ឯកឧត្តម តាន់ ហ្សង់ហ្វ្រង់ស័រ ៖ មេដឹកនាំរបបយោធាភូមា ប្រាប់សម្តេចធិបតី ថាមីយ៉ាន់ម៉ានឹងរៀបចំការបោះឆ្នោត ក្នុងពេលវេលាសមស្របមួយ នាពេលខាងមុខ
ភ្នំពេញ៖ ក្នុងសន្និសីទសារព័ត៌មានស្តីពី លទ្ធផលបេសកកម្មរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងកិច្ចប្រជុំកំពូលនានា នៅទីក្រុងគុនមិញ សាធារណរដ្ឋប្រជាមានិតចិន នាយប់ថ្ងៃទី៧ ខែវិច្ឆិកា ឆ្នាំ២០២៤នេះ ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បានបញ្ជាក់ថា ក្នុងឱកាសជំនួបទ្វេរភាគី នៅក្នុងឱកាសចូលរួមក្នុងកិច្ចប្រជុំកំពូលទាំង៣ នៅទីក្រុងគុនមិញ ខេត្តយូណាន ប្រទេសចិន នាយឧត្តមសេនីយ៍ជាន់ខ្ពស់ មីន អោងឡាំង ដឹកនាំរបបយោធាភូមា បានបញ្ជាក់ប្រាប់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាថា មីយ៉ាន់ម៉ានឹងរៀបចំការបោះឆ្នោតឡើងវិញ ក្នុងពេលវេលាសមស្របមួយ នាពេលខាងមុខ។
ឯកឧត្តម តាន់ ហ្សង់ហ្វ្រង់ស័រ បានលើកឡើងថា ជំនួបជាលក្ខណៈទ្វេរភាគីរវាងប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត និងនាយឧត្តមសេនីយ៍ មីន អោងឡាំង ប្រធានក្រុមប្រឹក្សារដ្ឋមីយ៉ាន់ម៉ា, កម្ពុជា-មីនយ៉ាន់ម៉ា លើកឡើងពីវិបត្តិនយោបាយ និងចម្បាំងរ៉ាំរ៉ៃ នៅមីយ៉ាន់ម៉ា ហើយបើតាមការបញ្ជាក់របស់ឧត្តមសេនីយ៍ មីនអោងឡាំង មីយ៉ាន់ម៉ានឹងរៀបចំបោះឆ្នោតសកលមួយនាពេលខាង ក្នុងពេលវេលាសមស្រប៉
ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី បានបន្តថា មូលហេតុដែល សម្ដេចធិបតី បានជួបពិភាក្សាទ្វេភាគីជាមួយនាយឧត្ដមសេនីយ៍ មីន អោងឡាំង គឺជាបរិយាកាសល្អ ដើម្បីស្វែងយល់ពីវឌ្ឍនភាពនៃស្ថានការណ៍រួមនៅមីយ៉ាន់ម៉ា។
ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី បានបន្ថែមថា ដោយសារសម្ដេចធិបតី ចង់ជួយមីយ៉ាន់ម៉ា តាមរយៈការរម្លឹកទៅ នាយឧត្ដមសេនីយ៍ មីន អោងឡាំង ថាបញ្ហាមីយ៉ាន់ម៉ា គឺមានតែមីយ៉ាន់ម៉ាខ្លួនឯងប៉ុណ្ណោះ ដែលអាចដោះស្រាយបញ្ហាមីយ៉ាន់ម៉ាបាន។
លោក តាន់ ហ្សង់ហ្វ្រង់ស័រ បានគូសបញ្ជាក់ថា សម្ដេចធិបតី ក៏បានរម្លឹកដល់ឧត្ដមសេនីយ៍ មីន អោងឡាំង ដែរថា បញ្ហាមីយ៉ាន់ម៉ាមិនគួរលើកយកទៅដោះស្រាយនៅលើវេទិកាណាក្រៅពីអាស៊ានបាននោះដែរ ៕
