អគ្គនាយកអន្តោប្រវេសន៍ អញ្ជើញប្រកាសសមាសភាពក្រុមប្រតិបត្តិការត្រួតពិនិត្យជនបរទេស នៅតាមបណ្ដារាជធានី-ខេត្ត

ភ្នំពេញ៖ នារសៀលថ្ងៃសុក្រ ១កើត ខែកត្តិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែវិច្ឆិកា ឆ្នាំ២០២៤ ឯកឧត្តម ឧត្ដមសេនីយ៍ឯក សុខ វាសនា អគ្គនាយកអន្តោប្រវេសន៍ ជាអនុប្រធានអចិន្ត្រៃយ៍គណៈបញ្ជាការដឹកនាំរួម បានបើកពិធីប្រកាសសមាសភាពក្រុមប្រតិបត្តិការត្រួតពិនិត្យជនបរទេស នៅតាមបណ្ដារាជធានី-ខេត្ត នៃព្រះរាជាណាចក្រកម្ពុជា ដែលប្រារព្ធនៅអគ្គនាយកដ្ឋានអន្តោប្រវេសន៍។

ពិធីនេះក៏មានការអញ្ជើញចូលរួមពី ឯកឧត្តម ផុន លីវីរៈ អគ្គនាយករង តំណាង ឯកឧត្តម ឧត្ដមសេនីយ៍ឯក អគ្គនាយក នៃអគ្គនាយកដ្ឋានអត្តសញ្ញាណកម្ម ឯកឧត្តម អគ្គនាយករង លោក-លោកស្រីប្រធាននាយកដ្ឋាន អគ្គនាយកអន្តោប្រវេសន៍ ព្រមទាំងសមាសភាពពាក់ព័ន្ធមួយចំនួន។

ជាកិច្ចចាប់ផ្ដើម ឯកឧត្តម ណុប វី អគ្គនាយករង និងជាប្រធានក្រុមលេខាធិការជួយគណៈបញ្ជាការដឹកនាំរួម ឡើងអានអំណាន លិខិតបង្គាប់ការលេខ ៦០៤ លបក ចុះថ្ងៃទី២៣ ខែតុលា ឆ្នាំ២០២៤ របស់គណៈបញ្ជាការដឹកនាំរួម ស្ដីពីការចាត់តាំងក្រុមប្រតិបត្តិការត្រួតពិនិត្យជនបទេសតាមបណ្ដារាជធានី-ខេត្ត យ៉ាងលំអិតជូនអង្គពិធីជ្រាប។

បន្ទាប់មកឯកឧត្តម ផុន លីវីរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម បានចូលរួមមតិយោបល់ណែនាំជំនាញអំពីការគ្រប់គ្រងស្ថិតិ ការផ្ដល់លិខិតបញ្ជាក់អត្រានុកូលដ្ឋានជូនជនបរទេសអន្តោប្រវេសន្តជូនអង្គប្រជុំ។

បន្ទាប់ពីបានស្ដាប់ស្ដីពីការចាត់តាំងក្រុមប្រតិបត្តិការត្រួតពិនិត្យជនបទេសតាមបណ្ដារាជធានី-ខេត្ត រួចមក ឯកឧត្តម ឧត្ដមសេនីយ៍ឯក សុខ វាសនា អគ្គនាយកអន្តោប្រវេសន៍ និងជាអនុប្រធានអចិន្ត្រៃយ៍គណៈបញ្ជាការដឹកនាំរួម បានមានប្រសាសន៍ថា ជំនួសមុខ ឯកឧត្តម សន្តិបណ្ឌិត គៀត ច័ន្ទថារិទ្ធ រដ្ឋលេខាធិការក្រសួងមហាផ្ទៃ និងជាប្រធានអចិន្ត្រៃយ៍គណៈបញ្ជាការដឹកនាំរួម សូមថ្លែងអំណរគុណដល់ ឯកឧត្តម អគ្គនាយករង នៃអគ្គនាយកដ្ឋានអត្តសញ្ញាណកម្ម ព្រមទាំងលោក-លោកស្រីសមាជិកទាំងអស់ក្នុងអង្គពិធីដែលមានវត្តមានអញ្ជើញចូលរួមក្នុងពិធីប្រកាសសមាសភាពក្រុមប្រតិបត្តិការត្រួតពិនិត្យជនបទេសតាមបណ្ដារាជធានី-ខេត្តនេះ។ បន្ទាប់ពីបានប្រកាសសមាសភាពគណៈបញ្ជាការដឹកនាំដើម្បីអនុវត្តផែនការ ០០៣ របស់ក្រសួងមហាផ្ទៃ ស្ដីពីការចុះត្រួតពិនិត្យវត្តមានរបស់ជនបរទេសដែលស្នាក់អាស្រ័យនៅព្រះរាជាណាចក្រកម្ពុជា កាលពីថ្ងៃទី១៧ ខែកកដ្កា ឆ្នាំ២០២៤ កន្លងទៅនេះ។

