ឡាវ រងការខាតបង់យ៉ាងច្រើន ដោយសារព្យុះកំណាច Prapiroon, Yagi និង Soulik បណ្តាលឱ្យមនុស្សស្លាប់ ១២នាក់ និងបំផ្លិចបំផ្លាញទ្រព្យសម្បត្តិ៣០០លានដុល្លារ
វៀងចន្ទន៍៖ ឡាវបានរងការបំផ្លិចបំផ្លាញ និងការខាតបង់យ៉ាងច្រើនដោយព្យុះកំណាចត្រូពិចប្រាភីរូន(Prapiroon), ព្យុះយ៉ាកជី(Yagi), និងព្យុះស៊ូលីក(Soulik) ដែលបណ្តាលឱ្យមនុស្សស្លាប់១២នាក់ របួស៣២នាក់ និងប៉ះពាល់ខេត្តចំនួន១៦ ធ្វើឱ្យប៉ះពាល់ដល់ជីវភាពរស់នៅរបស់ប្រជាជនជាង៣៧ម៉ឺននាក់។
រដ្ឋមន្ត្រីក្រសួងការងារ និងសុខុមាលភាពសង្គមឡាវលោក បៃខាំ ខាតធីយ៉ា (Baikham Khatthiya) បានបង្ហាញទិន្នន័យព័ត៌មាននេះកាលពីថ្ងៃទី៨ខែវិច្ឆិកាដោយកត់សម្គាល់ថា ខ្យល់ព្យុះបានបំផ្លាញថវិកាប្រមាណ៣០០លានដុល្លារ។ លើសពីនេះ ទឹកជំនន់បានរំខានដល់ជីវភាពរស់នៅប្រចាំថ្ងៃ និងកសិកម្មនៅក្នុងស្រុកចំនួន១៣៣ និងភូមិចំនួន១៤៦២ ប៉ះពាល់ប្រជាពលរដ្ឋចំនួន៥៤១០៨គ្រួសារ។
ជាក់ស្តែង ព្យុះទីហ្វុងយ៉ាកជីបានវាយលុកប្រទេសឡាវកាលពីខែកញ្ញា និងបង្កឱ្យមានគ្រោះទឹកជំនន់រីករាលដាលពាសពេញប្រទេស ខណៈខេត្តហ្លួងណាំថា (Luang Namtha), ហ៊ួរផាញ់ (Houaphanh), រដ្ឋធានីវៀងចន្ទន៍ និងខេត្តបូកែវ (Bokeo) ជាខេត្តដែលរងការវាយប្រហារខ្លាំងជាងគេ។
ទន្ទឹមនឹងនេះ ក្រសួងកសិកម្មបានរាយការណ៍ពីការខូចខាតយ៉ាងធ្ងន់ធ្ងរដល់ប្រព័ន្ធធារាសាស្ដ្ររបស់ប្រទេសឡាវ ដែលប៉ះពាល់ដល់គម្រោងចំនួន៣០០ នៅទូទាំងខេត្តចំនួន១២ និងផ្ទៃដីកសិកម្មជិត១៥០០០ហិកតា។ ការខូចខាតនេះបានធ្វើឱ្យមានការព្រួយបារម្ភអំពីផលិតកម្មស្បៀងអាហារ ខណៈប្រទេសឡាវជំរុញឱ្យមានការអំពាវនាវជាបន្ទាន់ឱ្យជួសជុលប្រព័ន្ធធារាសាស្ដ្រ ដើម្បីអាចឱ្យមានការដាំដុះទាន់ពេលវេលា និងកិច្ចខិតខំប្រឹងប្រែងស្តារឡើងវិញនៅក្នុងប្រទេស ខណៈព្រឹត្តិការណ៍អាកាសធាតុធ្ងន់ធ្ងរកាន់តែខ្លាំងឡើង៕
