អភិបាលខេត្តតាកែវ ដឹកនាំកិច្ចប្រជុំត្រួតពិនិត្យការងាររបស់អនុគណៈកម្មការ និងអនុគណៈកម្មការនានាសម្រាប់រៀបចំការប្រណាំងទូក បណ្តែតប្រទីប និងសំពះព្រះខែ អកអំបុកឆ្នាំ២០២៤ នៅបឹងតាកែវ

ភ្នំពេញ៖ នារសៀលថ្ងៃចន្ទ ទី២៨ ខែតុលា ឆ្នាំ២០២៤ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញដឹកនាំកិច្ចប្រជុំត្រួតពិនិត្យការងាររបស់គណៈកម្មការ និងអនុគណៈកម្មការនានា សម្រាប់រៀបចំការប្រណាំងទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៤ ដែលនឹងប្រារព្ធធ្វើឡើងនៅថ្ងៃទី១ ដល់ថ្ងៃទី២ ខែវិច្ឆិកា ឆ្នាំ២០២៤ ឆាប់ៗខាងមុខនេះ នៅបឹងតាកែវ ក្រុងដូនកែវ ខេត្តតាកែវ ដោយមានទូកចំនួន ៣៩ទូក ចូលរួមប្រកួត ក្នុងនោះទូកកិត្តិយស ២ទូក ទូកតាមបណ្តាស្រុកក្រុងចំនួន ២០ទូក និងទូកតាមមន្ទីរអង្គភាពជុំវិញខេត្ត ១៧ទូក។

ឯកឧត្តម វ៉ី សំណាង អភិបាលខេត្ត បានមានប្រសាសន៍ថា ក្រុមកីឡាករ ដែលនឹងមកចូលរួមប្រកួត សូមជំនាញពាក់ព័ន្ធ ពិសេសអាជ្ញាធរក្រុងដូនកែវ និងមន្ទីរសុខាភិបាលខេត្ត ត្រូវយកចិត្តទុកដាក់ ឱ្យបានខ្ពស់បំផុតចំពោះការស្នាក់នៅ និងការហូបចុករបស់ពួកគាត់ឱ្យបានល្អត្រឹមត្រូវ ពិសេសគឺពិនិត្យមើលផងដែរចំពោះការទទួលទានស្រាសឬស្រាថ្នាំ ដែលអាចនឹងធ្វើឱ្យពួកគាត់ប៉ះពាល់ដល់សុខភាព ឬក៏ពុលស្រាហើយអាចនឹងខកខានការប្រកួត ដូច្នោះសូមត្រួតពិនិត្យបញ្ហានេះឱ្យបានប្រុងប្រយ័ត្ន និងយកចិត្តទុកដាក់ជាទីបំផុត ។

ឯកឧត្តម វ៉ី សំណាង បន្តទៀតថា ដោយឡែកសម្រាប់ការលក់ដូររបស់បងប្អូនអាជីវករនៅក្នុងពិធីបុណ្យប្រណាំងទូកនេះដែរ សូមអាជ្ញាធរក្រុងដូនកែវ ជួយអប់រំ និងណែនាំទៅដល់ពួកគាត់ សូមលក់ម្ហូបអាហារឬលក់ផលិតផលអ្វី កុំតម្លើងថ្លៃឱ្យសោះ លក់តម្លៃដូចធម្មតា ពិសេសគឺម្ចាស់ផ្ទះសំណាក់ និងសណ្ធាគារ ក៏មិនត្រូវឡើងថ្លៃផងដែរ ហើយម្យ៉ាងទៀត សម្រាប់ការផ្ញើកង់ឬម៉ូតូ ក៏ដូចគ្នា គឺផ្ញើកង់ឬម៉ូតូ១ក្នុងតម្លៃតែ១ពាន់រៀលបានហើយ ដើម្បីធ្វើយ៉ាងណាកុំឱ្យបងប្អូនប្រជាពលរដ្ឋទាំងក្នុងខេត្ត និងក្រៅខេត្ត ដែលពួកគាត់អញ្ជើញមកចូលរួមទស្សនាក្នុងពិធីនេះ មានការិះគន់ឬរអ៊ូរគ្រប់គ្នាថា អាជ្ញាធរខេត្តមិនបានគិតគូរៀបចំឡើងបញ្ហាទាំងអស់នេះ ។

ជាមួយគ្នានេះដែរ ឯកឧត្តមអភិបាលខត្តតាកែវ ក៏បានណែនាំបន្ថែមទៀតទៅដល់ អនុគណៈកម្មការនានានានាសម្រាប់រៀបចំការប្រណាំងទូកបណ្តែងប្រទីប និងសំពះព្រះខែ អកអំបុកឆ្នាំ២០២៤ ទាំងអស់ សូមខិតខំប្រឹងប្រែង និងយកចិត្តទុកដាក់បំពេញតួនាទីភារកិច្ចចំពោះមុខឱ្យបានល្អ ពិសេសធ្វើយ៉ាងណាឱ្យដំណើរការនៃការប្រណាំងទូកនាឆ្នាំនេះ ប្រព្រឹត្តទៅដោយរលូន ក្នុងបរិយាកាលសប្បាយរីករាយ និងធានាបាននូវសុខសុវត្ថិភាព៕