ឯកឧត្តម ចាន់ ស៊ីណាត ដឹកនាំគណៈប្រតិភូជាន់ខ្ពស់ក្រសួងធនធានទឹក បំពេញទស្សនកិច្ចការងារ នៅប្រទេសជប៉ុន

ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីកសួងធនធានទឹក និងឧតុនិយម នាថ្ងៃទី១៤ ខែវិច្ឆិកា ឆ្នាំ២០២៤ បានអញ្ជើញដឹកនាំគណៈប្រតិភូជាន់ខ្ពស់ក្រសួងបំពេញទស្សនកិច្ចការងារនៅប្រទេសជប៉ុន។

ឯកឧត្តមរដ្ឋលេខាធិការបានបញ្ជាក់ឱ្យដឹងថា គោលបំណងនៃទស្សនកិច្ចគឺដើម្បីស្វែងយល់លើកិច្ចការគ្រប់គ្រងវិស័យធនធានទឹក និងឧតុនិយម ប្រកបដោយឧត្តមភាព និរន្តរភាព ជឿនលឿន និងមានលក្ខណៈប្រកួតប្រជែងខ្ពស់របស់ប្រទេសជប៉ុន ជាពិសេសលើការប្រើប្រាស់ថាមពលពន្លឺព្រះអាទិត្យសម្រាប់បម្រើឱ្យការងារបើក ឬបិទទ្វារទឹក និងសម្រាប់ដំណើរការឧបករណ៍ឧតុនិយមគ្រប់ប្រភេទនៅតាមបណ្តាអាងទន្លេនិងអាងទន្លេរង ដើម្បីបញ្ជូនទិន្នន័យមកកាន់មជ្ឈមណ្ឌលកណ្តាលក្នុងប្រទេសជប៉ុន។

ក្នុងឱកាសនោះ ឯកឧត្តមរដ្ឋលេខាធិការបានបញ្ជាក់ឱ្យដឹងបន្ថែមទៀតថា គណៈប្រតិភូក៏បានចុះពិនិត្យជាក់ស្តែងដល់ទីតាំងអនុវត្តការងាររបស់បណ្តាក្រសួង មន្ទីរ ស្ថាប័នពាក់ព័ន្ធនានារបស់រាជរដ្ឋាភិបាលជប៉ុន ដែលស្ថិតនៅចម្ងាយប្រមាណ ២៥០គីឡូម៉ែត្រ ពីទីក្រុងតូក្យូផងដែរ។

សូមបញ្ជាក់ថា ដំណើរទស្សនកិច្ចនេះរៀបចំឡើងដោយស្ថានតំណាងធនាគារអភិវឌ្ឍន៍អាស៊ី (ADB) ប្រចាំប្រទេសជប៉ុន និងស្ថានតំណាងធនាគារអភិវឌ្ឍន៍អាស៊ី (ADB) ប្រចាំព្រះរាជាណាចក្រកម្ពុជា ក្រោមកិច្ចសហប្រតិបត្តិការដ៏ជិតស្និទ្ធពីសំណាក់ឯកឧត្តម ឯកអគ្គរាជទូតនៃព្រះរាជាណាចក្រកម្ពុជា ប្រចាំទីក្រុងតូក្យូ ប្រទេសជប៉ុន៕