មន្ត្រីអាម៉េរិក៖ យោធាអាម៉េរិកប្រទះឃើញយន្តហោះគ្មានមនុស្សបើកមិនស្គាល់អត្តសញ្ញាណ លើមូលដ្ឋានយោធានៅអង់គ្លេស

ឡុងដ៍៖ មន្ត្រីអាម៉េរិក បានអះអាងកាលពីថ្ងៃអង្គារទី២៦ ខែវិច្ឆិកាថា យន្តហោះគ្មានមនុស្សបើកមិនស្គាល់អត្តសញ្ញាណមួយចំនួនត្រូវបានគេប្រទះឃើញនៅមូលដ្ឋានទ័ពអាកាសសហរដ្ឋអាម៉េរិកចំនួន៣ នៅក្នុងប្រទេសអង់គ្លេសក្នុងរយៈពេល៦ ថ្ងៃចុងក្រោយនេះ។

អ្នកនាំពាក្យយោធាម្នាក់ បានអោយដឹងថា ៖«យន្តហោះគ្មានមនុស្សបើកខ្នាតតូចត្រូវបានគេប្រទះឃើញនៅក្នុងតំបន់ជុំវិញ និងនៅលើមូលដ្ឋានទ័ពអាកាស RAF Lakenheath មូលដ្ឋានទ័ព RAF Mildenhall និងមូលដ្ឋានទ័ព RAF Feltwell ចាប់ពីថ្ងៃទី២០ ខែវិច្ឆិកាដល់ថ្ងៃទី២៦ ខែវិច្ឆិកា»។

ជាមួយគ្នានេះ អ្នកនាំពាក្យមន្ទីរបញ្ចកោណលោក ផាទ្រីក រៃដឺ (Patrick Ryder) បានអះអាងថា យោធាអាម៉េរិកកំពុងចាត់វិធានការយ៉ាងម៉ឺងម៉ាត់ចំពោះបញ្ហានេះ។ លោកក៏បានសង្កត់ធ្ងន់ថា ៖«រហូតមកដល់ពេលនេះគ្មានផលប៉ះពាល់ណាមួយដល់អ្នករស់នៅក្នុងមូលដ្ឋាន គ្រឿងបរិក្ខារ ឬទ្រព្យសម្បត្តិដែលយើងនៅឯមូលដ្ឋានទាំងនោះទេ»។

លោក រៃដឺ បន្តថា យន្តហោះគ្មានមនុស្សបើកខ្នាតតូចគឺត្រូវបានប្រើប្រាស់ទូទៅ ដូច្នេះវាពិបាកក្នុងការសន្និដ្ឋានថា តើយន្តហោះគ្មានមនុស្សបើកខ្នាតតូចទាំងនោះត្រូវបានបង្ហោះដោយសម្ព័ន្ធមិត្ត ឬបច្ចាមិត្ត? ទោះយ៉ាងនេះក្ដី យោធាអាម៉េរិកនឹងបន្តស៊ើបអង្កេតលើរឿងនេះ។ ទន្ទឹមគ្នានេះ អ្នកនាំពាក្យក្រសួងការពារជាតិអង់គ្លេស(MOD) បានលើកឡើងថា ពួកគេបានចាត់វិធានការយ៉ាងតឹងរឹងចំពោះបញ្ហានេះ។

អ្នក នាំ ពាក្យ រូប នេះ បាន បន្ថែម ថា៖«យើង កំពុង គាំទ្រ ការ ឆ្លើយ តប របស់ កង ទ័ព អាកាស អាម៉េរិក»។ កាសែត The Times បានចុះផ្សាយថា បុគ្គលិកយោធាប្រហែល ៦០នាក់ត្រូវបានដាក់ពង្រាយដើម្បីត្រួតពិនិត្យលើបញ្ហាដ៏រសើបនេះ៕