ប្រធានាធិបតីជាប់ឆ្នោតអាម៉េរិកលោក ដូណាល់ ត្រាំជ្រើសតាំងរដ្ឋមន្រ្តីយុត្តិធម៌ថ្មី ក្រោយបេក្ខជនដំបូងលាលែងពីតំណែង

អាមេរិក៖ ប្រធានាធិបតីជាប់ឆ្នោតអាម៉េរិកលោក ដូណាល់ ត្រាំ នៅថ្ងៃទី២១ ខែវិច្ឆិកា បានតែងតាំងអតីតអគ្គរដ្ឋអាជ្ញាប្រចាំនៅរដ្ឋ Florida លោកស្រី Pam Bondi ជារដ្ឋមន្រ្តីរបស់ក្រសួងយុត្តិធម៌អាម៉េរិក ជំនួយលោក Matt Gaetz។ លោក Matt Gaetz បានលាលែងពីបេក្ខជនអគ្គរដ្ឋអាជ្ញារបស់រដ្ឋបាលលោក ត្រាំ ដ្បិតមានរឿងអាស្រូវជួញដូរ និងបំពានផ្លូវភេទ ។

មិនទាន់ទាំងបានចូលកាន់តំណែងផ្លូវការផង លោក Matt Gaetz បានចុះចេញពីតួនាទីអគ្គរដ្ឋអាជ្ញា មានឋានៈជារដ្ឋមន្រ្តីយុត្តិធម៌។ ក្រោយការលាលែងពីតំណែង  ប្រធានាធិបតីជាប់ឆ្នោតអាម៉េរិកលោក ដូណាល់ ត្រាំ បានរើសបេក្ខជនថ្មីមកកាន់តំណែង។

លោក ត្រាំ បានតែងតាំងលោកស្រី Pam Bondi មកកាន់តំណែងអគ្គរដ្ឋអាជ្ញាអាម៉េរិក ជំនួសលោក Gaetz។

«ខ្ញុំមានកិត្តិយស ក្នុងការតែងតាំងអតីតអគ្គរាជអាជ្ញារបស់រដ្ឋ Florida លោកស្រី Pam Bondi ជាអគ្គរាជអាជ្ញាអាម៉េរិកបន្ទាប់»។ លោក ត្រាំ បានសរសេរបែបនេះក្នុងបណ្ដាញសង្គម Truth Social នៅថ្ងៃទី២១ ខែវិច្ឆិកា។

នេះជាករណីទី១ហើយ ដែលរដ្ឋបាលលោក ត្រាំ ក្នុងអាណត្តិទី២នេះ ប្រកាសផ្លាស់ប្ដូរបេក្ខភាពក្នុងសមាសភាពគណរដ្ឋៈមន្ត្រីរបស់ខ្លួន ទាំងដែលមិនទាន់ឡើងកាន់អំណាចផ្លូវការផង។

លោកស្រី Bondi ជាអតីតអគ្គរដ្ឋអាជ្ញារបស់រដ្ឋ Florida ពីឆ្នាំ២០១១ ដល់ឆ្នាំ២០១៩ និងជាប្រធានមជ្ឈមណ្ឌលច្បាប់នៃវិទ្យាស្ថានគោលនយោបាយអាម៉េរិកដំបូង ដែលជារបស់លោក ត្រាំ។ ប្រភពព័ត៌មានជាច្រើន បានអះអាងថា លោកស្រី Bondi ជាមនុស្សដែលគាំទ្រ និងស្មោះត្រង់ជាមួយលោក ដូណាល់ ត្រាំ ជាយូរឆ្នាំមកហើយ។

ការផ្លាស់ប្ដូរបេក្ខជនតំណែងអគ្គរដ្ឋអាជ្ញាអាម៉េរិក ធ្វើឡើងក្រោយលោក Gaetz ដែលជាបេក្ខជនដំបូង បានប្រកាសចាក់ចេញពីតំណែង ក្រោមរឿងអាស្រូវជួញដូរ និងបំពានផ្លូវភេទ។

លោក Gaetz រងការស៊ើបអង្កេតពីក្រសួងយុត្តិធម៌អាម៉េរិក(DOJ) ថាជាប់ពាកព័ន្ធនឹងការជួញដូរផ្លូវភេទ និងស្ថិតក្រោមការត្រួតពិនិត្យរបស់គណកម្មាការវិជ្ជាជីវៈអាម៉េរិក លើបទចោទរំលោភបំពានផ្លូវភេទផងដែរ៕