នគរបាលប្រឆាំងគ្រឿងញៀន ឆ្មក់បង្រ្កាបទីតាំងខារ៉ាអូខេ G9 ឃាត់មនុស្សប្រុសស្រីច្រើននាក់
ភ្នំពេញ៖ មនុស្សប្រុសស្រីជាច្រើននាក់ត្រូវចាប់ខ្លួន ក្នុងប្រតិបត្តិការឆ្មក់បង្រ្កាបទីតាំងកម្សាន្តយីហោ G9 នៅចំណុចផ្សារចិនផ្លូវ៧៨ សង្កាត់ទន្លេបាសាក់ ខណ្ឌចំការមន វេលាម៉ោង៥ទាបភ្លឺ ថ្ងៃទី២៥ ខែវិច្ឆិកា ឆ្នាំ២០២៤នេះ ។
លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មេីសគ្រឿងញៀន បានដឹកនាំកម្លាំងជំនាញចុះទៅឡោមព័ទ្ធ និងឃាត់ខ្លួនមនុស្សប្រុសស្រីជាច្រើននាក់ ព្រមទាំងវត្ថុតាងមួយចំនួនផងដែរ ខណៈទីតាំងខាងលើត្រូវបានសមត្ថកិច្ចធ្វើកំណត់ហេតុ និងបិទជាបណ្ដោះអាសន្ន ។ ក្រោយចប់ប្រតិបត្តិការ កងកម្លាំងបានបញ្ចូនមនុស្ស និងវត្ថុតាងខាងលេីទៅមន្ទីរប្រឆាំងគ្រឿងញៀននៃអគ្គស្នងការនគរបាលជាតិ ដេីម្បីចាត់ការតាមនិតិវិធីបន្ត។
ករណីខាងលើនេះ មន្ទីរប្រឆាំងបទល្មេីសគ្រឿងញៀន ពិតជាមានការបង្រ្កាបទីតាំងខាងលើពិតមែន ប៉ុន្តែ ដោយសារលោកកំពុងជាប់ភារកិច្ចទៅបង្រៀននៅខេត្ត ដូច្នេះចំពោះតួលេខនៃការឃាត់ខ្លួនមនុស្ស ព្រមទាំងវត្ថុតាង លោកមិនទាន់អាចបញ្ជាក់បាននៅឡើយទេ។ លោកប្រាប់ឱ្យរង់ចាំបញ្ចប់នីតិវិធីសិន ទើបអាចដឹងច្បាស់លាស់ពីតួលេខនៃការឃាត់ខ្លួនមនុស្ស និងវត្ថុតាង៕
