ឥណ្ឌូណេស៊ី និងអូស្ត្រាលី ធ្វើសមយុទ្ធរួមគ្នា

ហ្សាការតា៖ ទាហានឥណ្ឌូណេស៊ី និងអូស្ត្រាលីជាង២០០០នាក់ បានធ្វើសមយុទ្ធយោធារួមគ្នាកាលពីថ្ងៃពុធទី១៣ ខែវិច្ឆិកា បន្ទាប់ពីសម្ព័ន្ធមិត្តទាំង២ ចុះហត្ថលេខាលើកិច្ចព្រមព្រៀងការពារជាតិថ្មីមួយ ដោយសន្យាកិច្ចសហប្រតិបត្តិការកាន់តែជិតស្និទ្ធដើម្បីប្រឆាំងនឹងការគំរាមកំហែងផ្នែកសន្តិសុខនៅក្នុងតំបន់អាស៊ីប៉ាស៊ីហ្វិក។

ប្រទេសទាំងពីរ បានស្វះស្វែងរកការបង្កើនទំនាក់ទំនងសន្តិសុខនៅពេលប្រឈមមុខនឹងការកើនឡើងនៃចំណុចខ្លាំងនៅក្នុងតំបន់ រួមទាំងសមុទ្ទចិនខាងត្បូង ដែលរដ្ឋមួយចំនួនទាមទារអធិបតេយ្យភាពលើកោះជម្លោះ និងផ្លូវទឹកផងដែរ។ សមយុទ្ធរយៈពេល៤ថ្ងៃដែលមានឈ្មោះថា Keris Woomera នៅលើកោះសំខាន់របស់ឥណ្ឌូណេស៊ី Java រួមមាន៖ លំហាត់អាកាស ផ្លូវគោក សមុទ្ទ និងតាមអ៊ីនធឺណិត នៅក្នុងអ្វីដែលរដ្ឋមន្ត្រីការពារជាតិអូស្ត្រាលី លោក រីឆាដ ម៉ាលស៍ (Richard Marles) បានហៅថា៖«សមយុទ្ធដ៏ធំបំផុតដែលអូស្ត្រាលីនឹងធ្វើនៅខាងក្រៅប្រទេសរបស់យើងនៅឆ្នាំនេះ»។

ស្ថានទូតអូស្ត្រាលីប្រចាំនៅរដ្ឋធានីហ្សាការតា បានលើកឡើងនៅក្នុងសេចក្តីថ្លែងការណ៍មួយថា កងកម្លាំងទាំងពីរបានចុះចតលើអាកាសនៅឆ្នេរមួយនៅភាគខាងកើតកោះជ្វាកាលពីថ្ងៃពុធ។ រថក្រោះ កប៉ាល់ យន្តហោះចម្បាំង យានចុះចត ឧទ្ធម្ភាគចក្រវាយប្រហារ និងបុគ្គលិកយោធាប្រហែល២០០០នាក់ ក៏បានចូលរួមក្នុងសមយុទ្ធបាញ់គ្រាប់ពិតផងដែរ។

ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីនតូ បានហៅកិច្ចព្រមព្រៀងសន្តិសុខថ្មីដែលបានចុះហត្ថលេខាកាលពីខែសីហាថា ជាព្រឹត្តិការណ៍ប្រវត្តិសាស្ត្រ សម្រាប់ទំនាក់ទំនងរវាងប្រទេសទាំងពីរ។ វារួមបញ្ចូលបទប្បញ្ញត្តិសម្រាប់សមយុទ្ធរួម និងការដាក់ពង្រាយទៅកាន់ប្រទេសនីមួយៗ។ រដ្ឋធានីហ្សាការតា ក៏បានធ្វើសមយុទ្ធកងទ័ពជើងទឹកជាមួយរុស្ស៊ីកាលពីដើមខែនេះ នៅឯឆ្នេរសមុទ្ទភាគខាងកើតនៃកោះជ្វា។ អូស្ត្រាលី សង្ឃឹម ថា នឹង ពង្រឹង ទំនាក់ទំនង កាន់តែ ជិត ស្និទ្ធ ជាមួយ ឥណ្ឌូណេស៊ី ខណៈ ដែល តំបន់ នេះ ត្រូវ បាន ប្រទាញប្រទង់ ដោយ ការ ប្រជែង គ្នា រវាង ចិន និង សហរដ្ឋអាម៉េរិក៕