ក្រសួងទេសចរណ៍ ណែនាំដល់ប្រតិបត្តិករទេសចរណ៍ បន្តពង្រឹងគុណភាពសេវាកម្មទេសចរណ៍ ពិសេសត្រូវកំណត់តម្លៃទំនិញ សេវាកម្មឱ្យបានត្រឹមត្រូវ និងសមរម្យ

ភ្នំពេញ៖ ស្របពេលពិធីបុណ្យសមុទ្ទលើកទី១១ ជុំទី៣ ឆ្នាំ២០២៤ កៀកចូលមកដល់ ក្រសួងទេសចរណ៍ បានចេញសេចក្តីណែនាំដល់ប្រតិបត្តិករទេសចរណ៍ ឱ្យបន្តពង្រឹងគុណភាពសេវាកម្មទេសចរណ៍ ជាពិសេសត្រូវកំណត់តម្លៃទំនិញ សេវាកម្មឱ្យបានត្រឹមត្រូវ និងសមរម្យ។

តាមរយៈសេចក្តីណែនាំរបស់ក្រសួងទេសចរណ៍ បង្ហាញនៅថ្ងៃទី២១ ខែវិច្ឆិកា ឆ្នាំ២០២៤ បញ្ជាក់ថា ដើម្បីអបអរពិធីបុណ្យសមុទ្ទ លើកទី១១ ជុំទី៣ ក្រោមប្រធានបទ «អបអរបេតិកភណ្ឌ និងចីរភាពនៃតំបន់ឆ្នេរ» ដែលនឹងប្រព្រឹត្តទៅចាប់ពីថ្ងៃទី១៣ ដល់ ១៥ ខែធ្នូ ឆ្នាំ២០២៤ ប្រតិបត្តិករទេសចរណ៍តំបន់ឆ្នេរទាំងអស់ ត្រូវជូលរួមអនុវត្តគោលការណ៍១០ចំណុចពាក់ព័ន្ធ និងការរៀបចំតុបតែងដាក់តាំងបង្ហាញផលិតផល ការរក្សាអនាម័យ រក្សាសន្តិសុខ សុវត្ថិភាព សណ្តាប់ធ្នាប់សាធារណៈ ព្រមទាំងសោភណភាពនៅតាម មូលដ្ឋានអាជីវកម្ម ព្រមទាំងការគិតគូរពីតម្លៃ។

ក្នុងចំណុចសំខាន់ៗទាំង១០ដែលក្រសួងបានគូសបញ្ជាក់ គឺប្រតិបត្តិករទេសចរណ៍ ត្រូវដាក់បង្ហាញផលិតផល ឬសេវាកម្មអាជីវកម្មជាសាធារណៈតាមគ្រប់ទម្រង់ និងត្រូវបញ្ជាក់តម្លៃ និងលក្ខខណ្ឌអនុវត្តផ្សេងៗឱ្យបានច្បាស់លាស់ ដែលចាំបាច់សម្រាប់ជាមូលដ្ឋាន ដល់ភ្ញៀវក្នុងការពិចារណា ជ្រើសរើសទិញផលិតផលទេសចរណ៍ ឬប្រើប្រាស់សេវាកម្មទេសចរណ៍។

ក្រសួងសង្កត់ធ្ងន់ថា៖ «ត្រូវរក្សាតម្លៃផលិតផល ឬសេវាកម្មឱ្យបានសមរម្យ និងពង្រឹងគុណភាពសេវាកម្មទេសចរណ៍ឱ្យបាន ល្អប្រសើរ»។ ទន្ទឹមគ្នានោះក្រសួង អំពាវនាវម្ចាស់អាជីវកម្មទាំងអស់ យកចិត្តទុកដាក់ រៀបចំតុបតែងលម្អទាំងផ្នែកខាងក្នុង និងផ្នែកខាងក្រៅទីតាំងអាជីវកម្ម បង្ហាញផ្សាភ្ជាប់ អំពីវប្បធម៌ខ្មែរ អត្តសញ្ញាណខ្មែរ ឬអត្តសញ្ញាណពិសេសរបស់រាជធានី-ខេត្ត ដោយមិនប្រាសចាកពីប្រពៃណីទំនៀមទម្លាប់ខ្មែរ។ ចូលរួមទាក់ទាញភ្ញៀវជាតិ-អន្តរជាតិចូលរួមឱ្យបានសកម្មនូវយុទ្ធនាការ «ម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់»។

សូមជម្រាបថា ពិធីបុណ្យសមុទ្ទរៀបចំបាន១០លើករួចមកហើយ ដោយក្នុងនោះខេត្តកំពត បានរៀបចំ៣ដង គឺនៅឆ្នាំ២០១៥,២០១៩ និង២០២៤នេះ ក្រោយប្រធានបទ «អបអរបេតិកភណ្ឌ និងចីរភាពនៃតំបន់ឆ្នេរ» ស្របនឹងខេត្តកំពតជា «គោលដៅទេសចរណ៍បេតិកភណ្ឌវប្បធម៌ និងកសិ-ទេសចរណ៍តំបន់ឆ្នេរ»។ តួយ៉ាងបើតាមឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បញ្ជាក់កាលពីថ្ងៃទី១ ខែវិច្ឆិកា ថា ការជ្រើសរើសខេត្តកំពតធ្វើជាម្ចាស់ផ្ទះបុណ្យសមុទ្ទលើកទី៣ ក្នុងគោលបំណងផ្សព្វផ្សាយអំពីសក្តានុពលទេសចរណ៍តំបន់ឆ្នេរសមុទ្ទកម្ពុជា និងជំរុញការយកចិត្តទុកដាក់ពីគ្រប់ភាគីពាក់ព័ន្ធក្នុងការអភិរក្ស និងអភិវឌ្ឍតំបន់ឆ្នេរ ប្រកបដោយចីរភាព ជាពិសេសការពង្រឹង និងលើកកម្ពស់គុណភាពសេវាកម្មនានាក្នុងឧស្សាហកម្មទេសចរណ៍ ៕