អភិបាលខេត្តស្ទឹងត្រែង ដឹកនាំសកម្មភាពបរិច្ចាគឈាមដោយស្ម័គ្រចិត្ត ដើម្បីរំលឹកទិវាខួបអនុស្សាវរីយ៍រណសិរ្ស ២ធ្នូ

ភ្នំពេញ៖ នាថ្ងៃទី១ ខែធ្នូ ឆ្នាំ២០២៤ នៅឯមន្ទីរពេទ្យបង្អែកខេត្ត មានកម្មវិធីបរិច្ចាគឈាមដោយស្ម័គ្រចិត្ត ដែលដឹកនាំដោយ ឯកឧត្ដម សរ សុពុត្រា អភិបាល នៃគណៈអភិបាលខេត្តស្ទឹងត្រែង ដើម្បីរំលឹកទិវាខួបអនុស្សាវរីយ៍រណសិរ្ស ២ធ្នូ និងមានការចូលរួមពីក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ខេត្តស្ទឹងត្រែង ក្រុមការងារ ស.ស.យ.ក ខេត្ត និស្សិតសាលាភូមិភាគ ក្រុមការងារមន្ទីរសុខាភិបាលខេត្ត។

ឯកឧត្តម សរ សុពុត្រា បានថ្លែងរលឹកឡើងវិញនូវប្រវត្តិសាស្រ្តនៃការបង្កើតថ្ងៃទី២ ធ្នូ បើសិនគ្មានថ្ងៃ២ ធ្នូ ទេ ក៏គ្មានថ្ងៃ ៧ មករា នោះដែរ, ២ ធ្នូ និង ៧មករា គឺជាមូលដ្ឋានគ្រឹះដែលនាំឲ្យប្រទេសកម្ពុជាចាកចេញពីរបបប្រល័យពូជ សាសន៍ខ្មែរក្រហម ហើយអាចឲ្យយើងរួមគ្នាកសាងប្រទេសជាតិឲ្យមានការអភិវឌ្ឍ មានសុខសន្តិភាពរហូតមកដល់ថ្ងៃនេះ។ រណសិរ្ស ២ ធ្នូ មិនត្រឹមតែបានជួយសង្គ្រោះអាយុជីវិតប្រជាពលរដ្ឋឱ្យចាកចេញពីមហន្តរាយនៃរបបអាវខ្មៅ ប៉ុណ្ណោះទេ ប៉ុន្តែបានជួយស្តារ កសាង និងអភិវឌ្ឍន៍ មាតុភូមិកម្ពុជាឱ្យមានការកែប្រែមុខមាត់ថ្មីជាបន្តបន្ទាប់រហូតទទួលបានសុខ សន្តិភាព ឯកភាពជាតិ និងការអភិវឌ្ឍដូចសព្វថ្ងៃនេះ។

នាឱកាសនោះ ឯកឧត្តម សរ សុពុត្រា អភិបាលខេត្តស្ទឹងត្រែង បានជំរុញលើកទឹកចិត្តឲ្យមន្រ្តីរាជការ កងកម្លាំង សិស្សនិសិត្ស ក្រុមហ៊ុនឯកជន ប្រជាពលរដ្ឋទាំងអស់ ចូលរួមឱ្យបានច្រើននឹងជាប្រចាំ ក្នុងការបរិច្ចាគឈាមដើម្បីសង្គ្រោះជីវិតមនុស្ស ។

ឯកឧត្តម បានថ្លែងថា «ឈាម គឺជាជីវិត! អំណោយឈាម គឺជាអំណោយជីវិត!» ។ ការបរិច្ចាគឈាម ដើម្បីសង្គ្រោះជីវិតមនុស្សនេះគឺជាកាយវិការប្រកបដោយមនុស្សធម៌ដ៍មានតំលៃបំផុត ដែលប្រជាពលរដ្ឋគ្រប់រូបគួរចូលរួមទាំងអស់គ្នា។

ឯកឧត្តម បានបញ្ជាក់ផងដែរថា ការបរិច្ចាគឈាមមានអត្ថប្រយោជន៍ជួយដល់សង្គម ជួយអ្នកជំងឺដែលខ្វះឈាម បង្ហាញពីសាមគ្គីភាព និងចូលរួមការងារសង្គមដើម្បីប្រទេសជាតិ ម្យ៉ាងវិញទៀតវាជាការរួមចំណែកយ៉ាងសំខាន់ក្នុងការជួយសង្គ្រោះជីវិតជនរងគ្រោះដែលកំពុងសម្រាកព្យាបាលនៅក្នុងមន្ទីរពេទ្យ ជាអំពើមនុស្សធម៌ និងជាពលរដ្ឋម្នាក់ដែលឆ្លើយតបទៅនឹងសង្គមយ៉ាងពិតប្រាកដផងដែរ។

ទន្ទឹមនឹងនោះ ឯកឧត្តម ក៍បានថ្លែងនូវការកោតសរសើរ ចំពោះការយកចិត្តទុកដាក់របស់មន្ត្រីរាជការ បុគ្គលិក នៃមន្ទី៛ពេទ្យបង្អែកខេត្ត ដែលបានខិតខំរៀបចំកម្មវិធីបរិច្ចាគឈាមដោយស្ម័គ្រចិត្តនេះ និងបានចូលរួមចំណែកធ្វើឱ្យការផ្តល់សេវាសុខាភិបាល កាន់តែមានភាពល្អប្រសើរឡើង។ ជាមួយគ្នានេះ ក៏បានថ្លែងអំណរគុណចំពោះសប្បុរសជនស្ម័គ្រចិត្ត បរិច្ចាគឈាមទាំងអស់ ដែលបានផ្តល់ឈាម កំពុងផ្តល់ឈាម និងបន្តផ្តល់ឈាមដោយទៀងទាត់ ជារៀងរាល់ឆ្នាំដើម្បីជួយជីវិតមនុស្សផងដែរ៕