ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” មានរយៈពេលខ្លី ប៉ុន្តែអាចដំណើរការទៅដោយរលូន និងជោគជ័យត្រចះត្រចង់
ភ្នំពេញ៖ ការរៀបចំព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” លើកទី១ ត្បិតតែការរៀបចំមានពេលវេលាខ្លីបន្តិច ប៉ុន្តែអាចដំណើរការទៅបានដោយរលូន និងជោគជ័យត្រចះត្រចង់ ព្រមទាំងមានការដាក់ពាក្យចូលរួមប្រកួតពីសំណាក់កីឡាករ កីឡាការិនីយុទ្ធគុនខ្មែរមានចំនួនច្រើនលើសពីការរំពឹងទុក ។
នេះបើយោងតាមរបាយការណ៍វាយតម្លៃ បង្ហាញដោយគណៈកម្មការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់សម្ដេចធិបតី” (គ.ច.យ.ខ.ព) ក្នុងកិច្ចប្រជុំបូកសរុបកលទ្ធផលការងារ និងការវាយតម្លៃចុងក្រោយ កាលពីរសៀលថ្ងៃទី២៣ ខែតុលា ឆ្នាំ២០២៤ ក្រោមវត្តមានដ៏ខ្ពង់ខ្ពស់ឯកឧត្តមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មការចំពោះកិច្ច។
គណៈកម្មការចំពោះកិច្ចរៀបចំការប្រកួតខាងលើនេះ បានបង្ហាញថា ការរៀបចំ មានពេលវេលាខ្លីបន្តិច ប៉ុន្តែអាចដំណើរការទៅបានដោយរលូន ហើយមិននឹកស្មានថា ការចូលរួម ប្រកួតពីសំណាក់កីឡាករ កីឡាការិនី មានចំនួនច្រើនហួសពីការរំពឹងទុក ដែលបានបង្ហាញពីការចូលរួម គាំទ្រយ៉ាងផុលផុសដល់ការប្រកួតកីឡា យុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី”។
របាយការណ៍បានបង្ហាញផងដែរថា ព្រឹត្តិការណ៍ប្រកួតនេះមានរៀបចំតុបតែងយ៉ាងពិសេស (Unique) ទៅលើទីលានប្រកួត មានលក្ខណៈប្លែកភ្នែក និងទាក់ទាញ ជាមួយការ រៀបចំទីអាសនៈប្រណិត មានអ្នកអត្ថាធិប្បាយជំនាញ អ្នកពោលពិសេស រួមទាំងសាច់ភ្លេង និងពណ៌មង្ឃុតជូនតា យុទ្ធគុន បានធ្វើឱ្យអ្នកទស្សនាមានការជក់ចិត្តដិតអារម្មណ៍។
ជាងនេះទៅទៀត សម្រាប់កម្រិតបច្ចេកទេសកីឡាប្រយុទ្ធ និងសម្តែងមួយចំនួនធំ មានគុណផលកីឡា (Performance) កម្រិតមធ្យម និងខ្ពស់ ធ្វើឱ្យការប្រកួតមានភាពទាក់ទាញ។ ហើយការសម្តែងក្នុងពិធីបិទការប្រកួតបានបញ្ចូលសាច់រឿង និងឈុតឆាកសម្តែងទម្រង់វប្បធម៌ និងយុទ្ធគុនខ្មែរ បុរាណយ៉ាងប្រទាក់ក្រឡា និងស៊ីសង្វាក់គ្នាល្អ។
ចំពោះការផ្សព្វផ្សាយវិញ បានបញ្ជ្រាបការយល់ដឹង និងអប់រំអំពីយុទ្ធគុនព្រលឹងដូនតា បានទូលំទូលាយ និងគ្របដណ្តប់ទូទាំងប្រទេស និងនៅលើឆាកអន្តរជាតិ ពិសេសខ្មែរនៅក្រៅប្រទេសក៏បានជ្រួតជ្រាប និងគាំទ្រផងដែរ។
សូមបញ្ជាក់ថា រយៈពេល ៣ថ្ងៃ នៃការប្រព្រឹត្តិទៅរបស់ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” លើកទី១ មានអ្នកចូលរួមទស្សនាផ្ទាល់នៅវិមានពហុកីឡដ្ឋានជាតិអូឡាំពិក និងតាមរយៈការផ្សាយអនឡាញ មានចំនួនជិត ៥លាននាក់៕