ខ្មាន់កាំភ្លើងភ្ជង់ប្លន់រំដោះអ្នកទោសជនជាតិវៀតណាមនៅមុខពន្ធនាគារខេត្តស្វាយរៀង រត់គេចខ្លួនដោយសុវត្ថិភាព

ភ្នំពេញ៖ យោងតាមការបញ្ជាក់ពីមន្ត្រីអនុរក្សពន្ធនាគារខេត្តស្វាយរៀងម្នាក់ បានឱ្យដឹងថា ឧក្រិដ្ឋជនជនជាតិវៀតណាម ត្រូវបានបក្ខពួកធ្វើសកម្មភាពប្រើអាវុធខ្លីភ្ជង់ទៅលើសមត្ថកិច្ចរំដោះចេញពីពន្ធនាគារ កាលពីវេលាម៉ោង០៤:២៥នាទីរសៀល ថ្ងៃទី២៨ ខែតុលា ឆ្នាំ២០២៤ នៅខាងមុខពន្ធនាគារខេត្តស្វាយរៀង ស្ថិតនៅភូមិស្រះវង់ សង្កាត់ស្វាយរៀង ក្រុងស្វាយរៀង។

មន្ត្រីអនុរក្សពន្ធនាគារខេត្តស្វាយរៀងដដែលបន្តថា មុនដំបូងមានបុរសជនជាតិវៀតណាមម្នាក់ បានមកសុំមន្ត្រីនគរបាលយាមពន្ធនាគារ សួរសុខទុក្ខឧក្រិដ្ឋជនដែលជាអ្នកទោសមិនទាន់កាត់ក្ដី ដែលមន្ត្រីយាមពន្ធនាគារនាំពីក្នុងពន្ធនាគារ ទៅកាន់ទ្វារខាងមុខពន្ធនាគារ លុះឧក្រិដ្ឋជនដើរដល់មាត់ទ្វារភ្លាម ស្រាប់តែជនសង្ស័យម្នាក់ដែលសុំជួបឧក្រិដ្ឋជន បានដកអាវុធខ្លីភ្ជង់មន្ត្រីពន្ធនាគារ ភ្លាមៗឧក្រិដ្ឋជនបានកញ្ឆក់យកអាវុធពីដៃជនមករំដោះ កេះកៃកាំភ្លើងបាញ់តម្រង់ទៅលើមន្ត្រីពន្ធនាគារតែអត់ផ្ទុះ ខណៈជនសង្ស័យ និងឧក្រិដ្ឋជនទាំងពីរនាក់ បានឡើងជិះម៉ូតូចេញទៅ ត្រូវបានមន្ត្រីពន្ធនាគារម្នាក់ថ្នាក់វរសេនីយ៍ បានរត់ដេញតាមម៉ូតូជនសង្ស័យទាន់ ហើយមានមន្ត្រីនគរបាលម្នាក់ស្រែកថា វាមានកាំភ្លើងប្រយ័ត្ន! ខណៈនោះមន្ត្រីនគរបាលដែលដេញតាមក៏ឱនក្រាបទៅលើដី ជាឱកាសសម្រាប់ជនសង្ស័យ និងឧក្រិដ្ឋជន ជិះម៉ូតូឌុបគ្នារត់គេចខ្លួនបាត់ដោយសុវត្ថិភាព។

ក្រោយកើតហេតុកម្លាំងសមត្ថកិច្ចការិយាល័យព្រហ្មទណ្ឌ នៃស្នងការដ្ឋាននគរបាលខេត្តស្វាយរៀង សហការជាមួយកម្លាំងងនគរបាល នៃអធិការដ្ឋាននគរបាលក្រុងស្វាយរៀង និងនគរបាលពន្ធនាគារខេត្ត ចុះស្រាវជ្រាវរកបក្ខពួកជនសង្ស័យ ព្រមទាំងបានកំណត់ទីតាំងមុខសញ្ញាស្នាក់នៅ ធ្វើការឡោមព័ទ្ធផ្ទះសំណាក់ចំនួន២ ពោលគឺផ្ទះសំណាក់ចម្រើនសុវណ្ណវត្តីមានលាភ នឹងផ្ទះសំណាក់ សុខហេង ប៉ុន្ដែក្រុមជនសង្ស័យហាក់ដឹងខ្លួនមុន បានរត់គេចខ្លួនបាត់ស្រមោល៕