យ និងពិភាក្សាលើពង្រាងបទដ្ឋានបច្ចេកទេសតាមផ្នែកនីមួយៗ សម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ដែលបានរៀបចំដោយក្រុមការងារបច្ចេកទេស P4I & Austroads នៃប្រទេសអូស្ត្រាលី ដោយមានការចូលរួមពីថ្នាក់ដឹកនាំក្រសួង ក្រុមការងារមន្ត្រីជំនាញរបស់ក្រសួង និងក្រុមការងារបច្ចេកទេស P4I & Austroads នៃប្រទេសអូស្ត្រាលី ជាច្រើនរូបផងដែរ។
កិច្ចប្រជុំនេះប្រព្រឹត្តទៅរយៈពេលបីថ្ងៃ ចាប់ពីថ្ងៃពុធ ទី២៣ ដល់ថ្ងៃសុក្រ ទី២៥ ខែតុលា ឆ្នាំ២០២៤ ក្នុងគោលបំណងដើម្បី ពិភាក្សាលម្អិតលើផ្នែកបច្ចេកទេសនីមួយៗ ដោយមានការកែសម្រួល និងបំពេញបន្ថែមនូវតម្រូវការចាំបាច់មួយចំនួន ពិនិត្យលើវឌ្ឍនភាពការងារដែលសម្រេចបានក្នុងជំហានទី១ និងពិនិត្យលើបទដ្ឋានបច្ចេកទេសចាំបាច់មួយចំនួនថែមទៀតដែលនឹងត្រូវបន្តអនុវត្តក្នុងជំហានទី២ ដើម្បីធ្វើឱ្យប្រសើរឡើងនូវស្ដង់ដារបច្ចេកទេស និងសមស្របតាមស្ថានភាពបច្ចុប្បន្នសម្រាប់ប្រើប្រាស់ក្នុងព្រះរាជាណាចក្រកម្ពុជា។
ជាមួយគ្នានោះផងដែរ ឯកឧត្តមរដ្ឋលេខាធិការ បានថ្លែងអំណរគុណដល់ការខិតខំប្រឹងប្រែងរបស់ក្រុមការងារ និងមន្រ្តីបច្ចេកទេសទាំងអស់ ដែលបានសហការយ៉ាងជិតស្និទ្ធជាមួយក្រុមការងារបច្ចេកទេស P4I & Austroads នៃប្រទេសអូស្រ្ដាលី សំដៅសម្រេចបាននូវការរៀបចំបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ឱ្យបានជោគជ័យ និងប្រកបដោយគុណភាព ៕