អភិបាលខេត្តក្រចេះ ជួបសំណេះសំណាល និងណែនាំដល់គណៈកម្មាការគ្រប់គ្រងទូក ង ដើម្បីចូលរួមអបអរសាទរក្នុងព្រះរាជពិធីបុណ្យអុំទូក បណ្តែតប្រទីត អកអំបុក និងសំពះព្រះខែ

ភ្នំពេញ៖ នៅរសៀលថ្ងៃសុក្រ ៨កើត ខែកត្ដិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៨ ខែវិច្ឆិកា ឆ្នាំ២០២៤ ឯកឧត្តម វ៉ា ថន អភិបាលខេត្តក្រចេះ បានអញ្ជើញជួបសំណេះសំណាល និងណែនាំដល់គណៈកម្មាការគ្រប់គ្រងទូក ង ដែលមានឈ្មោះត្រូវទៅធ្វើការប្រកួតប្រណាំងក្នុងព្រះរាជពិធីបុណ្យអុំទូក បណ្តែតប្រទីត អកអំបុក និងសំពះព្រះខែ នាថ្ងៃទី១៤-១៥-១៦ ខែវិច្ឆិកា ឆ្នាំ២០២៤ខាងមុខនេះ។

ឯកឧត្តម វ៉ា ថន អភិបាលខេត្ត ក៏បានណែនាំដល់គណៈកម្មាការ កីឡាករគ្រប់រូប ត្រូវរក្សាឱ្យបាននូវស្មារតីសាមគ្គីភាព មិត្តភាព ជាមួយកីឡាករក្នុងក្រុម ត្រូវរួបរួមសាមគ្គីគ្នាឱ្យបានល្អក្នុងការហ្វឹកហាត់ និងជាពិសេសត្រូវចូលរួមគោរពតាមបទបញ្ជា និងលក្ខន្តិកៈរបស់គណៈកម្មាធិការរៀបចំបុណ្យជាតិ ដើម្បីដណ្តើមជ័យជំនះលើគូរប្រកួត ក្នុងការប្រកួតដណ្តើមពានរង្វាន់ជូនខេត្ត និងបានស្នើសុំដល់ក្រុមចំណុះទូកទាំងអស់ សូមកុំពិសារស្រា ឬគ្រឿងស្រវឹងផ្សេងៗ ពីព្រោះខ្លាចបង្ករឱ្យបាត់បង់នូវកម្លាំង ឬប៉ះពាល់ដល់ដល់សុខភាព និងអាយុជីវិតផងដែរ។ ក្រៅពីនោះ បងប្អូន ក៏ត្រូវចូលរួមចំណែកថែរក្សាសន្តិសុខ សណ្តាប់ធ្នាប់ សុវត្ថិភាព និងអនាម័យបរិស្ថាន ក៏ដូចជារបៀបរៀបរយសាធារណៈ ដើម្បីឲ្យព្រះរាជពិធីបុណ្យអុំទូក បណ្ដែត អកអំបុកសំពះព្រះខែឆ្នាំនេះ ប្រព្រឹត្តទៅបានល្អប្រសើរ។

សូមបញ្ជាក់ដែរថា៖ សម្រាប់ខេត្តក្រចេះ មានទូក ង ចំនួន២០ទូក ក្នុងនោះមាន ទូក ង គូរពិសេសចំនួន៥ទូក ក្នុង១ទូកៗ ទទួលបានថវិកា៨លានរៀល និងភេសជ្ជៈ១៨កេស និងទូកខ្នាតអន្តរជាតិ មានចំនួន១៥ទូក ក្នុង១ទូកៗ ទទួលបានថវិកា៤លានរៀល និងភេសជ្ជៈ៨កេស សរុបអស់ថវិកា១០០លានរៀល និងភេសជ្ជៈ២១០កេស ៕