ឯកឧត្តមបណ្ឌិត អ៊ាង សុផល្លែត ជួបពិភាក្សាការងារជាមួយអនុប្រធានជាន់ខ្ពស់ផ្នែកគោលនយោបាយសកល និងអភិបាលកិច្ច តំណាងមកពីអង្គការអភិរក្សអន្តរជាតិ ដើម្បីពង្រឹងទំនាក់ទំនងដៃគូយុទ្ធសាស្ត្រ

ភ្នំពេញ៖ ខណៈកិច្ចប្រជុំកំពូលស្តីពីអាកាសធាតុ COP29 នាថ្ងៃទី២០ ខែវិច្ឆិកា ឆ្នាំ២០២៤ នៅទីក្រុងបាគូ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានជំនួបសម្តែងការគួរសម និងពិភាក្សាការងារជាមួយ អ្នកស្រី Lina Barrera អនុប្រធានជាន់ខ្ពស់ផ្នែកគោលនយោបាយសកល និងអភិបាលកិច្ច តំណាងមកពីអង្គការអភិរក្សអន្តរជាតិ ដើម្បីពង្រឹងទំនាក់ទំនងដៃគូយុទ្ធសាស្ត្រ។

គោលបំណងចម្បងនៃជំនួបពិភាក្សានៅទីក្រុងបាគូនាពេលនេះ គឺដើម្បីពង្រឹងកិច្ចសហប្រតិបត្តិការនៃក្រសួងបរិស្ថានកម្ពុជា ជាពិសេសផ្តោតលើមាត្រា៦នៃកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ការអនុវត្តគម្រោងរេដបូកនៅកម្ពុជា និងគំនិតផ្តួចផ្តើមគម្រោងប្រព័ន្ធអេកូកាបូនពណ៌ខៀវជាដើម។ គួរដឹងថា ប្រទេសកម្ពុជាមានបំណងក្លាយជាប្រទេសដំបូងគេក្នុងការធ្វើពាណិជ្ជកម្មឥណទានកាបូនផ្អែកលើការការពារធម្មជាតិ ស្របតាមមាត្រា៦ ដែលជាឱកាសដ៏សំខាន់មួយអាចបង្ហាញពីវឌ្ឍនភាព ក្នុងការរួមបញ្ចូលការអភិរក្សធម្មជាតិទៅក្នុងសកម្មភាពអាកាសធាតុ។

អង្គការអភិរក្សអន្តរជាតិ បង្ហាញពីឆន្ទៈ និងការខ្នះខ្នែងរបស់ខ្លួនក្នុងការគាំទ្រដល់ការអនុវត្តគម្រោងអភិរក្ស ការអភិវឌ្ឍគោលនយោបាយ និងការកសាងសមត្ថភាពជុំវិញការអភិរក្សនៅកម្ពុជាជាង២០ឆ្នាំមកហើយ។ ភាពជាដៃគូប្រកបដោយយុទ្ធសាស្រ្តដ៏សំខាន់រវាងស្ថាប័នទាំងពីរនេះ ក៏នឹងផ្តោតលើការរៀនសូត្រពីបទពិសោធន៍កិច្ចសហប្រតិបត្តិការរវាងរដ្ឋាភិបាល និងរដ្ឋាភិបាល (G2G) ជាមួយប្រទេសមួយចំនួនដូចជាកូរ៉េ និងសិង្ហបុរី៕