ឯកឧត្តម សួស ប្រាថ្នា ដឹកនាំកិច្ចប្រជុំប្រចាំត្រីមាសរវាងអង្គភាពគ្រប់គ្រងគម្រោង ក្រសួងមហាផ្ទៃ និងក្រុមការងារបច្ចេកទេសគាំទ្រការអនុវត្តគម្រោងគម្រោងនៃខេត្តគោលដៅទាំង៥

ភ្នំពេញ៖ នៅថ្ងៃទី២៩ ខែវិច្ឆិកា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ និងជានាយកគម្រោង បានអញ្ជើញដឹកនាំកិច្ចប្រជុំប្រចាំត្រីមាសរវាងអង្គភាពគ្រប់គ្រងគម្រោង ក្រសួងមហាផ្ទៃ និងក្រុមការងារបច្ចេកទេសគាំទ្រការអនុវត្តគម្រោងនៃខេត្តគោលដៅទាំង៥ នៅសាលបន្ទប់ប្រជុំនៃខេត្តកណ្តាល។

ក្នុងកិច្ចប្រជុំនេះ មានការចូលរួមពីថ្នាក់ដឹកនាំអង្គភាពអនុវត្តគម្រោងក្រសួងសាធារណការ និងដឹកជញ្ជូន អង្គភាពអនុវត្តគម្រោងក្រសួងបរិស្ថាន តំណាងរដ្ឋបាលខេត្ត តំណាងរដ្ឋបាលក្រុង ស្រុកគោលដៅនៃគម្រោង និងអ្នកពាក់ព័ន្ធសរុបប្រមាណ ៤៧រូប។

កិច្ចប្រជុំរៀបចំឡើងក្នុងគោលបំណងដើម្បីពិនិត្យវឌ្ឍនភាពការអនុវត្តគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជា ព្រមទាំងពិភាក្សាបញ្ហាប្រឈម និងលើកទិសដៅការងារបន្តទៀត។

សូមជម្រាបថា គម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជា បាននិងកំពុងអនុវត្តនៅក្នុងខេត្តគោលដៅចំនួន០៥ រួមមាន ខេត្តបាត់ដំបង ខេត្តកំពង់ស្ពឺ ខេត្តសៀមរាប ខេត្តកណ្ដាល និងខេត្តព្រះសីហនុ។

គម្រោងនេះបានអនុវត្តកាលពីថ្ងៃទី៧ ខែកញ្ញា ឆ្នាំ២០២៣ កន្លងទៅ ដោយផ្ដល់ការគាំទ្រពង្រឹងសមត្ថភាពដល់រដ្ឋបាលក្រុង ស្រុកគោលដៅក្នុងការអនុវត្តមុខងារគ្រប់គ្រងសំរាម សំណល់រឹងទីប្រជុំជននិងផ្ដល់នូវការគាំទ្រផ្នែកហេដ្ឋារចនាសម្ព័ន្ធក្នុងការរៀបចំការសាងសង់ទីលានទុកដាក់សំរាមអោយមានលក្ខណៈស្ដង់ដារអនាម័យ ៕