ឯកឧត្តម ហេង ណន បើកសិក្ខាសាលាផ្សព្វផ្សាយ និងជំរុញការអនុវត្តផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣
ភ្នំពេញ៖ នាថ្ងៃសុក្រ ទី២៥ ខែតុលា ឆ្នាំ២០២៤ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាស្តីពី ការផ្សព្វផ្សាយ និងជំរុញការអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដោយមានការអញ្ជើញចូលរួមពី តំណាងស្ថានទូត តំណាងគណៈអភិបាលខេត្ត ដៃគូអភិវឌ្ឍន៍ សមាគម ក្រុមហ៊ុន វិស័យឯកជន និងមន្ត្រីជំនាញពាក់ព័ន្ធជាច្រើនរូបផងដែរ។
សិក្ខាសាលានេះ ត្រូវបានរៀបចំឡើងក្នុងគោលបំណង (១) ផ្សព្វផ្សាយផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដល់ស្ថានទូត និងដៃគូអភិវឌ្ឍន៍ជាតិ និងអន្តរជាតិ, (២) ជំរុញការអនុវត្តផែនការមេឱ្យកាន់តែមានប្រសិទ្ធភាព និងប្រសិទ្ធផលខ្ពស់, (៣) ដើម្បីទាក់ទាញការវិនិយោគទៅលើគម្រោងដែលមានក្នុងផែនការមេសំដៅជំរុញការអភិវឌ្ឍន៍សេដ្ឋកិច្ចជាតិ។
សូមជម្រាបជូនថាផែនការមេនេះ ត្រូវបានអនុម័តដោយរាជរដ្ឋាភិបាលកាលពីថ្ងៃទី២ ខែសីហា ឆ្នាំ២០២៣ ក្នុងការដាក់ឱ្យប្រើប្រាស់ជាផ្លូវការក្នុងគោលបំណងជំរុញការអភិវឌ្ឍហេដ្ឋារចនាសម្ព័ន្ធ ការតភ្ជាប់ការដឹកជញ្ជូន និងឡូជីស្ទីកនៅកម្ពុជា៕
