ឯកឧត្តមបណ្ឌិត ជិន ម៉ាលីន ទទួលជួបពិភាក្សាការងារ និងចុះហត្ថលេខាលើអនុស្សរណៈនៃការយោគយល់គ្នារវាងក្រសួងយុត្តិធម៌ និងមូលនិធិខុនរ៉ាដអាឌិនណៅអ៊ែរអាឡឺម៉ង់ប្រចាំកម្ពុជា
ភ្នំពេញ៖ នារសៀលថ្ងៃព្រហស្បតិ៍ ១៤រោច ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣១ ខែតុលា ឆ្នាំ២០២៤ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ តំណាងដ៏ខ្ពង់ខ្ពស់របស់ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានទទួលជួបពិភាក្សាការងារ និងចុះហត្ថលេខាលើអនុស្សរណៈនៃការយោគយល់គ្នារវាងក្រសួងយុត្តិធម៌និងមូលនិធិខុនរ៉ាដអាឌិនណៅអ៊ែរអាឡឺម៉ង់ប្រចាំកម្ពុជា (KAS) នៅទីស្តីការក្រសួងយុត្តិធម៌។
អនុស្សរណៈនៃការយោគយល់គ្នានេះមានគោលដៅរួមពាក់ព័ន្ធនឹងការលើកកម្ពស់នីតិរដ្ឋ សិទ្ធិទទួលបានយុត្តិធម៌ ជំនួយផ្នែកច្បាប់ និងការពង្រឹងយន្តការដោះស្រាយវិវាទក្រៅប្រព័ន្ធតុលាការ។ អនុស្សរណៈនៃការយោគយល់គ្នាខាងលើ រួមមានសកម្មភាពសំខាន់ៗមួយចំនួន ដូចជា៖
(១).ការផ្លាស់ប្តូរចំណេះដឹង បទពិសោធន៍ និងជំនាញលើការកែទម្រង់ប្រព័ន្ធយុត្តិធម៌, ការធ្វើទំនើបកម្មរដ្ឋបាលតុលាការ, ជំនួយផ្នែកច្បាប់ និងការដោះស្រាយវិវាទក្រៅប្រព័ន្ធតុលាការ។
(២). ការរៀបចំសិក្ខាសាលាផ្សេងៗលើប្រធានបទពាក់ព័ន្ធនឹងការកែទម្រង់ប្រព័ន្ធយុត្តិធម៌ ជំនួយផ្នែកច្បាប់ និង ការដោះស្រាយវិវាទក្រៅប្រព័ន្ធតុលាការ។
(៣).ការគាំទ្រលើការស្រាវជ្រាវ និងបោះពុម្ភផ្សាយឯកសារច្បាប់ និងយុត្តិធម៌ ពាក់ព័ន្ធនឹងសិទ្ធិទទួលបានយុត្តិធម៌ ជំនួយផ្នែកច្បាប់ និង ការដោះស្រាយវិវាទក្រៅប្រព័ន្ធតុលាការ។
(៤).ការលើកកម្ពស់ការយល់ដឹងជាសាធារណៈអំពីសារៈសំខាន់នៃសិទ្ធិទទួលបានយុត្តិធម៌ ជំនួយផ្នែកច្បាប់ និង ការដោះស្រាយវិវាទក្រៅប្រព័ន្ធតុលាការ តាមរយៈឯកសារព័ត៌មាន ដូចជា ខិតបណ្ណ, កូនសៀវភៅ និង/ឬតាមប្រព័ន្ធអនឡាញ ៕
