សម្តេចធិបតី ប្រាប់អំពីកត្តាអំណោយផលនៅកម្ពុជា ដល់វិនិយោគិនបរទេស
ភ្នំពេញ៖ ក្នុងពិធីសំណេះសំណាល និងពិសាភោជនាហារសាមគ្គីជាមួយពាណិជ្ជករ ត្រកូលលីន ពិភពលោក នាល្ងាចថ្ងៃទី១២ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានបង្ហាញដោយផ្ទាល់អំពីកត្តាអំណោយផលដល់ការវិនិយោគ និងភាពអនុគ្រោះជាច្រើនរបស់រាជរដ្ឋាភិបាលកម្ពុជា ចំពោះវិនិយោគិនបរទេស សំដៅទាក់ទាញការវិនិយោគបន្ថែមទៀតមកកាន់កម្ពុជា។
សម្ដេចធិបតី ហ៊ុន ម៉ាណែត បានអះអាងថា កម្មវិធីដែលបានរៀបចំឡើងនៅពេលនេះ បានផ្តល់ជាកាលានុវត្តភាពពិសេស ដែលសមាជិក សមាជិកា នៃសភាពាណិជ្ជកម្មត្រកូលលីនពិភពលោកទាំងអស់ បានជួបជុំគ្នាផ្លាស់ប្តូរទស្សនៈ ស្វែងរកកិច្ចសហការ និងឱកាសវិនិយោគនានា។
សម្តេចធិបតី មានប្រសាសន៍ថា រាជរដ្ឋាភិបាលកម្ពុជា បានត្រៀមខ្លួនរួចជាស្រេច ដើម្បីធ្វើការជាមួយវិនិយោគិនទាំងអស់ ដើម្បីដាក់ចេញយន្តការទាក់ទាញ និងគាំទ្រវិនិយោគ ដែលមានប្រសិទ្ធភាព, ផ្ដល់ភាពបត់បែនខ្ពស់, អាចបញ្ចៀសហានិភ័យ និងទាញយកផលប្រយោជន៍ឲ្យបានច្រើន នៅក្នុងបរិការណ៍ពិភពលោកបច្ចុប្បន្ន និងអនាគត។
សម្ដេចធិបតី នាយករដ្ឋមន្ត្រី បានបញ្ជាក់ថា ប្រទេសកម្ពុជាបានប្រកាន់យកគោលការណ៍សន្តិសហវិជ្ជមានយ៉ាងខ្ជាប់ខ្ជួន ដោយមិនមានជម្លោះផលប្រយោជន៍ជាមួយបណ្តាប្រទេសណាមួយឡើយ។ ជាមួយគ្នានេះ នៅប៉ុន្មានទសវត្សរ៍ចុងក្រោយ ប្រទេសកម្ពុជារក្សាបាននូវសុខសន្តិភាពពេញលេញ, សេដ្ឋកិច្ចកម្ពុជា សម្រេចបានកំណើនខ្ពស់ និងមានភាពធន់នឹងវិបត្តិ។ ជាក់ស្ដែងប្រទេសកម្ពុជា បានងើបចេញពីវិបត្តិដែលបង្កឡើង ដោយការរីករាលដាលជំងឺកូវីដ១៩ បានឆាប់រហ័ស ដោយសម្រេចបានអត្រាកំណើនសេដ្ឋកិច្ច៥% នៅឆ្នាំ២០២៣ និងព្យាករថាមានកំណើន៦% នៅឆ្នាំ២០២៤។
សម្ដេចធិបតី ហ៊ុន ម៉ាណែត បានគូសបញ្ជាក់ថា ផ្អែកលើមូលដ្ឋានសង្គម-សេដ្ឋកិច្ចរឹងមាំ ជាកិច្ចខិតខំប្រឹងប្រែងរបស់រាជរដ្ឋាភិបាលអាណត្តិមុនៗ នៅក្នុងអាណត្តិទី៧នេះ រាជរដ្ឋាភិបាលបានដាក់ចេញនូវយុទ្ធសាស្ត្រ បញ្ចកោណ-ដំណាក់កាលទី១ ដែលមានបេសកកម្មយុទ្ធសាស្ត្រ គឺ៖ ការពារ និងថែរក្សាសន្តិភាព ដែលពិបាកទទួលបាន និងពន្លឿនការអភិវឌ្ឍជាតិដើម្បីសម្រេចបាននូវចក្ខុវិស័យក្លាយជាប្រទេស ដែលមានប្រាក់ចំណូលខ្ពស់នៅឆ្នាំ២០៥០។
ទន្ទឹមនេះ សម្ដេចធិបតី ហ៊ុន ម៉ាណែត បានសង្កត់ធ្ងន់ថា យុទ្ធសាស្ត្របញ្ចកោណ-ដំណាក់កាលទី១ នៃរាជរដ្ឋាភិបាល នីតិកាលទី៧ នៅតែបន្តផ្តល់អាទិភាពលើវិស័យឯកជន ដោយបន្តធ្វើការកែទម្រង់ស៉ីជម្រៅ សំដៅធ្វើឲ្យបរិយាកាសវិនិយោគ និងធុរកិច្ចនៅកម្ពុជា មានភាពអំណោយផលល្អប្រសើរ និងលើកកម្ពស់សមត្ថភាព និងភាពប្រកួតប្រជែងរបស់វិស័យឯកជននៅលើទីផ្សារអន្តរជាតិ។
សម្ដេចធិបតី នាយករដ្ឋមន្ត្រី បានបន្ថែមថា រាជរដ្ឋាភិបាល បាននិងកំពុងប្រឹងប្រែងកសាងមូលដ្ឋានសង្គម-សេដ្ឋកិច្ច ទាំងផ្នែករឹង និងទន់ ដើម្បីបម្រើឲ្យការទាក់ទាញ និងគាំទ្រការវិនិយោគនៅកម្ពុជា។ មូលដ្ឋាន សង្គម-សេដ្ឋកិច្ច ផ្នែករឹង គឺការបន្តអភិវឌ្ឍហេដ្ឋារចនាសម្ព័ន្ធរូបវន្ត ផ្លូវគោក, ផ្លូវទឹក, ផ្លូវអាកាស, និងផ្លូវដែក ព្រមជាមួយនឹងហេដ្ឋារចនាសម្ព័ន្ធផលិតថាមពលអគ្គិសនីកកើតឡើងវិញ ដូចជា៖ ថាមពល វារីអគ្គិសនី, ថាមពលព្រះអាទិត្យ, និងថាមពលពីខ្យល់ ជាដើម ៕
