សម្តេចតេជោ៖ គម្រោងទស្សនកិច្ចនៅចិន គឺរៀបចំតាំងពីជិត២ខែមុន ដែលជាការអញ្ជើញរបស់ប្រធានាធិបតីចិន មិនមែនជាដំណើរតក់ក្រហល់នោះទេ
ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានបញ្ជាក់ថា ដំណើរទស្សនកិច្ចរបស់សម្តេចនៅប្រទេសចិន បានរៀបចំតាំងពីប្រហែលពីរខែមុនមកម្ល៉េះ តបតាមការអញ្ជើញរបស់លោក ស៊ី ជិនពីង ប្រធានាធិបតីចិន មិនមែនជាដំណើរទស្សនកិច្ចបែបតក់ក្រហល់នោះឡើយ។
សម្តេចតេជោ បញ្ជាក់បែបនេះធ្វើឡើងតបទៅលោក ជេម សុខ អ្នកនិយាយតាមបណ្តាញសង្គម ដែលលើកឡើងថា ដំណើរទស្សនកិច្ចរបស់សម្តេចតេជោនៅចិន ជាដំណើរតក់ក្រហល់។
សម្តេចតេជោ បានបញ្ជាក់ដូច្នេះ “ជូនប្អូនជេម សុខ បងមើលតិកតុកឃើញប្អូននិយាយថា លោក ហ៊ុន សែន ទៅប្រទេសចិនយ៉ាងប្រញាប់ប្រញាល់។ បងសូមបញ្ជាក់យ៉ាងខ្លីថា គម្រោងទស្សនកិច្ចនៅចិនរបស់បង គឺបានរៀបចំតាំងពីជិត២ខែមុនម្លេះដែលជាការអញ្ជើញរបស់ប្រធានាធិបតីចិន សុី ជិនពីង។ នេះមិនមែនជាទស្សនកិច្ចដ៏ប្រញាប់ប្រញាល ឬតក់ក្រហល់នោះទេ”។
សម្តេចតេជោ ឆ្លៀតផ្តាំលោក ជេម សុខ គួរឈប់ធ្វើជាអ្នកចេះគ្រប់រឿងទៀតទៅ។ សម្តេចក៏ឌឺដងឱ្យលោក ជេម សុខ ដែរថា សម្តេចមិនបបួលលោក ជេម សុខ ស្បថចំពោះអ្វីដែលលើកឡើងនោះទេ ព្រោះខ្លាចងាប់ឆ្កែរបស់ ជេម សុខ។
ជាមួយគ្នានោះសម្តេចតេជោ បានជូនពរឱ្យលោក ជេម សុខ ឆាប់ជាសះស្បើយពីជំងឺពុលទឹកមាត់ ពីជំងឺច្រណែនស្ទើរគ្រប់មនុស្ស ពិសេសជូនពរឱ្យចេះគ្រប់រឿងថែមទៀតប្រសិនបើចង់។
សូមបញ្ជាក់ថា នៅព្រឹកថ្ងៃទី២ ខែធ្នូ ឆ្នាំ២០២៤សម្តេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា អញ្ជើញបំពេញទស្សនកិច្ចមិត្តភាពផ្លូវការ នៅចិន។ ការបំពេញទស្សនកិច្ចមិត្តភាពផ្លូវការរបស់សម្តេចតេជោ ហ៊ុន សែន តបតាមការអញ្ជើញរបស់គណបក្សកុម្មុយនីស្តចិន៕
