យ៉ាងហោចណាស់ ជនជាតិប៉ាឡេស្ទីន ៤២នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែល នៅកណ្តាលហ្គាហ្សា
ហ្គាហ្សា៖ ប្រភពវេជ្ជសាស្រ្តប៉ាឡេស្ទីនបានឲ្យដឹងកាលពីថ្ងៃសៅរ៍ថា យ៉ាងហោចណាស់ជនជាតិប៉ាឡេស្ទីន ៤២នាក់បានស្លាប់ និងជាង ១៥០នាក់រងរបួស នៅក្នុងការទម្លាក់គ្រាប់បែកតាមអាកាស និងកាំភ្លើងធំរបស់អ៊ីស្រាអែល ទៅលើជំរុំជនភៀសខ្លួន Nuseirat នៅកណ្តាលហ្គាហ្សាស្ទ្រីប។
ប្រភពសន្តិសុខប៉ាឡេស្ទីនបានបន្តថា កងទ័ពអ៊ីស្រាអែលបាននិងកំពុងទម្លាក់គ្រាប់បែកលើផ្ទះប្រជាជននៅ Nuseirat ទាំងយន្តហោះ និងកាំភ្លើងធំ ចាប់តាំងពីព្រឹកថ្ងៃសុក្រ។
ការិយាល័យប្រព័ន្ធផ្សព្វផ្សាយរដ្ឋាភិបាលហ្គាហ្សាបានថ្កោលទោសការវាយប្រហារដោយពណ៌នាពួកគេថាជា គោលដៅដោយចេតនាលើជនស៊ីវិល រួមទាំងកុមារ និងស្ត្រី ហើយបានអំពាវនាវឱ្យសហគមន៍អន្តរជាតិដាក់សម្ពាធលើអ៊ីស្រាអែលឱ្យបញ្ឈប់សកម្មភាពទាំងនេះប្រឆាំងនឹងជនស៊ីវិលនៅតំបន់ហ្គាហ្សា។
កងកម្លាំងការពារអ៊ីស្រាអែល (IDF) បានបញ្ជាក់នៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ខ្លួនបានធ្វើប្រតិបត្តិការនៅទីក្រុង Rafah និងកណ្តាលហ្គាហ្សា ដើម្បីសម្លាប់ពួកសកម្មប្រយុទ្ធ រុះរើហេដ្ឋារចនាសម្ព័ន្ធសកម្មប្រយុទ្ធ និងស្វែងរកទីតាំងអាវុធ។
អ៊ីស្រាអែលបាននិងកំពុងធ្វើការវាយលុកទ្រង់ទ្រាយធំប្រឆាំងនឹងក្រុមហាម៉ាសនៅតំបន់ហ្គាហ្សាស្ទ្រីប ជាការសងសឹកចំពោះការវាយប្រហាររបស់ក្រុមហាម៉ាស់ឆ្លងកាត់ព្រំដែនភាគខាងត្បូងអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១,២០០នាក់បានស្លាប់ និងប្រហែល ២៥០នាក់ត្រូវបានចាប់ធ្វើជាចំណាប់ខ្មាំង។
ចំនួនអ្នកស្លាប់ជនជាតិប៉ាឡេស្ទីនពីការវាយប្រហាររបស់អ៊ីស្រាអែលដែលកំពុងបន្តនៅតំបន់ហ្គាហ្សាស្ទ្រីប បានកើនឡើងដល់ ៤៣,៣១៤នាក់ នេះបើយោងតាមសេចក្តីថ្លែងការណ៍របស់អាជ្ញាធរសុខាភិបាលដែលមានមូលដ្ឋាននៅហ្គាហ្សាកាលពីថ្ងៃសៅរ៍។
