ឯកឧត្តមទេសរដ្ឋមន្ត្រី ព្រំ សុខា ដឹកនាំកិច្ចប្រជុំផ្សព្វផ្សាយនិយាមនីតិវិធីប្រតិបត្តិការគ្រប់គ្រងត្រួត ពិនិត្យសារធាតុញៀន និងសារធាតុគីមីផ្សំ ដល់ក្រសួងស្ថាប័ន និងអង្គភាពជំនាញពាក់ព័ន្ធ
ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃពុធ ទី២០ ខែវិច្ឆិកា ឆ្នាំ២០២៤ ឯកឧត្តម ទេសរដ្ឋមន្រ្តី ព្រំ សុខា អនុប្រធានប្រចាំការ អាជ្ញាធរជាតិ ប្រយុទ្ធប្រឆាំងគ្រឿងញៀន (អ.ជ.ប.គ.ញ) បានអញ្ជើញដឹកនាំកិច្ចប្រជុំផ្សព្វផ្សាយនិយាមនីតិវិធីប្រតិបត្តិ ស្ដីពីការគ្រប់គ្រងត្រួតពិនិត្យសារធាតុញៀន និងសារធាតុគីមីផ្សំ ដល់ក្រសួង ស្ថាប័ន និងអង្គភាពជំនាញពាក់ព័ន្ធ។
កិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តម លោកជំទាវ រដ្ឋមន្ត្រី រដ្ឋលេខាធិការ អនុរដ្ឋលេខាធិការ អន្តរក្រសួង ព្រមទាំង លោក លោកស្រី មន្រ្តីជំនាញពាក់ព័ន្ធជាច្រើនរូបទៀតផងដែរ។
ឯកឧត្តមទេសរដ្ឋមន្រ្តី បានកើតសរសើរ ដល់មន្រ្តីជំនាញពាក់ព័ន្ធជាសមាជិកក្រុមការងារតាមអន្តរក្រសួង ដែលបានខិតខំបំពេញតួនាទីនៅតាមបណ្ដារាជធានី-ខេត្តរបស់ខ្លួនបានល្អ និងត្រូវតែបន្តយកចិត្តទុកដាក់បន្ថែមទៀត។
ឯកឧត្តមទេសរដ្ឋមន្ត្រី បានបន្ថែមថា ក្រុមការងារទាំងអស់ត្រូវបន្តតាមដាន និងត្រួតពិនិត្យធ្វើយ៉ាងណាឱ្យបានល្អប្រសើរបន្ថែមទៀត។ ឯកឧត្តមទេសរដ្ឋមន្ត្រី ក៏បានដាក់ចេញនូវសេចក្ដីសម្រេច ស្ដីពីការដាក់ឱ្យអនុវត្តនិយាមនីតិវិធីប្រតិបត្តិ ការគ្រប់គ្រងត្រួតពិនិត្យសារធាតុញៀន និងសារធាតុគីមីផ្សំ ផងដែរ ៕ 
