សម្ដេចធិបតី ហ៊ុន ម៉ាណែត ប្រកាសឈប់ផ្ដល់អាជ្ញាបណ្ណ ដល់ក្រុមហ៊ុនផលិតស្រាបៀរថ្មីនៅកម្ពុជា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា សម្ដេចបានសម្រេចបញ្ឈប់ ការផ្ដល់អាជ្ញាបណ្ណ ដល់ក្រុមហ៊ុនផលិតស្រាបៀរនៅកម្ពុជាទៀតហើយ ។
ក្នុងឱកាសអញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងទិសដៅការងារឆ្នាំ២០២៥ របស់ក្រសួងរ៉ែ និងថាមពល នារសៀលថ្ងៃទី២១ វិច្ឆិកានេះ សម្ដេចធិបតី បានបន្ថែមថា ការសម្រេចលែងចេញអាជ្ញាបណ្ណ ឱ្យបើករោងចក្រផលិតស្រាបៀរថ្មីទៀតនោះ គឺដោយសារកម្ពុជាយើងមានរោងចក្រផលិតស្រាបៀរចំនួន ៧ រួចហើយ សម្រាប់បម្រើអតិថិជន នៅទូទាំងប្រទេស។
សម្ដេចធិបតី ហ៊ុន ម៉ាណែត គូសបញ្ជាក់ថា បើក្នុងករណីស្នើសុំអាជ្ញាបណ្ណ បើករោងចក្រផលិតស្រាបៀរ ដើម្បីនាំចេញ នោះសម្ដេចនឹងអនុញ្ញាតឱ្យចេញអាជ្ញាបណ្ណឱ្យ ៕
