ឯកឧត្តមបណ្ឌិត លី ធុជ ជួបប្រជុំទ្វេភាគីជាមួយ អនុរដ្ឋមន្រ្តីការបរទេសវៀតណាម នៅទីក្រុងហាណូយ
ភ្នំពេញ៖ នៅថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តមបណ្ឌិត លី ធុជ អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ា២០២៤ ជួបប្រជុំទ្វេភាគីជាមួយ ឯកឧត្តម Do Hung អនុរដ្ឋមន្រ្តីការបរទេសវៀតណាម ដែលកិច្ចប្រជុំនេះមានការចូលរួមពីលោកជំទាវ ជា គឹមថា ឯកអគ្គរាជទូតកម្ពុជាប្រចាំនៅវៀតណាម និងលោក Juan Carlos Ruan នាយកអង្គភាពគាំទ្រការអនុវត្តអនុសញ្ញាអូតាវ៉ា។
តាងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណចំពោះការគាំទ្ររបស់ប្រទេសវៀតណាម ក្នុងដំណើរស្វែងរកសន្តិភាពនៅកម្ពុជា និងបានបញ្ជាក់អះអាងនូវការប្តេជ្ញាចិត្តបន្តពង្រឹងទំនាក់ទំនង និងចំណងមិត្តភាពរវាងប្រទេស និងប្រជាជនទាំងពីរ។
តាងនាមកម្ពុជាជាប្រធានអនុសញ្ញាអូតាវ៉ាឆ្នាំ២០២៤ ឯកឧត្តមបណ្ឌិត លី ធុជ បានលើកទឹកចិត្តឱ្យប្រទេសវៀតណាម ដើរតួនាទីយ៉ាងសំខាន់ក្នុងវិស័យសកម្មភាពមីន និងពិចារណាចែករំលែកបទពិសោធន៍ និងជំនាញវិស័យសកម្មភាពមីនទៅកាន់ពិភពលោក។
ឯកឧត្តមបណ្ឌិត លី ធុជ បានសង្កត់ធ្ងន់ថា ក្នុងឋានៈជាប្រធានអនុសញ្ញាអូតាវ៉ា កម្ពុជាបានខិតខំប្រឹងប្រែងយ៉ាងខ្លាំងក្នុងការសម្របសម្រួលជាមួយបណ្តាប្រទេសជុំវិញពិភពលោក ដើម្បីចូលរួមបេសកកម្មរួម ក្នុងការបញ្ចប់ការរងគ្រោះ និងទុក្ខវេទនាបង្កឡើងដោយសារគ្រាប់មីនប្រឆាំងមនុស្ស។ កម្ពុជា បានជួបប្រជុំជាមួយបណ្តាប្រទេសជាច្រើនតាមតែអាចធ្វើទៅបាន ដើម្បីកៀងគរការគាំទ្រសម្រាប់ការអនុវត្តអនុសញ្ញា និងលើកទឹកចិត្តដល់រដ្ឋមិនមែនភាគីឱ្យចូលរួមជាមួយអនុសញ្ញាអូតាវ៉ា។
ក្នុងឱកាសនោះ ឯកឧត្តមបណ្ឌិត លី ធុជ បានថ្លែងអំណរគុណដល់ប្រទេសវៀតណាមដែលបានបញ្ជូនគណៈប្រតិភូទៅចូលរួមកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន និងបានបញ្ជាក់ជាថ្មីនូវការប្តេជ្ញាចិត្តរបស់វៀតណាមចំពោះបុព្វហេតុមនុស្សធម៌បែបនេះ។
ឯកឧត្តម លី ធុជ បានគូសបញ្ជាក់ថា ប្រទេសវៀតណាម បានផ្ញើសារយ៉ាងសំខាន់ទៅកាន់ពិភពលោកតាមរយៈការចូលរួមក្នុងកិច្ចប្រជុំកំពូលដ៏សំខាន់នេះ នៅខេត្តសៀមរាប ប្រទេសកម្ពុជា។
ឯកឧត្តមទេសរដ្ឋមន្ត្រី សង្ឃឹមថានឹងឃើញវៀតណាមចូលរួមក្នុងគ្រួសារអនុសញ្ញាអូតាវ៉ានាពេលខាងមុខ ព្រោះថាទោះបីវៀតណាមមិនមែនជារដ្ឋភាគីក៏ដោយ ក៏វៀតណាមបាននិងកំពុងអនុវត្តគោលការណ៍នៃអនុសញ្ញានេះរួចហើយ។
ជាមួយគ្នានោះ ឯកឧត្តមបណ្ឌិត លី ធុជ បានលើកទឹកចិត្តឱ្យវៀតណាមបន្តគាំទ្រអនុសញ្ញានេះ តាមរយៈការចែករំលែកបទពិសោធន៍ និងជាពិសេសបោះឆ្នោតគាំទ្រសេចក្តីសម្រេចចិត្តរបស់អង្គការសហប្រជាជាតិស្តីពីការអនុវត្តអនុសញ្ញាហាមប្រាមការប្រើប្រាស់មីនប្រឆាំងមនុស្ស។
ឯកឧត្តម Do Hung បានគាំទ្រយ៉ាងពេញទំហឹងចំពោះមុខតំណែងជាប្រធានអនុសញ្ញាអូតាវ៉ារបស់កម្ពុជា ហើយបានយល់ស្របថា វាពិតជាមានសារៈសំខាន់ក្នុងការពង្រីកកិច្ចសហប្រតិបត្តិការបន្ថែមទៀតនៅក្នុងវិស័យសកម្មភាពមីន។ វៀតណាមនឹងបន្តគាំទ្រស្មារតីនៃអនុសញ្ញា និងចូលរួមក្នុងកិច្ចសហប្រតិបត្តិការបច្ចេកទេស និងការចែករំលែកបទពិសោធន៍។
ឯកឧត្តម Do Hung បានកោតសរសើរដោយស្មោះចំពោះតួនាទីរបស់កម្ពុជាក្នុងការរួមចំណែកថែរក្សាសន្តិភាពពិភពលោក និងការចែករំលែកបទពិសោធន៍ក្នុងចំណោមប្រទេសដែលរងផលប៉ះពាល់ដោយគ្រាប់មីន៕
