ក្រសួងសង្គមកិច្ច រៀបចំវគ្គបណ្ដុះបណ្ដាលពង្រឹងសមត្ថភាពស្ដីពីច្បាប់យុត្តិធម៌អនីតិជន នីតិវិធីយុត្តិធម៌កុមារ និងសិទ្ធិកុមារ

ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ធូ ស៊ុន រដ្ឋលេខាធិការ បានអញ្ជើញជាអធិបតីភាពក្នុងពិធីបើក និងឯកឧត្តម សន សុផល អគ្គនាយក នៃអគ្គនាយកដ្ឋានស្ដារ អញ្ជើញជាអធិបតីភាពក្នុងពិធីបិទវគ្គបណ្ដុះបណ្ដាលពង្រឹងសមត្ថភាពស្ដីពីច្បាប់យុត្តិធម៌អនីតិជន នីតិវិធីយុត្តិធម៌កុមារ និងសិទ្ធិកុមារដល់ភ្នាក់ងារសង្គមកិច្ច នគរបាលយុត្តិធម៌ ព្រះរាជអាជ្ញា និងចៅក្រម នៅសាលាខេត្តរតនគិរី រយៈពេល២ថ្ងៃគឺចាប់ពីថ្ងៃទី៥ ដល់ថ្ងៃទី៦ ខែវិច្ឆិកា ឆ្នាំ២០២៤។

ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី អនុរដ្ឋលេខាធិការ អគ្គនាយករង នៃអគ្គនាយកដ្ឋានស្ដារសម្បទា នាយកដ្ឋានស្ដារនីតិសម្បទាអនីតិជន តំណាងក្រសួងមហាផ្ទៃ ក្រសួងយុត្តិធម៌ រដ្ឋបាលខេត្តរតនគិរី និងព្រះរាជអាជ្ញា ចៅក្រម ប្រធានគណកម្មការពិគ្រោះយោបល់កិច្ចការស្រ្តី និងកុមារ នគរបាលយុត្តិធម៌ ប្រធានមន្ទីរ ស.អ.យ. ក្រុមការងារកិច្ចការពារកុមារប្រចាំខេត្ត មន្តី្របង្គោលមន្ទីរ ស.អ.យ. ភ្នាក់ងារសង្គមកិច្ច ខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង សរុបប្រមាណ ៨៥នាក់ ដោយទទួលបានការគាំទ្រពីអង្គការយូនីសេហ្វ (UNICEF)។

សូមជម្រាបថា វគ្គបណ្ដុះបណ្ដាលនេះរៀបចំឡើងក្នុងគោលបំណង់ចំនួន ០៣រួមមាន៖ ១. បញ្រ្ជាបការយល់ដឹងអំពីគោលការណ៍ជាមូលដ្ឋានក្នុងការដោះស្រាយបញ្ហាកុមារដែលមានទំនាស់នឹងច្បាប់ដោយផ្អែកលើក្របខណ្ឌច្បាប់ជាតិ និងអន្តរជាតិទាក់ទងនឹងសិទ្ធិកុមារ និងនីតិវិធីនៃការបង្វែរកុមារដែលមានទំនាស់នឹងច្បាប់ ២. បន្ថែមការយល់ដឹងអំពីតួនាទី និងទំនួលខុសត្រូវផ្សេងៗរបស់ភ្នាក់សង្គមកិច្ច នគរបាលយុត្តិធម៌ និងព្រះរាជអាជ្ញា ចៅក្រមស៊ីបសួរ និងរបៀបធ្វើការរួមគ្នានៅក្នុងប្រព័ន្ធការពារកុមារ ដោយអនុវត្តតាមគោលការណ៍ និងវិធីសាស្ត្រពហុវិស័យ ដើម្បីចូលរួមចំណែកក្នុងការអនុវត្តច្បាប់យុត្តិធម៌អនីតិជនអោយមានប្រសិទ្ធភាពខ្ពស់ ៣. ស្វែងរកគន្លឹះក្នុងការសម្របសម្រួល ការចរចារ ការដោះស្រាយជម្លោះ និងការរក្សាទំនាក់ទំនងដោយរលូនគ្រប់ដំណាក់កាលជាមួយកុមារ ដែលមានទំនាស់នឹងច្បាប់ ចាប់ពីពេលចាប់ផ្តើមរហូតដល់កុមារត្រូវបានសមាហរណកម្ម៕