សម្តេចធិបតី សម្តែងនូវសេចក្តីគោរពដឹងគុណ យ៉ាងជ្រាលជ្រៅបំផុត ចំពោះសម្តេចតេជោចំពោះការដឹកនាំប្រកបដោយចក្ខុវិស័យ ក្នុងការកសាងសន្តិភាព ការផ្សះផ្សា និង ការអភិវឌ្ឍប្រទេសជាតិ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្តែងនូវសេចក្តីគោរពដឹងគុណយ៉ាងជ្រាលជ្រៅបំផុត ចំពោះ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា ចំពោះការដឹកនាំប្រកបដោយចក្ខុវិស័យ ក្នុងការកសាងសន្តិភាព ការផ្សះផ្សា និងការអភិវឌ្ឍប្រទេសរបស់យើង ។
ក្នុងឱកាសអញ្ជើញថ្លែងសុន្ទរកថាគន្លឹះ ក្នុងកិច្ចប្រជុំគណៈកម្មាធិការប្រតិបត្តិអង្គការ អ្នកប្រជាធិបតេយ្យនិយមកណ្តាលអន្តរជាតិ (IDC-CDI) នាថ្ងៃទី១៨ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត បានថ្លែងថា សម្ដេចពិតជាមានសេចក្តីសោមនស្ស ដោយបានចូលរួមក្នុងការបើកកិច្ចប្រជុំគណៈ- កម្មាធិការប្រតិបត្តិនៃអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI)។
សម្តេចមហាបវរធិបតី ស្វាគមន៍យ៉ាងកក់ក្តៅ ចំពោះគណៈប្រតិភូទាំងអស់ សម្រាប់ការជួបជុំជាប្រវត្តិសាស្ត្រនេះ នៅក្នុងខេត្តសៀមរាប, ដែលជាតំបន់ស្នូល នៃអរិយធម៌សម័យអង្គរ កាលពីក្នុងអំឡុងសតវត្សទី ៩ ដល់សតវត្សទី ១៥ ។ គណបក្សប្រជាជនកម្ពុជា, ក្នុងឋានៈជាអនុប្រធានអង្គការអ្នកប្រជាធិបតេយ្យនិយមកណ្ដាលអន្តរជាតិ ពិតជាមានកិត្តិយសក្នុងការធ្វើជាម្ចាស់ផ្ទះនៃកិច្ចប្រជុំគណៈកម្មាធិការប្រតិបត្តិនេះ និង កម្មវិធីពិសេសស្ដីពី «យុវជន និង ធម្មនុញ្ញសន្តិភាព៖ សម្រាប់ មនុស្សជាតិ និង ភពផែនដី» ដែលត្រូវបានប្រារព្ធឡើងនាព្រឹកនេះ ។
សម្តេចធិបតី ហ៊ុន ម៉ាណែត បានមានប្រសាសន៍ថា ក្នុងនាមជាប្រជាជនកម្ពុជា សូមសម្តែងនូវកតញ្ញុតាធម៌ចំពោះការប្តេជ្ញាចិត្តពេញមួយជីវិត របស់ សម្ដេច ដើម្បីសន្តិភាព, ការផ្សះផ្សា និង ការកសាងជាតិឡើងវិញក្រោយជម្លោះ ដែល បានបង្កើតមូលដ្ឋានគ្រឹះដ៏រឹងមាំ សម្រាប់ការអភិវឌ្ឍជាតិ និង ការធ្វើទំនើបកម្មរបស់ប្រទេស ៕
