រដ្ឋមន្ត្រីការពារជាតិចិន លោក ដុង ជុន ស្ថិតក្រោមការស៊ើបអង្កេតពី«បទពុករលួយ»
ប៉េកាំង៖ បើតាមសារព័ត៌មាន Financial Times បានចុះផ្សាយនៅថ្ងៃពុធទី២៧ ខែវិច្ឆិកា រដ្ឋមន្ត្រីការពារជាតិចិន លោក ដុង ជុន (Dong Jun) ស្ថិតនៅក្រោមការស៊ើបអង្កេតពីបទពុករលួយ ដែលជាផ្នែកមួយនៃការរស៊ើបអង្កេតប្រឆាំងអំពើពុករលួយដ៏ទូលំទូលាយរបស់ប្រទេសចិន។
ការបោសសម្អាតអំពើពុករលួយដោយបក្សកុម្មុយនីស្ដចិន បានបណ្តាលឱ្យមានការរុះរើក្បាលម៉ាស៊ីនដឹកនាំកងទ័ពរំដោះប្រជាជនចិនជាច្រើននាក់ ក៏ដូចជាបញ្ចប់មុខដំណែងរដ្ឋមន្រ្តីការពារជាតិប៉ុន្មានរូបរួចមកហើយ។
សារព័ត៌មាន Financial Times បានរាយការណ៍ថា លោក ដុង ជុន ជារដ្ឋមន្ត្រីក្រសួងការពារជាតិចិនទី៣ ដែលត្រូវបានស៊ើបអង្កេតពាក់ព័ន្ធនឹងការប្រព្រឹត្តអំពើពុករលួយ។ បក្សកុម្មុយនីស្ដចិនបណ្តេញអតីតរដ្ឋមន្ត្រីការពារជាតិ លោក លី សាំងហ្វូ និងលោក វ៉ី ហ្វឹងហឺ ពីបទពុករលួយ។ ក្នុងនាមជារដ្ឋមន្ត្រីការពារជាតិ លោក ដុង ទទួលខុសត្រូវលើការទូតយោធារបស់ប្រទេសចិនជាមួយនឹងប្រទេសផ្សេងទៀត។
សូមរំឭកថា លោក លី សាំងហ្វូ ត្រូវបានគេបណ្តេញចេញពីមុខតំណែងក្នុងខែតុលា ឆ្នាំ២០២៣ បន្ទាប់ពីចូលកាន់តំណែងបាន៧ខែ។ លោក វ៉ី បានកាន់តួនាទី ជារដ្ឋមន្ត្រីការពារជាតិពីឆ្នាំ ២០១៨ ដល់ឆ្នាំ ២០២៣។ ទាំងលោក លី និងលោកវ៉ី ហ្វឹងហឺ ត្រូវបានបណ្តេញចេញពីបក្សកុម្មុយនីស្ដចិនពីបទ«បំពានវិន័យយ៉ាងធ្ងន់ធ្ងរ» ពាក់ព័ន្ធនឹងការប្រព្រឹត្តអំពើពុករលួយ។
គួរបញ្ជាក់ថា រដ្ឋធានីប៉េកាំងបានប្រើវិធានការក្តៅលើការបោសសម្អាតអំពើពុករលួយនៅក្នុងជួរកងកម្លាំងប្រដាប់អាវុធកាលពីឆ្នាំមុន ដែលជាយន្តការកណ្តាប់ដៃដែកបោសសម្អាតអំពើពុករលួយរបស់ប្រធានាធិបតីចិនលោក ស៊ី ជីនពីង៕
