ឧត្តមសេនីយ៍ទោ ម៉ាន់ ម៉ាច នាំយកអំណោយសម្តេចធិបតី និងលោកជំទាវបណ្ឌិត ឧបត្ថម្ភជូនអតីតយុទ្ធជន និងគ្រួសារអតីតយុទ្ធជន មានជីវភាពលំបាកខ្វះខាត នៅស្រុកគងពិសី និងស្រុកបសេដ្ឋ

ភ្នំពេញ៖ ឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រតិបត្តិការសឹករងកំពង់ស្ពឺ ជាប្រធានសមាគមអតីតយុទ្ធជនកម្ពុជាខេត្តកំពង់ស្ពឺ នៅថ្ងៃទី៤ ខែវិច្ឆិកា ឆ្នាំ២០២៤ បានដឹកនាំ ក្រុមការងារ គណៈកម្មាធិការ ស.អ.កខេត្ត និង គណៈកម្មាធិការ ស្រុក គងពិសី និងស្រុកបសេដ្ឋ ទៅសំណេះ សំណាលសាកសួរសុខទុក្ខ និងបាននាំយកអំណោយស្បៀងអាហាររបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ទៅឧបត្ថម្ភជូនអតីតយុទ្ធជនពិការ និងគ្រួសារអតីតយុទ្ធជនពលី ចំនួន៣០គ្រួសារ ដែលមានជីវភាពលំបាកខ្វះខាត ក្នុងនោះវេលាម៉ោង ១៤: ០០នាទី នៅស្រុកគងពិសី ដែលមានអតីតយុទ្ធជនពិការ និងគ្រួសារមានជីវភាពទីទ័លក្រចំនួន១៩គ្រួសារ និងវេលាម៉ោង១៥: ៣០នាទី នៅស្រុកបសេដ្ឋ មានអតីតយុទ្ធជន និងគ្រួសារមានជីវភាពទីទ័លក្រចំនួន១១គ្រួសារ ។

ឧត្តមសេនីយ៍ទោ ម៉ាន់ ម៉ាច បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដែលសម្ដេចនិងលោកជំទាវ តែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់បងប្អូនអតីតយុទ្ធជន។ ជាមួយនេះដែរ សម្ដេចមហាបវរធិបតី និងលោកជំទាវ លោកបានជូនពរដល់បងប្អូនអតីតយុទ្ធជនទាំងអស់ និងក្រុមគ្រួសារសូមបានប្រកបតែសេចក្តីសុខ សេចក្តីចម្រើន សុខភាពល្អ និងសុភមង្គលគ្រប់ ពេលវេលា ។

ឧត្តមសេនីយ៍ទោ ម៉ាន់ ម៉ាច បានអំពាវនាវដល់បងប្អូនអតីតយុទ្ធជន និងគ្រួសារ ត្រូវចេះថែទាំសុខភាព រស់នៅស្អាត មានអនាម័យ ដើម្បីជៀសផុតពីជម្ងឺតំកាត់ផ្សេងៗ និងខិតខំប្រកបរបររកទទួលទានដោយសុចរិតទៀងត្រង់ ព្រមទាំងខិតខំបង្កបង្កើនផលដាំដំណាំ ចិញ្ចឹមសត្វ និងត្រូវចូលរួមជាមួយអាជ្ញាធរមូលដ្ឋានអនុវត្តឱ្យបានជោគជ័យនូវគោល នយោបាយភូមិ.ឃុំ មានសុវត្ថិភាពរបស់រាជរដ្ឋាភិបាល។

ឧត្តមសេនីយ៍ទោ ប្រធានគណៈកម្មាធិការសមាគម ក៏បាននាំយកនូវអំណោយស្បៀងអាហារ គ្រឿងឧបភោគ បរិភោគរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧបត្ថម្ភជូនដល់ក្រុមគ្រួសារអតីតយុទ្ធជន ទាំងពីរស្រុកចំនួន៣០គ្រួសារ សម្រាប់ដោះស្រាយជីវភាពប្រចាំថ្ងៃ ដោយក្នុង១គ្រួសារទទួលបាន៖ អង្ករចំនួន២៥គីឡូក្រាម មីជាតិចំនួន១កេស ទឹកត្រីចំនួន១យួរ ទឹកស៊ីអ៉ីវចំនួន១យួរ និងត្រីខកំប៉ុងចំនួន១យួរ ផងដែរ ។

ក្នុងឱកាសនេះដែរឯកឧត្តម ប្រធានសមាគម ក៏បានចុះទៅសួរសុខទុក្ខដល់ផ្ទះអតីតយុទ្ធជនពិការដៃទាំងពីរចំនួន១នាក់ ឈ្មោះ សូរ ហឿន ដែលកំពុងសម្រាកព្យាបាលជម្ងឺនៅផ្ទះ ស្ថិតនៅភូមិអណ្តូងច្រុះ ឃុំស្នំក្រពើ ស្រុកគងពិសី បាននាំយកអំណោយសម្តេចធិបតី និងលោកជំទាវបណ្ឌិត ជួយឧបត្ថម្ភមាន ថវិកា៥០ ០០០រៀល (សម្រាប់អ្នកមានជម្ងឺ) អង្ករចំនួន៥០គីឡូក្រាម មីជាតិចំនួន១កេស ទឹកត្រីចំនួន១យួរ ទឹកស៊ីអ៉ីវចំនួន១យួរ និងត្រីខកំប៉ុងចំនួន១យួរ។
សរុបអំណោយរួមមាន ÷ ថវិកា ៥០ ០០០រៀល(សម្រាប់អតីតយុទ្ធជនកំពុងមានជម្ងឺ) អង្ករចំនួន៨០០គីឡូក្រាម មីជាតិចំនួន៣១កេស ទឹកត្រីចំនួន៣១យួរ ទឹកស៊ីអ៉ីវចំនួន៣១យួរ និងត្រីខកំប៉ុងចំនួន៣១យួរ។

ក្នុងនោះអតីតយុទ្ធជន និងក្រុមគ្រួសារអតីតយុទ្ធជនពលី ទាំង៣១គ្រួសារ បានសូមគោរពថ្លែងអំណរគុណដ៏ជ្រាលជ្រៅជាទីបំផុតសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលតែងតែជួយដោះស្រាយនូវរាល់ការលំបាកខ្វះខាតរបស់ពួកគាត់បានទាន់ពេលវេលា សូមប្តេជ្ញាចូលរួម និងគាំទ្ររាជរដ្ឋាភិបាលក្រោមការដឹកនាំប្រកបដោយកិត្តិបណ្ឌិតរបស់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី និងសូមជូនពរ សម្តេច លោកជំទាវបណ្ឌិត បុត្រាបុត្រី និងក្រុមការងារ បានជួបប្រទះនូវពុទ្ធពរទាំង៤ប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