សម្ដេចធិបតី ហ៊ុន ម៉ាណែត ឲ្យសិក្សាផ្លូវរថភ្លើងភ្ជាប់ពីផ្លូវឃ្យុងយូ ឆ្ពោះទៅព្រលានយន្តហោះអន្តរជាតិសៀមរាប-អង្គរ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យសិក្សាផ្លូវរថភ្លើងពីក្រុងសៀមរាប ភ្ជាប់ពីចំណុចផ្លូវឃ្យុងយូ ឆ្ពោះទៅព្រលានយន្តហោះអន្តរជាតិសៀមរាប-អង្គរដែលមានប្រវែងប្រមាណ ១៣គីឡូម៉ែត្រ ។
ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យភូមិន្ទភ្នំពេញនៅព្រឹកថ្ងៃព្រហស្បតិ៍ ទី២១ វិច្ឆិកា ២០២៤ សម្តេចមហាបវរធិបតី ហ៊ុន ម៉ាណែត បានថ្លែងថា «ខ្ញុំកំពុងឱ្យសិក្សាមួយខ្សែទៀត ទី១គឺបានសិក្សាហើយផ្លូវរទេះភ្លើងពីព្រលានយន្តហោះទៅក្រុង តែខ្ញុំឱ្យសិក្សាមួយខ្សែទៀតខ្លីតពីផ្លូវឃ្យុងយូ ដែលមានស្រាប់តែធ្វើថ្មីតែ១៣គីឡូម៉ែត្រ តពីផ្លូវក្នុងដែលមានស្រាប់ បុកពីកន្លែងផ្លូវកាច់ហ្នឹងឡើងទៅបន្ទាយស្រី។ បុក១៣គីឡូម៉ែត្រ ឡើងទៅព្រលានយន្តហោះរបស់ចិន។ យើងបើកច្រកអាហ្នឹងមួយទៀតដើម្បីធ្វើយ៉ាងណាបម្រើប្រជាពលរដ្ឋយើងនិងផ្លូវទៅព្រលានយន្តហោះសៀមរាបឱ្យកាន់តែធូរ»។
សម្ដេចធិបតី ក៏កំពុងដាក់កំហិតឱ្យក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការនិងដឹកជញ្ជូន ឱ្យក្រុមហ៊ុន Royal Railway Cambodia បញ្ចប់ការចរចា និងឈានទៅដល់ការចុះអនុស្សារណៈនៃការយោគយល់គ្នា (MOU) លើការអភិវឌ្ឍផ្លូវដែកនៅត្រឹមដំណាច់ឆ្នាំ ២០២៤ ដើម្បីកាត់បន្ថយការចំណាយលើការដឹកជញ្ជូន និងវិស័យជំរុញភស្តុភាកម្ម។
សម្ដេចធិបតីក៏បានលើកឡើងពីការពង្រីកផ្លូវជាតិលេខ៦ និងគម្រោងសាងសង់ផ្លូវល្បឿនលឿនភ្នំពេញ-សៀមរាប-ប៉ោយប៉ែត នៅក្នុងពេលដ៏ខ្លីខាងមុខ ដើម្បីពង្រីកលទ្ធភាពធ្វើដំណើររបស់ពលរដ្ឋ ៕
