លោកជំទាវ គឹម សេដ្ឋានី ជួបសម្តែងការគួរសម និងពិភាក្សាការងារជាមួយ ប្រធានក្រុមប្រឹក្សាភិបាល អង្គការហេឡែនខេលល័រអន្តរជាតិ
ភ្នំពេញ៖ នាព្រឹកថ្ងៃទី៤ ខែវិច្ឆិកា ឆ្នាំ២០២៤ នៅទីស្តីការក្រសួង លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្តែងការគួរសម និងពិភាក្សាការងារជាមួយ លោក Bill Toppeta ប្រធានក្រុមប្រឹក្សាភិបាល អង្គការហេឡែនខេលល័រអន្តរជាតិ និងមានការចូលរួមពីប្រតិភូអង្គការហេឡែនខេលល័រអន្តរជាតិ និងមន្ត្រីពាក់ព័ន្ធក្រោមឱវាទ។
ជំនួបនេះរៀបចំឡើងក្នុងគោលបំណង ពិភាក្សា និងបន្តកិច្ចសហប្រតិបត្តិការ ដើម្បីជួយគាំទ្របន្ថែមលើបញ្ហាសុខភាពសិក្សា អាហារូបត្ថម្ភ ស្វែងយល់ឱ្យកាន់តែស៊ីជម្រៅលើការអនុវត្តកម្មវិធីផ្តល់អាហារតាមសាលារៀន និងអាហារដែលមានជីវជាតិល្អនៅកម្រិតបឋមសិក្សា ក៏ដូចជាចែករំលែកបទពិសោធន៍ និងគម្រោងដែលបាន និងកំពុងអនុវត្តនៅក្នុងប្រទេសកម្ពុជា ដែលជាចំណុចសំខាន់មួយ ក្នុងការចូលរួមចំណែកជួយលើកកម្ពស់សុខភាពសិក្សារបស់សិស្ស ដែលជាចក្ខុវិស័យសំខាន់មួយរបស់រាជរដ្ឋាភិបាល។
ក្នុងឱកាសនេះ លោកប្រធានក្រុមប្រឹក្សាភិបាល អង្គការហេឡែនខេលល័រអន្តរជាតិ បានថ្លែងអំណរគុណ និងសម្តែងសេចក្តីរីករាយ ដែលបានចូលជួបពិភាក្សាការងារលើការបន្តជួយគាំទ្រសុខភាពសិក្សា និងអាហារូបត្ថម្ភរបស់សិស្សបន្ថែមទៀត ក៏ដូចជាបានលើកឡើងពីប្រវត្តិនៃអង្គការហេឡែនខេលល័រអន្តរជាតិ និងគម្រោងជាច្រើននៅក្នុងប្រទេសកម្ពុជា ដែលបច្ចុប្បន្ននេះ អង្គការហេឡែនខេលល័រអន្តរជាតិ បាននិងកំពុងសហការយ៉ាងជិតស្និទ្ធជាមួយនាយកដ្ឋានសុខភាពសិក្សានៃក្រសួងអប់រំ យុវជន និងកីឡា លើការអនុវត្តគម្រោងលើកកម្ពស់របបអាហារសុខភាព និងអាហារូបត្ថម្ភតាមគ្រឹះស្ថានសិក្សាដើម្បីការពារជំងឺមិនឆ្លង។
ជាការឆ្លើយតប លោកជំទាវ រដ្ឋលេខាធិការប្រចាំការ បានថ្លែងអំណរគុណ និងវាយតម្លៃខ្ពស់ចំពោះអង្គការហេឡែនខេលល័រអន្តរជាតិ ដែលបាននិងកំពុងជួយគាំទ្រប្រទេសកម្ពុជា ជាពិសេសជាមួយវិស័យអប់រំផ្ទាល់ លើផ្នែកអាហារូបត្ថម្ភ និងសុខភាពសិក្សារបស់សិស្ស ដែលអង្គការហេឡែនខេលល័រ បានធ្វើការជាមួយនាយកដ្ឋានសុខភាពសិក្សានៃក្រសួងអប់រំ យុវជន និងកីឡា ក្នុងការកសាង សាកល្បង និងបញ្ចប់ការអនុវត្តកម្មវិធីសុខភាពសិក្សានៅសាលារៀនស្តីពីដង្កូវព្រូនឆ្លងតាមដី ដើម្បីការពារ និងគ្រប់គ្រងជំងឺនេះក្នុងចំណោមសិស្ស ក៏ដូចជាបានអនុវត្តន៍គម្រោងសាកល្បង “សាលាល្អ អាហារល្អ អនាគត បវររុងរឿង” ដែលបានបញ្ចប់ដោយជោគជ័យ ទាំងអស់នេះ បានជួយគាំទ្រ និងឈានទៅដល់ការលើកកម្ពស់វិស័យអប់រំ ឆ្លើយតបនឹងចក្ខុវិស័យរបស់រាជរដ្ឋាភិបាល ក្នុងការអភិវឌ្ឍធនធានមនុស្ស ស្របតាមយុទ្ធសាស្រ្តបញ្ចកោណ ដំណាក់កាលទី១ ឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និង ២០៥០៕
