ក្រសួងការពារជាតិរុស្ស៉ី អះអាងពីការចាប់យកបានភូមិមួយទៀត នៅភាគខាងកើតអ៊ុយក្រែន ដែលជាជ័យជម្នះថ្មីមួយទៀតនៃសង្រ្គាមជាង ៣៣ខែ

មូស្គូ៖ យោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២២ ខែវិច្ឆិកា ឆ្នាំ ២០២៤ ក្រសួងការពារជាតិរុស្ស៉ី បានប្រកាសកាលពីថ្ងៃព្រហស្បតិ៍សប្តាហ៍នេះថា កងកម្លាំងរបស់ខ្លួនដណ្តើមបានភូមិ Dalne ដែលស្ថិតនៅក្នុងតំបន់ Donetsk ភាគខាងកើតអ៊ុយក្រែន ដោយវាជាជ័យជម្នះថ្មីមួយទៀតនៃសង្រ្គាមជាង ៣៣ខែ។

Reuters មិនអាចផ្ទៀងផ្ទាត់ព័ត៌មាននេះដោយឯករាជ្យបានឡើយ ខណៈអគ្គសេនាធិការអ៊ុយក្រែន មិនទទួលស្គាល់ទេថាភូមិ Dalne ធ្លាក់ទៅក្នុងដៃរុស្ស៉ី។ តាមរបាយការណ៍ថ្មីចុងក្រោយរបស់យោធាអ៊ុយក្រែន ភូមិនេះស្ថិតក្នុងចំណោមភូមិចំនួន ៧នៃតំបន់ Donetsk ដែលកងកម្លាំងរុស្ស៉ីព្យាយាមទម្លុះខ្សែការពារអ៊ុយក្រែនចំនួន ២៦លើកក្នុងរយៈពេល ២៤ម៉ោងកន្លងមក ហើយការប្រយុទ្ធគ្នាកំពុងបន្ត។ ប៉ុន្តែគេហទំព័រយោធា DeepState ដ៏ល្បីរបស់អ៊ុយក្រែនសរសេរថា កងទ័ពរុស្ស៉ីបានលើកទង់ជាតិរបស់ពួកគេ ហើយចូលកាន់កាប់គ្រប់ទីតាំងទាំងអស់នៃភូមិនេះរួចហើយ។

គួរបញ្ជាក់ថា ក្រោយបរាជ័យក្នុងការវាយលុកលើទីក្រុងកៀវ នៅដើមដំបូងនៃសង្រ្គាមឈ្លានពានរបស់ខ្លួន កងទ័ពរុស្ស៉ី បានងាកទៅផ្តោតលើការចាប់យកតំបន់ Donbas ដែលមានតំបន់ Donetsk និង Luhansk។ រយៈពេលពីរខែចុងក្រោយនេះ រុស្ស៉ីកំពុងរីកចម្រើនទៅមុខដោយល្បឿនលឿនបំផុត៕