ឯកឧត្តម កែប ជុតិមា ដឹកនាំសមាជិក ចុះពិនិត្យសិក្សាការងារសន្តិសុខ សម្រាប់រៀបចំសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱននិងសន្តិភាព

ភ្នំពេញ៖ នារសៀលថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា (គណៈកម្មការទី៤) និងជាប្រធានអនុគណៈកម្មការសន្តិសុខ សណ្តាប់ធ្នាប់ និងសង្រ្គោះបឋម ព្រមទាំងសមាជិក សមាជិកាអនុគណៈកម្មការសន្តិសុខ សណ្តាប់ធ្នាប់ និងសង្រ្គោះបឋម និងឯកឧត្តម ឧត្តមសេនីយ៍ឯក ហ៊ឹម យ៉ាន រដ្ឋលេខាធិការក្រសួងមហាផ្ទៃ និងឯកឧត្តម នាយឧត្តមសេនីយ៍ ជួន សុវណ្ណ រដ្ឋមន្ត្រីប្រតិភូ អមនាយករដ្ឋមន្ត្រី បានអញ្ជើញចុះត្រួតពិនិត្យកន្លែងសំខាន់ៗមួយចំនួន និងជួបប្រាស្រ័យការងារជាមួយអ្នកគ្រប់គ្រងសណ្ឋាគារសុខាភ្នំពេញ ដើម្បើរៀបចំការងារសន្តិសុខ សម្រាប់រៀបចំសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព (IPTP) ដែលសភាកម្ពុជា ធ្វើជាម្ចាស់ផ្ទះ នៅថ្ងៃទី២៣-២៦ ខែវិច្ឆិកា ឆ្នាំ២០២៤ ខាងមុខនេះ។

ក្នុងឱកាសចុះត្រួតពិនិត្យនេះ ឯកឧត្តម កែប ជុតិមា បានជួបពិភាក្សាការងារជាមួយ ឯកឧត្តម ឧត្តមសេនីយ៍ឯក ហ៊ឹម យ៉ាន រដ្ឋលេខាធិការក្រសួងមហាផ្ទៃ ឯកឧត្តម នាយឧត្តមសេនីយ៍ ជួន សុវណ្ណ រដ្ឋមន្ត្រីប្រតិភូ អមនាយករដ្ឋមន្ត្រី និងថ្នាក់ដឹកនាំកងកម្លាំងប្រដាប់អាវុធគ្រប់ប្រភេទ ព្រមទាំងអ្នកគ្រប់គ្រងសណ្ឋាគារសុខាភ្នំពេញ។

ក្នុងឱកាសនោះឯកឧត្តម បានជំរុញដល់កងកម្លាំងប្រដាប់អាវុធត្រូវខិតខំធ្វើយ៉ាងណាថែរក្សា ការពារសន្តិសុខ សណ្តាប់ធ្នាប់ ជូនសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព (IPTP) ឲ្យបានល្អ ពី ព្រោះ ថា នេះជាព្រឹត្តិការណ៍ធំ ដែលមានវត្តមានថ្នាក់ដឹកនាំកំពូលៗរបស់កម្ពុជា និងថ្នាក់ដឹកនាំសភានៃប្រទេស ជាសមាជិកសភាតំបន់អាស៉ីជាច្រើនចូលរួម។

ឯកឧត្តម កែប ជុតិមា បានគូសបញ្ជាក់ថា ព្រឹត្តិការណ៍នេះ ជាកិត្តិយស និងជាមុខមាត់របស់កម្ពុជាទំាងមូល ដូច្នេះអាជ្ញាធរ កងកម្លំាងប្រដាប់អាវុធទំាងអស់ត្រូវខិតខំបំពេញតួនាទីរបស់ខ្លួន ដើម្បីឆ្លើយតបការទុកចិត្តរបស់ថ្នាក់ដឹកនាំ។

បន្ទាប់ពីបានជួបប្រជុំជាមួយអ្នកគ្រប់គ្រងសណ្ឋាគារសុខាភ្នំពេញ និងកងកម្លំាងនានារួចហើយ ឯកឧត្តម កែប ជុតិមា និងសហការី បានអញ្ជើញចុះត្រួតពិនិត្យទីតាំង រៀបចំសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱននិងសន្តិភាព (IPTP) ដោយផ្ទាល់នៅសណ្ឋាគារសុខាភ្នំពេញផងដែរ៕