ការចាប់ខ្លួនអ្នកកាសែតវៀតណាម ជាចំណុចខ្មៅក្នុងទំនាក់ទំនងអាម៉េរិក-វៀតណាម
វ៉ាស៊ីនតោន៖ ជាងមួយឆ្នាំបន្ទាប់ពីអ្នកកាសែត ឌួង វ៉ាន់ថៃ (Duong Van Thai) ត្រូវបានគេចាប់ខ្លួននៅក្នុងប្រទេសថៃ របបវៀតណាម បានកាត់ទោសគាត់ឱ្យជាប់គុក១២ឆ្នាំពីបទឃោសនាប្រឆាំងនឹងរដ្ឋ។ កាលពីថ្ងៃព្រហស្បតិ៍ទី៣១ ខែតុលា សហរដ្ឋអាម៉េរិកបង្ហាញការព្រួយបារម្ភយ៉ាងខ្លាំងចំពោះការផ្តន្ទាទោសរបស់វៀតណាម និងការកាត់ទោសយ៉ាងធ្ងន់ធ្ងរលើលោក ថៃ។
នៅថ្ងៃទី៣០ ខែតុលា បន្ទាប់ពីការកាត់ក្ដីដោយបិទទ្វារនៅរដ្ឋធានីហាណូយ អ្នកកាសែតស៊ើបអង្កេតវៀតណាម លោក ឌួង វ៉ាន់ថៃ ត្រូវបានកាត់ទោសឱ្យជាប់ពន្ធនាគាររយៈពេល១២ឆ្នាំតាមមាត្រា១១៧ នៃក្រមព្រហ្មទណ្ឌវៀតណាម ក្រោមបទចោទប្រកាន់ឃោសនាប្រឆាំងនឹងរដ្ឋ។ ត្រូវបានគេស្គាល់ចំពោះការស៊ើបអង្កេតរបស់គាត់លើអំពើពុករលួយរបស់រដ្ឋាភិបាល និងការប្រជែងអំណាចនៅក្នុងបក្សកុម្មុយនីស្ដវៀតណាម។
លោក ថៃ ត្រូវបានចាប់ខ្លួនកាលពីថ្ងៃទី១៣ ខែមេសា ឆ្នាំ២០២៣ ពីភាគកណ្តាលនៃប្រទេសថៃ ជាកន្លែងដែលគាត់បានរស់នៅជាជនភៀសខ្លួនតាំងពីឆ្នាំ២០១៩ ។ ក្រោយមក លោកត្រូវបានបញ្ជូនទៅមន្ទីរឃុំឃាំងវៀតណាមនៅក្នុងខែមេសាឆ្នាំ២០២៣។
អ្នកនាំពាក្យក្រសួងការបរទេសសហរដ្ឋអាម៉េរិក បាននិយាយថា៖«យើងព្រួយបារម្ភចំពោះការកាត់ទោសដ៏ឃោរឃៅលើលោក ដួង វ៉ាន់ថៃ ហើយយើងក៏នៅតែមានបញ្ហាយ៉ាងខ្លាំងចំពោះរបាយការណ៍ដែលចោទប្រកាន់ថា ឌួង វ៉ាន់ថៃ ត្រូវបានចាប់ពង្រត់ដោយអាជ្ញាធរវៀតណាមនៅក្នុងប្រទេសថៃ ហើយត្រូវបានបញ្ជូនត្រឡប់ទៅប្រទេសវៀតណាមវិញដោយបង្ខំ»។
ទន្ទឹមនឹងនោះ លោក សន គ្រីសភីន (Shawn Crispin) តំណាងជាន់ខ្ពស់របស់គណៈកម្មាធិការការពារអ្នកសារព័ត៌មាន ឬហៅកាត់ថា CPJ ប្រចាំតំបន់អាស៊ីអាគ្នេយ៍ បានហៅការកាត់ទោសលើលោក ថៃ ថាជាការខឹងសម្បារ និងគួរឱ្យតក់ស្លុត។
លោក បាន និយាយ ក្នុង សេចក្ដី ថ្លែងការណ៍ មួយ ថា ៖« លោក ថៃ គួរ ត្រូវ បាន ដោះលែង ជា បន្ទាន់ និង អនុញ្ញាត ឱ្យ ចាកចេញ ពី ប្រទេស វៀតណាម» ។ យោងតាម CPJ លោក ថៃ បានភៀសខ្លួនទៅប្រទេសថៃក្នុងឆ្នាំ២០១៩ ដោយភ័យខ្លាចការធ្វើទុក្ខបុកម្នេញចំពោះវិស័យសារព័ត៌មានរបស់លោក ហើយត្រូវបានផ្តល់ឋានៈជាជនភៀសខ្លួនដោយការិយាល័យរបស់ទីភ្នាក់ងារជនភៀសខ្លួនអង្គការសហប្រជាជាតិនៅបាងកក។ យោងតាមរបាយការណ៍ជាច្រើន លោកកំពុងសម្ភាសសម្រាប់ការតាំងលំនៅថ្មីនៅប្រទេសទីបី នៅពេលត្រូវបានចាប់ខ្លួន និងនិរទេសទៅប្រទេសវៀតណាម។
គួរបញ្ជាក់ថា រដ្ឋធានីវ៉ាស៊ីនតោនបានព្យាយាមបង្កើតទំនាក់ទំនងជិតស្និទ្ធជាមួយប្រទេសវៀតណាម ជាប្រទេសអាស៊ីអាគ្នេយ៍ដែលចែករំលែកការព្រួយបារម្ភអំពីអំណាចកំពុងកើនឡើងរបស់ប្រទេសចិន ប៉ុន្តែការប្រព្រឹត្តចំពោះអ្នកប្រឆាំងរបស់រដ្ឋធានីហាណូយ នៅតែជាចំណុចខ្ទាស់។ វៀតណាមជាប់ចំណាត់ថ្នាក់ទី១៧៤ ក្នុងចំណោមប្រទេស និងដែនដីចំនួន ១៨០ នៅខាងក្រោមសន្ទស្សន៍សេរីភាពសារព័ត៌មានពិភពលោករបស់អង្គការ អ្នកកាសែត គ្មានព្រំដែន ឆ្នាំ២០២៤ ហើយស្ថិតក្នុងចំណោមប្រទេសដែលចាប់អ្នកកាសែតដាក់ពន្ធនាគារដ៏អាក្រក់បំផុតរបស់ពិភពលោក៕
