សម្ដេចប្រធានព្រឹទ្ធសភា ស្នើក្រសួងធម្មការ ធ្វើការជាមួយព្រះសង្ឃ និងអាជ្ញាធរ ទិញដីទុកសម្រាប់ពលរដ្ឋធ្វើចេតិយ ខណៈបច្ចុប្បន្នដីរបស់វត្តហាក់ចង្អៀតណែន

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានស្នើឲ្យក្រសួងធម្មការ និងសាសនា សហការរៀបចំជាមួយព្រះសង្ឃ និងអាជ្ញាធរ ដើម្បីទិញដីទុកសម្រាប់ប្រជាពលរដ្ឋធ្វើចេតិយ ខណៈបច្ចុប្បន្នដីរបស់វត្តហាក់ចង្អៀតណែនដោយសារចេតិយរបស់ប្រជាពុទ្ធបរិស័ទ។

សំណើរបស់សម្ដេចតេជោ ហ៊ុន សែន ធ្វើឡើងក្នុងឱកាសដែលសម្តេចអញ្ជើញជាអធិបតីក្នុងពិធីបើកអនុសំវច្ឆរមហាសន្និបាតមន្ដ្រីសង្ឃទូទាំងប្រទេស លើកទី៣២ នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះ។

សម្ដេចតេជោ ហ៊ុន សែន មានប្រសាសន៍ថា សំណាងល្អបច្ចុប្បន្ននៅទីវត្តអារាមមានកន្លែងសម្រាប់ធ្វើចេតិយបាន ប៉ុន្តែនៅពេលខាងមុខគ្មានកន្លែងធ្វើចេតិយទេ ដូច្នេះអាចជាវដីទុកនៅទីកន្លែងណាមួយ កុំនៅឆ្ងាយពេកដើម្បីពុទ្ធបរិស័ទអាចមានទីកន្លែងសម្រាប់ការធ្វើចេតិយ បើធ្វើតែក្នុងវត្តរបៀបនេះណា រើកុដលោកធ្វើចេតិយក៏មានដែរ។

សម្ដេចតេជោ ប្រធានព្រឹទ្ធសភា បានមើលឃើញថា បច្ចុប្បន្ននៅតាមទីធ្លាវត្តអារាមហាក់មានសភាពចង្អៀតណែន និងមានចេតិយគ្របដណ្ដប់លើទីធ្លាវត្តអារាមស្ទើរ៥០ភាគរយ ទៅហើយ ដូច្នេះគួរគិតគូរទុកជាមុន ដើម្បីសម្រួលទៅដល់ប្រជាពលរដ្ឋអាចជាវដីទៅធ្វើចេតិយ។

សម្ដេចតេជោ ហ៊ុន សែន បញ្ជាក់ថា ចិនមានកន្លែងសម្រាប់ធ្វើមុង ហើយកម្ពុជាក៏អាចមានកន្លែងសម្រាប់បញ្ចុះការធ្វើចេតិយផងដែរ ចំពោះរឿងមច្ឆាវិញមិនពិបាកនោះទេ។ ក្នុងន័យនេះ សម្ដេចបន្តថា ការរៀបចំបែបនេះមិនមែនជាផ្នូរខ្មោចរួមដូចសម័យ ប៉ុល ពតទេ ប៉ុន្តែជាទីកន្លែងសម្រាប់ជួបជុំគ្រួសារដែលមានអាទិភាពយកទៅដាក់រួមផងដែរ។

ជាមួយគ្នានេះ សម្ដេចតេជោ ហ៊ុន សែន ក៏បានស្នើឲ្យតាមវត្តអារាម ធ្វើការបណ្ដុះបណ្ដាលអាចារ្យដែលមានស្រាប់ ដើម្បីបង្កើននូវធនធានអាចារ្យដែលមានសមត្ថភាពបន្ថែមទៀត កុំរង់ចាំតែការបណ្ដុះបណ្ដាលរបស់ក្រសួងធម្មការ និងសាសនា។

សម្ដេចតេជោ បានបន្ដថា កន្លងទៅបន្ទាប់ពីការប្រកាសរបស់សម្ដេច សង្កេតឃើញថា ការងារបណ្ដុះបណ្ដាលអាចារ្យ អាចារ្យនី ក៏មានការកើនឡើង ហើយវិបត្តិកង្វះអាចារ្យក៏លែងមានទៀតដែរ ៕