អ៊ុយក្រែន ប្រារព្ធខួប១ពាន់ថ្ងៃ នៃការឈ្លានពាន ខណៈអាម៉េរិកចោទរុស្ស៊ីថា កំពុងបញ្ឆេះភ្លើងសង្គ្រាមកាន់តែខ្លាំង
វ៉ាស៊ីនតោន៖ សហរដ្ឋអាម៉េរិក អះអាងកាលពីថ្ងៃចន្ទទី១៨វិច្ឆិកាថា ប្រទេសរុស្ស៊ីកំពុងបញ្ឆេះភ្លើងជម្លោះក្នុងប្រទេសអ៊ុយក្រែនកាន់តែខ្លាំងឡើង តាមរយៈការដាក់ពង្រាយកងទ័ពកូរ៉េខាងជើង។ ការណ៍នេះ កើតឡើងបន្ទាប់ពីវិមានក្រឹមឡាំងព្រមានរដ្ឋធានីវ៉ាស៊ីនតោន ជុំវិញការលូកដៃចូលកាន់តែជ្រៅនៅសមរភូមិសង្គ្រាម ក្រោយបើកដៃឱ្យកងកម្លាំងអ៊ុយក្រែន វាយប្រហារមីស៊ីលរយៈចម្ងាយឆ្ងាយរបស់អាម៉េរិកចូលទៅក្នុងទឹកដីរុស្ស៊ីកាន់តែជ្រៅ។ ទន្ទឹមនឹងប្រជាជនកម្សត់អ៊ុយក្រែន ប្រារព្ធខួប១ពាន់ថ្ងៃនៃសោកនាដកម្មសង្គ្រាមរុស្ស៊ី-អ៊ុយក្រែន ចាប់ផ្តើមទាំងទឹកភ្នែក ។
អ្នកនាំពាក្យក្រសួងការបរទេសអាម៉េរិក លោក ម៉ាតធ្យូ មីលឡឺ បាននិយាយកាលពីថ្ងៃចន្ទទី១៨វិច្ឆិកាថា រុស្ស៊ីបានបង្កើនជម្លោះម្ដងហើយម្ដងទៀត តាមរយៈការដាក់ពង្រាយទាហានកូរ៉េខាងជើង១១០០០នាក់ ដោយបានប៉ះទង្គិចជាមួយកងកម្លាំងអ៊ុយក្រែននៅក្នុងតំបន់ឃឺសជាខ្លាំង ។ លើសពីនេះ លោកបានសង្កត់ធ្ងន់ថា៖«នោះជាការកើនឡើងដ៏ធំមួយ ដោយរុស្ស៊ីនាំយោធាអាស៊ីទៅក្នុងជម្លោះនៅអឺរ៉ុប។ យើងនឹងបន្តធ្វើអ្វីដែលសមស្រប ដើម្បីឱ្យរុស្ស៊ីទទួលខុសត្រូវចំពោះសកម្មភាពរបស់ខ្លួន ហើយកូរ៉េខាងជើង ក៏ត្រូវទទួលខុសត្រូវចំពោះសកម្មភាពគគ្លើនរបស់ខ្លួនដែរ»។
ជុំវិញបញ្ហានេះ រដ្ឋមន្ត្រីការបរទេសអង់គ្លេស លោក ដាវីដ ឡាំមី បានប្រាប់អ្នកយកព័ត៌មាននៅអង្គការសហប្រជាជាតិ ថា វត្តមានរបស់ទាហានកូរ៉េខាងជើង គឺជាការកើនឡើងដ៏សំខាន់ និងគ្រោះថ្នាក់សម្រាប់អ៊ុយក្រែន ខណៈរដ្ឋមន្រ្តីអង់គ្លេសរូបនេះ សន្យាថានឹងឈរជាខ្នងបង្អែកសម្រាប់អ៊ុយក្រែនដ៏រឹងមាំបំផុត។ នៅថ្ងៃដដែល ប្រធានាធិបតីបារាំង លោក អេម៉ានូអែល ម៉ាក្រុង បានអះអាងថា រដ្ឋបាលលោក ចូ បៃឌិន បានសម្រេចចិត្តដ៏ត្រឹមត្រូវជុំវិញការអនុញ្ញាតឱ្យអ៊ុយក្រែនប្រើប្រាស់អាវុធដែលផលិតដោយសហរដ្ឋអាម៉េរិក ដើម្បីវាយប្រហារកាន់តែជ្រៅចូលទៅក្នុងប្រទេសរុស្ស៊ី។
គួរបញ្ជាក់ថា ថ្ងៃអង្គារទី១៩វិច្ឆិកានេះ គឺជាថ្ងៃដែលប្រជាជនកម្សត់អ៊ុយក្រែន ប្រារព្ធខួប ១០០០ថ្ងៃចាប់តាំងពីការឈ្លានពានពេញលេញរបស់រុស្ស៊ីលើអ៊ុយក្រែន ទន្ទឹមនឹងរដ្ឋធានីកៀវ ត្រូវបានវាយប្រហារឥតស្រាកស្រាន្ដដោយយន្តហោះគ្មានមនុស្សបើក និងមីស៊ីលរបស់រុស្ស៊ី។ យ៉ាងណា អ៊ុយក្រែនដាក់ក្ដីសង្ឃឹមទាំងស្រុងលើរជ្ជកាលដឹកនាំថ្មីដោយលោក ដូណាល់ ត្រាំ ដើម្បីទាញដៃអ៊ុយក្រែនចេញពីភ្នក់ភ្លើងមរណៈ។ ពលរដ្ឋអ៊ុយក្រែនរាប់ពាន់នាក់បានស្លាប់ ខណៈជាង៦លាននាក់រស់នៅជាជនភៀសខ្លួននៅបរទេស ហើយចំនួនប្រជាជនបានធ្លាក់ចុះមួយភាគបួន ចាប់តាំងពីមេដឹកនាំវិមានក្រឹមឡាំង លោក វ្ល៉ាឌីមៀ ពូទីន បញ្ជាឱ្យមានការឈ្លានពានតាមផ្លូវគោក ផ្លូវសមុទ្ទ និងផ្លូវអាកាស ដែលចាប់ផ្តើមជម្លោះដ៏ធំបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរ។ បេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិ បានផ្ទៀងផ្ទាត់ការស្លាប់របស់ជនស៊ីវិលអ៊ុយក្រែនចំនួន១១៧៤៣នាក់ ទោះបីជាមន្ត្រីរដ្ឋធានីកៀវមួយចំនួនជឿថា ចំនួនអ្នកស្លាប់អាចនឹងខ្ពស់ជាងនេះក៏ដោយ៕
