រដ្ឋបាលខេត្តព្រះសីហនុ និងក្រសួងសេដ្ឋកិច្ច សហការរៀបចំ «វេទិកាទាក់ទាញវិនិយោគមកខេត្តព្រះសីហនុ» នៅទីក្រុងស្យាមិន (Xiamen) ប្រទេសចិន

ភ្នំពេញ៖ នៅថ្ងៃទី៣០ ខែតុលា ឆ្នាំ២០២៤ លោក ឡុង ឌីម៉ង់ អភិបាលរងខេត្តព្រះសីហនុ និងជាសមាជិកក្រុមការងារជំរុញការវិនិយោគក្នុងខេត្តព្រះសីហនុ បានអញ្ជើញចូលរួមជាវាគ្មិនក្នុង «វេទិកាទាក់ទាញវិនិយោគមកខេត្តព្រះសីហនុ» ដែលមានវិនិយោគិនបរទេសចូលរួមប្រមាណ ១០៥រូប មកពីវិស័យផ្សេងៗគ្នាដូចជា៖ទេសចរណ៍, ហិរញ្ញវត្ថុ, សំណង់និងអចលនទ្រព្យ, ភស្តុភារកម្ម, កសិ-ឧស្សាហកម្ម និង កម្មន្តសាលនិងផលិតកម្មជាដើម។

វេទិកានេះត្រូវបានរៀបចំឡើងក្នុងគោលបំណងដើម្បីជម្រាបជូនវិនិយោគិននូវស្ថានភាពបច្ចុប្បន្ន និងបរិយាកាសវិនិយោគរបស់ខេត្ត ព្រមទាំងបើកបង្ហាញនូវលក្ខណៈពិសេសសំខាន់ៗរបស់ខេត្តព្រះសីហនុដូចជា៖ គុណប្រយោជន៍យុទ្ធសាស្ត្រក្នុងតំបន់, ហេដ្ឋារចនាសម្ព័ន្ធសំបូរបែបនិងរស់រវើក, ភូមិសាស្ត្រ, គោលនយោបាយ និងយន្តការគាំទ្រពិសេស និងគោលការណ៍លើកទឹកចិត្តពិសេសនានារបស់រាជរដ្ឋាភិបាលកម្ពុជា ក្រោមកម្មវិធីពិសេសជំរុញការវិនិយោគក្នុងខេត្តព្រះសីហនុ។

ជាលទ្ធផល បណ្តាអ្នកវិនិយោគិនដែលមានសក្តានុពលជាច្រើនបានបង្ហាញការចាប់អារម្មណ៍ពិសេសលើការបណ្តាក់ទុនវិនិយោគនៅខេត្តព្រះសីហនុ លើវិស័យកម្មន្តសាលនិងផលិតកម្ម និងទេសចរណ៍ទំនើប ៕