ឯកឧត្តម ឧត្ដមសេនីយ៍ឯក បានបន្តទៀតថា យោងទៅតាមការអនុវត្តនេះ អគ្គនាយកដ្ឋានអន្តោប្រវេសន៍ បានចាត់កម្លាំងក្រុមការងារចុះត្រួតពិនិត្យបានមួយចំណែករួចមក។ ឯកឧត្តម ឧត្ដមសេនីយ៍ឯក បានបញ្ជាក់ផងដែរថា គោលបំណងការចុះត្រួតពិនិត្យវត្តមានរបស់ជនបរទេស ដែលស្នាក់អាស្រ័យនៅព្រះរាជាណាចក្រកម្ពុជានេះ គឺដើម្បីពង្រឹងការអនុវត្តច្បាប់ស្ដីពីការងារអន្តោប្រវេសន៍ ច្បាប់ស្ដីពីអត្រានកុលដ្ឋាន។ រៀបចំផែនការកំណត់មធ្យោបាយដើម្បីចុះគាំទ្រដល់ស្នងការរាជធានី-ខេត្ត ក្នុងការអនុវត្តសេចក្ដីណែនាំរបស់ក្រសួងមហាផ្ទៃ ស្ដីពីការគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា ក្នុងការធ្វើបច្ចុប្បន្នភាពអន្តោប្រវេសន្តឱ្យមានប្រសិទ្ធភាព និងដើម្បីចូលរួមពង្រឹងពាក់ព័ន្ធនឹងវិស័យសន្តិសុខសុវត្ថិភាព ការពារសណ្ដាធ្នាប់សាធារណៈ តាមបណ្ដាលរាជធានី-ខេត្ត ដើម្បីធានាបានភាពសុខសុវត្ថិភាពប្រជាពលរដ្ឋ ព្រមទាំងភ្ញៀវទេសចរណ៍ អ្នកវិនិយោគជាតិ អន្តរជាតិ ដែលចូលមកទេសចរណ៍ ឬប្រកបមុខរបបរកស៊ីនៅក្នុងព្រះរាជាណាចក្រកម្ពុជា។ ការអនុវត្តផែនការនេះដែរ គឺដើម្បីសម្រេចគោលបំណងត្រូវមានការចូលរួមពីអគ្គស្នងការនគរបាលជាតិ អគ្គនាយកដ្ឋានអន្តោប្រវេសន៍ អគ្គនាយកដ្ឋានអត្តសញ្ញាណកម្ម ដែលពាក់ព័ន្ធក្រោមចំណុះក្រសួងមហាផ្ទៃ។

ជាកិច្ចបញ្ជប់ ឯកឧត្តម ឧត្ដមសេនីយ៍ឯក សុខ វាសនា បានវាយតម្លៃខ្ពស់ និងកោតសរសើរដល់ថ្នាក់ដឹកនាំអន្តោប្រវេសន៍ ក៏ដូចជាមន្រ្តីនៅតាមបណ្ដារាជធានី-ខេត្ត ដែលបានយកចិត្តទុកដាក់បំពេញការងារ ក្នុងការទទួលខុសត្រូវនាពេលកន្លងមក ជាមួយគ្នានេះដែលសូមថ្លែងអំណរគុណជារួមព្រមទាំងជូនពរដល់ថ្នាក់ក្រុមការងារប្រតិបត្តិការពាក់ព័ន្ធទាំងអស់ទទួលបានជោគជ័យគ្រប់ភារកិច្ច ៕