ក្រុមប្រឹក្សាអភិវឌ្ឍន៍យុវជនក្រសួងបរិស្ថាន រៀបចំសិក្ខាសាលារៀនសូត្រស្តីពី យុវជន និងចលនាបៃតង នាចុងសប្តាហ៍នេះ នៅឧទ្យានជាតិព្រះមុន្នីវង្ស «បូកគោ» ខេត្តកំពត

ភ្នំពេញ៖ ក្រុមប្រឹក្សាអភិវឌ្ឍន៍យុវជនក្រសួងបរិស្ថាន បានរៀបចំសិក្ខាសាលារៀនសូត្រស្តីពី យុវជន និងចលនាបៃតង នាចុងសប្តាហ៍នេះ នៅឧទ្យានជាតិព្រះមុន្នីវង្ស «បូកគោ» ខេត្តកំពត ដឹកនាំដោយលោកជំទាវ ងិន លីណា រដ្ឋលេខាធិការក្រសួងបរិស្ថាន និងជាប្រធានក្រុមការងារបញ្ជ្រាបយេនឌ័រក្រសួងបរិស្ថាន ឯកឧត្តម សឹម យ៉ារ៉ែន អនុរដ្ឋលេខាធិការក្រសួងបរិស្ថាន និងជាប្រធានក្រុមប្រឹក្សាអភិវឌ្ឍន៍យុវជនក្រសួងបរិស្ថាន ឯកឧត្តម គង់ វិចិត្រ អនុរដ្ឋលេខាធិការក្រសួងបរិស្ថាន និងវត្តមានចូលរួមពីក្រុមការងារយុវជនតាមបណ្តាអង្គភាពចំណុះក្រសួងបរិស្ថាន ក្រុមការងារបញ្ជ្រាបយេនឌ័រ ក្រុមការងារដើម្បីកុមារតូច ក្រុមការងារប្រតិបត្តិគណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន សរុបចំនួន ៤៨នាក់។

សិក្ខាសាលានេះ រៀបចំក្នុងគោលបំណង លើកកម្ពស់ និងចែករំលែកចំណេះដឹងស្តីពីបរិស្ថាន និងការគ្រប់គ្រងធនធានធម្មជាតិ ផ្តោតលើការអភិរក្ស និងការស្តារព្រៃឈើដោយមានការចូលរួមពីយុវជនក្នុងការជំរុញភាពបៃតង តាមរយៈការទស្សនកិច្ចសិក្សា និងការអនុវត្តន៍ផ្ទាល់ពី វិធីបណ្ដុះកូនឈើ ការដាំឈើ និងបណ្តុះកូនត្នោត នៅថ្នាលបណ្ដុះកូនឈើនៃស្នាក់ការរងអន្លង់ធំព្រែកត្នោត ស្ថិតក្នុងភូមិព្រែកត្រែង សង្កាត់ព្រែកត្នោត ក្រុងបូកគោ ខេត្តកំពត (ឧទ្យានជាតិព្រះមុន្នីវង្ស «បូកគោ»)។

ថ្លែងក្នុងឱកាសបើកកម្មវិធី លោកជំទាវបានមានប្រសាសន៍ថា «យុវជន បានដើរតួនាទីយ៉ាងសំខាន់ក្នុងការជួយកាត់បន្ថយ ការបំពុលបរិស្ថាន ការបញ្ចេញឧស្ម័នផ្ទះកញ្ចក់ និងជាចលករដ៏មានប្រសិទ្ធិភាពក្នុងការជំរុញការផ្សព្វផ្សាយ និងការចូលរួមអនុវត្តសកម្មភាពនានារបស់ក្រសួង ដូចជា យុទ្ធនាការថ្ងៃនេះខ្ញុំមិនប្រើប្រាស់ប្លាស្ទិកទេ! យុទ្ធនាការ កម្ពុជាស្អាត ខ្មែរធ្វើបាន និងយុទ្ធនាការ ភូមិឃុំ មានសុវត្ថិភាព ដើម្បីសម្រេចបានគោលដៅកម្ពុជាមានភាពស្អាត បៃតង និងចីរភាព ស្របតាគោលដៅយុទ្ធសាស្ត្រចក្រ្កាវិស័យបរិស្ថាន»។

ជាមួយគ្នានោះ លោកជំទាវបានជំរុញ លើកទឹកចិត្តដល់យុវជនទាំងអស់ខិតខំកសាង និងអភិវឌ្ឍន៍សមត្ថភាពខ្លួន ដើម្បីក្លាយជាទំពាំងស្នងឫស្សី និងជាមេដឹកនាំនាពេលអនាគត តាមរយៈការអនុវត្ត និងការសិក្សាស្វែងយល់បន្ថែមទៀត ៕