ប្រមុខរាជរដ្ឋាភិបាល បន្តអំពាវនាវដល់ប្រជាពលរដ្ឋខ្មែរគ្រប់រូបទាំងអស់ ត្រូវថែរក្សាសុខសន្តិភាព ដែលកំពុងមានសព្វថ្ងៃ

ភ្នំពេញ៖ មានប្រសាសន៍ចេញពីខេត្តមណ្ឌលគិរី ក្នុងឱកាសអញ្ជើញជាអធិបតីភាពពិធីសម្ពោធដាក់ឱ្យប្រើប្រាស់ជាផ្លូវការទំនប់អូរតេធិបតី នាព្រឹកថ្ងៃទី២៤ ខែតុលានេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បន្តអំពាវនាវយ៉ាងទទួចដល់បងប្អូនប្រជាពលរដ្ឋខ្មែរគ្រប់រូបទាំងអស់ត្រូវការពារ និងថែរក្សាឲ្យខាងតែបាននូវសុខសន្តិភាព ដែលកំពុងមាននាពេលសព្វថ្ងៃនេះ។

សម្តេចធិបតី បានលើកឡើងថា ត្រូវថែរក្សាឲ្យខាងតែបាននូវសុខសន្តិភាព ហើយកុំដោយសារតែការញុះញង់ និងអុចអាលពីក្រុមប្រឆាំងក្រៅប្រទេស ធ្វើឲ្យមានការបែកបាក់គ្នា និងបាត់បង់នូវសុខសន្តិភាពនេះ។

សម្តេចធិបតី បានបន្តថា សន្តិភាពដែលបានកំពុងកើតមានឡើងនាពេលបច្ចុបន្ននេះគឺបានពីការតស៊ូររកបានដោយយ៉ាងលំបាករបស់វីរជនខ្មែរនិងគោលនយោបាយ ឈ្នះ ឈ្នះរបស់សម្តេចតេជោ ហ៊ុន សែន អតីតនាយករដ្ឋមន្រ្តី ដូច្នេះយើងត្រូវរួមគ្នាការពារ និងថែរក្សា ដោយកុំធ្វើឲ្យមានការបែកបាក់គ្នាឈ្លោះគ្នា ដោយសារតែញុះញង់ពីពួកអគតិ និងក្រុមច្រណែនឈ្នានីសមួយក្តាប់តូចពីខាងក្រៅនោះ។

សម្តេចធិបតីបន្ថែមទៀតថា ដើមនៃសន្តិភាពនឹងបន្តបែងមេឃសាខា ផ្តល់ផលប្រយោជន៍ដល់ប្រទេសជាតិ និងប្រជាជនកាន់តែល្អប្រសើរបន្ថែមទៀតជារៀងរហូត ហើយពាក្យថា«សន្តិភាព»នេះគឺត្រូវទន្ទេញ និងត្រូវចង់ចាំជានិច្ចចំពោះបងប្អូនគ្រប់រូប៕