ឧត្តមសេនីយ៍ឯក ជួន ណារិន្ទ៖ លោក លី សាម៉េត ត្រូវបានបញ្ចូនខ្លួនពីខេត្តព្រះសីហនុ មកដល់ស្នងការដ្ឋាននគរបាលរាជធានីភ្នំពេញហើយនៅយប់នេះ
ភ្នំពេញ៖ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានី បានបញ្ជាក់ថា លោក លី សាម៉េត ត្រូវបានបញ្ចូនខ្លួនពីស្នងការដ្ឋាននគរបាលខេត្តព្រះសីហនុ មកដល់ស្នងការដ្ឋាននគរបាលរាជធានីភ្នំពេញហើយ នៅវេលាយប់ថ្ងៃទី៤ ខែវិច្ឆិកា ឆ្នាំ២០២៤នេះ។
ឯកឧត្តម ឧត្តមសេនីយ៍ឯក ជួន ណារិន្ទ បានថ្លែងថា ការឃាត់ខ្លួននេះ ធ្វើឡើងតាមដីការបង្គាប់ឱ្យចាប់ខ្លួនរបស់សាលាដំបូងរាជធានីភ្នំពេញ។
សូមរំលឹកថា សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅរសៀលថ្ងៃទី៤ ខែតុលា ឆ្នាំ ២០២៤ បានចេញសារបញ្ជាក់នៅលើបណ្ដាញសង្គម ដោយបានស្នើសមត្ថកិច្ចទៅនាំខ្លួនលោក លី សាម៉េត ដើម្បីបញ្ជូនទៅតុលាការកាត់ទោសតាមច្បាប់។
ការចេញបញ្ជាក់បែបនេះរបស់សម្ដេចតេជោ បន្ទាប់ពី លោក លី សាម៉េត បានចេញវីដេអូសារភាពកំហុស និងសូមទោស។ សម្ដេចតេជោបានសរសេរ បញ្ជាក់ថា មិនមែនដោយសារតែវីដេអូសារភាពកំហុស និងសូមទោសមួយនេះ លោក លី សាម៉េត ត្រូវបានរួចខ្លួននោះឡើយ។ សម្ដេចតេជោមានប្រសាសន៍ថា ជំនួយការសម្ដេចម្នាក់ឈ្មោះ ដួង តារា ត្រូវបានឃាត់ខ្លួនរង់ចាំការកាត់ទោសដោយសារជាប់ពាក់ពន្ធ័ករណីឆបោកជាមួយលោក លី សាម៉េត នេះ។
សម្ដេចតេជោ មានប្រសាសន៍ថា ពេលនេះ លី សាម៉េត ក្រោយពីរត់គេចខ្លួន បានបង្ហាញខ្លួនហើយសូមសមត្ថកិច្ចដែលជានគរបាល ឬកងរាជអាវុធហត្ថទៅនាំខ្លួន លី សាម៉េត បញ្ជូនទៅតុលាការដើម្បីកាត់ទោសតាមច្បាប់។
សម្ដេចតជោ បានបញ្ជាក់ថា លី សាម៉េត បានសុំពេលព្យាបាលខ្លួននៅផ្ទះមុនពេលចូលខ្លួនឱ្យតុលាការកាត់ទោស។ សម្ដេចតេជោបញ្ជាក់ថា មិនអាចធ្វើបែបនេះបានឡើយនគរបាលយុត្តិធម៌ត្រូវតែនាំខ្លួន លី សាម៉េត បញ្ជូនទៅតុលាការតាមនីតិវិធី។ សម្ដេចតេជោ សង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ ៕
