អ៉ីរ៉ង់ប្រកាសចាត់ទុក ជ័យជម្នះរបស់លោក ដូណាល់ ត្រាំ ក្នុងការបោះឆ្នោត គឺជាឱកាសឱ្យអាមេរិក វាយតម្លៃឡើងវិញចំពោះ គោលនយោបាយខុសឆ្គងពីមុនៗ
តេហេរ៉ង់៖ នៅថ្ងៃព្រហស្បតិ៍នេះ អ៉ីរ៉ង់បានប្រកាសចាត់ទុក ជ័យជម្នះរបស់លោក ដូណាល់ ត្រាំ ក្នុងការបោះឆ្នោតប្រធានាធិបតី នៅសហរដ្ឋអាមេរិក ថាជាឱកាសមួយដើម្បីឱ្យ ទីក្រុងវ៉ាស៉ីនតោនពិចារណាឡើងវិញ ចំពោះគោលនយោបាយមិនត្រឹមត្រូវកន្លងមក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី៧ ខែវិច្ឆិកា ឆ្នាំ២០២៤។
អំឡុងពេលកាន់អំណាចជាលើកដំបូង កាលពីអាណត្តិឆ្នាំ២០១៧-២០២១ លោក ត្រាំ ដែលនឹងវិលត្រឡប់មកដឹកនាំសេតវិមានសាជាថ្មី នៅខែមករា ឆ្នាំ២០២៥ បន្ទាប់ពីយកឈ្នះលើអនុប្រធានាធិបតីអាមេរិក លោកស្រី កាម៉ាឡា ហារីស ក្នុងការបោះឆ្នោតប្រធានាធិបតីអាមេរិក ដែលបានប្រព្រឹត្តទៅកាលពីថ្ងៃអង្គារសប្តាហ៍នេះ គឺធ្លាប់អនុវត្តយុទ្ធសាស្រ្តដាក់សម្ពាធជាអតិបរមា ប្រឆាំងនឹងអ៉ីរ៉ង់។
អ្នកនាំពាក្យក្រសួងការបរទេសអ៉ីរ៉ង់ លោក Esmaeil Baghaei បានលើកឡើងដូច្នេះថា «យើងមានបទពិសោធជូរចត់ជាមួយ គោលនយោបាយ និងដំណោះស្រាយ របស់រដ្ឋាភិបាលអាមេរិកខុសៗគ្នា កាលពីអតីតកាល»។
អ្នកនាំពាក្យរូបនោះ បានបន្ថែមថា ជ័យជម្នះរបស់លោក ត្រាំ ពេលនេះ គឺជាឱកាសមួយ អាចឱ្យសហរដ្ឋអាមេរិក ពិនិត្យឡើងវិញ ចំពោះគោលនយោបាយមិនត្រឹមត្រូវនានា កាលពីពេលមុនៗ។
គួរបញ្ជាក់ថា អ៉ីរ៉ង់និងអាមេរិក មិនត្រូវគ្នាចាប់តាំងពីបដិវត្តន៍អ៉ីស្លាម ឆ្នាំ១៩៧៩ ដែលបានផ្តួលរំលំរបបរាជានិយម គាំទ្រដោយ ក្រុមលោកខាងលិច ប៉ុន្តែភាពតានតឹង បានកើនឡើងខ្លាំង អំឡុងអាណត្តិទីមួយរបស់លោក ត្រាំ។ ពេលនោះ លោក ដូណាល់ ត្រាំ បានដក សហរដ្ឋអាមេរិក ចេញពីកិច្ចព្រមព្រៀងនុយក្លេអ៊ែរអ៉ីរ៉ង់ឆ្នាំ២០១៥ ហើយដាក់ទណ្ឌកម្មយ៉ាងធ្ងន់ធ្ងរលើអ៉ីរ៉ង់។ កាលពីឆ្នាំ២០២០ អាមេរិកបានសម្លាប់មេទ័ពជាន់ខ្ពស់ម្នាក់ នៃកងកម្លាំងឆ្មាំបដិវត្តន៍អ៉ីរ៉ង់ លោក Qasem Soleimani ក្នុងការវាយប្រហារតាមផ្លូវអាកាស លើអាកាសយានដ្ឋានទីក្រុងបាកដាដ នៃប្រទេសអ៉ីរ៉ាក់៕
