មេដឹកនាំ G20 អំពាវនាវឱ្យមានកិច្ចសហប្រតិបត្តិការលើការផ្លាស់ប្ដូរអាកាសធាតុ ការកាត់បន្ថយភាពក្រីក្រ និងគោលនយោបាយពន្ធ
រីអូឌឺជេណេរ៉ូ៖ មេដឹកនាំប្រទេសមានសេដ្ឋកិច្ចរីកចម្រើនទាំង២០ ឬហៅកាត់ថា G20 កាលពីថ្ងៃចន្ទទី១៨ ខែវិច្ឆិកា បានចេញសេចក្តីថ្លែងការណ៍រួមមួយ ដោយលើកឡើងពីការឈឺចាប់ និងសោកនាដកម្មបណ្តាលមកពីជម្លោះនៅហ្កាហ្សា និងវិបត្តិសង្គ្រាមដ៏សោកសង្រែងនៅអ៊ុយក្រែន ខណៈមេដឹកនាំនៃប្រទេសមានសេដ្ឋកិច្ចធំៗទាំងនោះ អំពាវនាវឱ្យមានកិច្ចសហប្រតិបត្តិការលើការផ្លាស់ប្ដូរអាកាសធាតុ ការកាត់បន្ថយភាពក្រីក្រ និងគោលនយោបាយពន្ធ។
មេដឹកនាំក្រុមប្រទេសG20 បានជួបប្រជុំគ្នានៅទីក្រុងរីអូឌឺជេណេរ៉ូនៃប្រទេសប្រេស៊ីលសម្រាប់កិច្ចប្រជុំកំពូលរយៈពេលពីរថ្ងៃ ដោយផ្តោតលើការដោះស្រាយរបៀបវារៈដែលឆ្លុះបញ្ចាំងពីការផ្លាស់ប្ដូរពិភពលោក និងព្យាយាមពង្រឹងការយល់ស្របពហុភាគី មុនពេលប្រធានាធិបតីជាប់ឆ្នោតរបស់សហរដ្ឋអាម៉េរិក លោក ដូណាល់ ត្រាំ ឈានជើងចូលសេតវិមានកាន់អំណាចក្នុងខែមករាខាងមុខ។ មែនទែនទៅ កិច្ចពិភាក្សារបស់មេដឹកនាំនៃបណ្តាប្រទេសមានសេដ្ឋកិច្ចរីកចម្រើនទាំង២០ គឺផ្តោតអំពីពាណិជ្ជកម្ម បម្រែបម្រួលអាកាសធាតុ សន្តិសុខអន្តរជាតិ និងគោលនយោបាយដែលមិនអាចទាយទុកមុនបានរបស់លោក ត្រាំ ជុំវិញការប្តេជ្ញាកំណត់ពន្ធនាំចូលរបស់ពិភពលោក រហូតដល់ការជាប់មាត់ជាប់ពាក្យបញ្ចប់សង្គ្រាមនៅអ៊ុយក្រែន ត្រឹមរយៈពេល២៤ម៉ោង។
ទោះបីជាយ៉ាងណាក៏ដោយ មេដឹកនាំនៅក្នុងកិច្ចប្រជុំកំពូលនេះ អាចឈានដល់ការយល់ស្របដ៏តឹងតែងមួយ ស្តីពីការកើនឡើងនៃសង្រ្គាមអ៊ុយក្រែន ខណៈមនុស្សកំពុងរងទុក្ខវេទនា និងការធ្លាក់ចុះសេដ្ឋកិច្ចយ៉ាងគំហុកដោយសារភ្លើងសង្គ្រាម។ សេចក្តីថ្លែងការណ៍របស់មេដឹកនាំ ក៏បានសម្ដែងនូវការព្រួយបារម្ភយ៉ាងខ្លាំងអំពីស្ថានភាពមនុស្សធម៌ដ៏មហន្តរាយនៅក្នុងតំបន់ហ្កាហ្សាផងដែរ ដោយមេដឹកនាំG20 បានអំពាវនាវជាបន្ទាន់ឱ្យផ្តល់ជំនួយ និងការការពារជនស៊ីវិលបន្ថែមទៀត រួមជាមួយនឹងបទឈប់បាញ់ដ៏ទូលំទូលាយនៅហ្កាហ្សា និងលីបង់។
នៅក្នុងសេចក្តីថ្លែងការណ៍ បណ្តាមេដឹកនាំG20 ក៏បានយល់ស្របថា ពិភពលោកត្រូវតែឈានដល់កិច្ចព្រមព្រៀងមួយ នៅចុងបញ្ចប់នៃកិច្ចប្រជុំកំពូលស្តីពីការប្រែប្រួលអាកាសធាតុរបស់អង្គការសហប្រជាជាតិ COP29 នៅប្រទេសអាសែបៃហ្សង់ ស្តីពីគោលដៅហិរញ្ញវត្ថុថ្មីថា តើប្រទេសអ្នកមានត្រូវផ្តល់ប្រាក់ប៉ុន្មានដល់ប្រទេសកំពុងអភិវឌ្ឍ និងប្រទេសក្រីក្រ. ក្នុងនាមជាម្ចាស់ផ្ទះនៃកិច្ចប្រជុំG20 នៅឆ្នាំនេះ ប្រេស៊ីលបានពង្រីកការផ្តោតអារម្មណ៍របស់ប្លុកនេះ ទៅលើការប្រយុទ្ធប្រឆាំងភាពក្រីក្រ និងភាពអត់ឃ្លាន ខណៈការជជែកពិភាក្សាអំពីកិច្ចសហប្រតិបត្តិការ ដើម្បីយកពន្ធដោយស្មើភាពចំពោះអ្នកមានបំផុតនៅលើពិភពលោក បានក្លាយជាប្រធានបទក្ដៅ។
ជុំវិញរឿងរ៉ាវនេះ អធិការបតីអាល្លឺម៉ង់ លោក អូឡាហ្វ ស្កុលស៍ បាននិយាយនៅក្រៅកិច្ចប្រជុំដោយកត់សម្គាល់ពីការកើនឡើងនៃទម្ងន់សេដ្ឋកិច្ច កំពុងអភិវឌ្ឍសំខាន់ៗថា «យើងកំពុងជួបប្រទះការផ្លាស់ប្ដូរដ៏សំខាន់មួយនៅក្នុងរចនាសម្ព័ន្ធពិភពលោក»។ ដោយឡែក ប្រធានាធិបតីចិន លោក ស៊ី ជីនពីង បានឆ្លៀតប្រកាសអំពីវិធានការដែលបង្កើតឡើង ដើម្បីគាំទ្រដល់សេដ្ឋកិច្ចកំពុងអភិវឌ្ឍនៃសកលខាងត្បូង ពីកិច្ចសហប្រតិបត្តិការវិទ្យាសាស្ត្រជាមួយប្រទេសប្រេស៊ីល និងប្រទេសអាហ្រ្វិក ដើម្បីកាត់បន្ថយរបាំងពាណិជ្ជកម្មសម្រាប់ប្រទេសអភិវឌ្ឍន៍តិចតួច។ ទន្ទឹមគ្នានេះ លោកស៊ី ក៏បានរំលេចអំពីជម្លោះនៅអ៊ុយក្រែន និងវិបត្តិនៅមជ្ឈិមបូព៌ាផងដែរ៕
