មន្ត្រីជាន់ខ្ពស់ក្រសួងការបរទេសកម្ពុជា ជួបពិភាក្សាការងារជាមួយអគ្គលេខាធិការអង្គការសហប្រតិបត្តិការខាងត្បូង
ភ្នំពេញ៖ កាលពីថ្ងៃទី៧ ខែវិច្ឆិកា ឆ្នាំ២០២៤ ក្នុងនាមតំណាងរបស់ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោកជំទាវ យ៉ិនទៀង ពុទ្ធិរស្មី រដ្ឋលេខាធិការបានទទួលជួបពិភាក្សាការងារជាមួយឯកឧត្តម Manssour BIN Mussallam អគ្គលេខាធិការអង្គការសហប្រតិបត្តិការខាងត្បូង (OSC) តាមប្រព័ន្ធនិម្មិត។
ក្នុងជំនួបខាងលើ ឯកឧត្តម Manssour BIN Mussallam បានអញ្ជើញឯកឧត្តមឧបនាយករដ្ឋមន្ត្រី សុខ ចិន្តាសោភា និងក្រសួងពាក់ព័ន្ធចូលរួមសម័យប្រជុំសាមញ្ញនៃមហាសន្និបាតអង្គការសហប្រតិបត្តិការខាងត្បូង ដែលនឹងប្រព្រឹត្តទៅនៅថ្ងៃទី ២៥-២៩ ខែវិច្ឆិកា ឆ្នាំ២០២៤ នៅទីក្រុងអាឌីស អាបេបា ប្រទេសអេត្យូពី។
ជាការឆ្លើយតប លោកជំទាវ យ៉ិនទៀង ពុទ្ធិរស្មី បានសម្តែងការអបអរសាទរឯកឧត្តម Manssour BIN Mussallam ដែលបានបំពេញការងារបានពាក់កណ្តាលអាណត្តិក្នុងឋានៈជាអគ្គលេខាធិការអង្គការសហប្រតិបត្តិការខាងត្បូង។
លោកជំទាវរដ្ឋលេខាធិការក៏បានជម្រាបជូនថា ដោយមានការងារមមាញឹកច្រើន ឯកឧត្តមឧបនាយករដ្ឋមន្ត្រី សុខ ចិន្តាសោភា មានការសោកស្តាយដែលពុំអាចអញ្ជើញចូលរួមសម័យប្រជុំដ៏មានសារៈសំខាន់នេះ។ ដោយឡែក ក្រសួងអប់រំ យុវជន និងកីឡាបានចាត់ឯកឧត្តម ណុះ ស្លេស រដ្ឋលេខាធិការ ជាតំណាងចូលរួមមហាសន្និបាតខាងលើ៕
