យន្តហោះយោធាចិន និងរុស្ស៊ី ១១គ្រឿងហោះចូលទៅតំបន់ការពារដែនអាកាសកូរ៉េខាងត្បូង
សេអ៊ូល៖ យោងតាមយោធាកូរ៉េខាងត្បូង យន្តហោះយោធាចិន និងរុស្សី សរុបចំនួន១១គ្រឿង បានហោះចូលតំបន់កំណត់អត្តសញ្ញាណការពារដែនអាកាសរបស់កូរ៉េខាងត្បូង នៅថ្ងៃសុក្រទី២៩ ខែវិច្ឆិកា ក្នុងរយៈពេល៤ម៉ោង។ ការណ៍នេះ ជំរុញឱ្យកូរ៉េខាងត្បូងបញ្ចេញយន្តហោះចម្បាំងតាមប្រដេញភ្លាម។
អគ្គសេនាធិការចម្រុះកូរ៉េខាងត្បូង បានអះអាងនៅក្នុងសារមួយទៅកាន់ក្រុមអ្នកយកព័ត៌មានថា យន្តហោះរុស្ស៊ី និងចិន បានហោះចូលក្នុងតំបន់ការពារដែនអាកាសកូរ៉េខាងត្បូង ប៉ុន្តែគ្មានឧបទ្ទវហេតុ ឬការឈ្លានពានដែនអាកាសណាមួយកើតឡើងឡើយ។ យោធាកូរ៉េខាងត្បូង បានកំណត់អត្តសញ្ញាណយន្តហោះទាំងនោះ មុនពេលពួកវាបានហោះចូលទៅក្នុងតំបន់ ខណៈរដ្ឋធានីសេអ៊ូល បានដាក់ពង្រាយយន្តហោះចម្បាំងរបស់កងទ័ពអាកាសដើម្បីជាការឆ្លើយតប។
មែនទែនទៅ យន្តហោះចិន និងរុស្សី បានហោះចូលក្នុងតំបន់ការពារដែនអាកាសកូរ៉េខាងត្បូង ជាញឹកញាប់ក្នុងប៉ុន្មានឆ្នាំចុងក្រោយនេះ ខណៈបងធំកុម្មុយនីស្ដទាំង២ មិនទទួលស្គាល់តំបន់ការពារដែនអាកាសរបស់កូរ៉េខាងត្បូងទេ។
គួរបញ្ជាក់ថា តំបន់កំណត់អត្តសញ្ញាណការពារដែនអាកាសត្រូវបានកំណត់ និងប្រកាសដោយប្រទេសមួយចំនួនដើម្បីត្រួតពិនិត្យ និងគ្រប់គ្រងយន្តហោះដែលខិតជិតដែនអាកាសក្នុងគោលបំណងសន្តិសុខជាតិ៕
