កងការពារព្រំដែនគោកលេខ៤០៣ បិទវគ្គហ្វឹកហ្វឺនពង្រឹងកងល្បាត ត្រៀមការពារទីតាំងរឹងមាំ

ភ្នំពេញ៖ នៅថ្ងៃទី៣០ ខែតុលា ឆ្នាំ២០២៤ លោកវរសេនីយ៍ឯក ជឹម សំអោ មេបញ្ជាការកងការពារព្រំដែនគោកលេខ៤០៣ អញ្ជើញជាវត្តមានក្នុងពិធីបិទវគ្គហ្វឹកហ្វឺនពង្រឹងកងល្បាតត្រៀមការពារទីតាំង ដែលប្រារព្ធធ្វើឡើងនៅទីបញ្ជាការ កងការពារព្រំដែនគោកលេខ៤០៣ ។ វគ្គហ្វឹកហ្វឺននេះ មានកម្មសិក្សាការីសរុបចំនួន ៨០នាក់។

ក្នុងរបាយការណ៍ស្តីពីលទ្ធផលបញ្ចប់វគ្គហ្វឹកហ្វឺនបានឱ្យដឹងថា៖ វគ្គហ្វឹកហ្វឺនពង្រឹងកងល្បាតត្រៀមការពារទីតាំងរឹងមាំ មានសិក្ខាកាមមកពីគ្រប់កងឯកភាពចំណុះចំនួន៨០នាក់ មានរយៈពេល៩១ថ្ងៃ ដែលដំណើរការហ្វឹកហ្វឺនចាប់ពីថ្ងៃទី៣១ ខែកក្កដា ឆ្នាំ២០២៤ ដល់ថ្ងៃទី៣០ ខែតុលា ឆ្នាំ២០២៤ ។ លើមុខវិជ្ជារួមមាន៖ លំហាត់របៀប ឋានលេខា បច្ចេកទេសអាវុធថ្មើរជើង យុទ្ធវិធីថ្មើរជើង អប់រំនយោបាយចិត្តសាស្ត្រ ដែលកំពុងប្រើប្រាស់ក្នុងកងយោធពលខេមរភូមិន្ទ។

ក្នុងនាមឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក មេបញ្ជាការ យោធភូមិភាគទី៤ លោកវរសេនីយ៍ឯក ជឹម សំអោ បានថ្លែងកោតសរសើរចំពោះយោធាចារ្យ គណៈកម្មការដឹកនាំគ្រប់គ្រងវគ្គហ្វឹកហ្វឺនទាំងមូល និងសិក្ខាកាមទាំងអស់ដែលបានយកចិត្តទុកដាក់ក្នុងការដឹកនាំដំណើរការហ្វឹកហ្វឺន និងហ្វឹកហ្វឺនចាប់តាំងពីថ្ងៃបើកវគ្គរហូតបញ្ចប់ទទទួលបានលទ្ធផលល្អ។

លោកវរសេនីយ៍ឯក ជឹម សំអោ បានធ្វើការផ្តាំផ្ញើដល់សិក្ខាកាម ពេលវិលត្រឡប់ទៅកាន់កងឯកភាពវិញ ត្រូវមានការសាមគ្គីឯកភាពផ្ទៃក្នុងបានល្អ រក្សាឱ្យបានម៉ឺងម៉ាត់នូវវិន័យសណ្តាប់ធ្នាប់ដែលជាកញ្ចក់ឆ្លុះបញ្ជាំងពីឆន្ទៈ មនសិការ ដើម្បីសម្រេចភារកិច្ចដ៏ឧត្តុង្គឧត្តមជូនជាតិ និងប្រជាពលរដ្ឋ ចូលរួមទប់ស្កាត់បទល្មើសនានា ត្រៀមកម្លាំងដើម្បីជួយសង្គ្រោះគ្រោះមហន្តរាយជូនប្រជាពលរដ្ឋ ពិសេសត្រូវបន្តកិច្ចសហការជាមួយអាជ្ញាធរដែនដី និងសមត្ថកិច្ចមូលដ្ឋាន ការពារសន្តិសុខសណ្តាប់ធ្នាប់សាធាណៈជូនប្រជាពលរដ្ឋ និងធានាភូមិ ឃុំ មានសុវត្ថិភាព៕