មន្ត្រីជាន់ខ្ពស់ក្រសួងអប់រំ អញ្ជើញបើកសិក្ខាសាលាលើកទី៥ ភាពជាដៃគូជាមួយអង្គការមិនមែនរដ្ឋាភិបាល និងវិស័យឯកជន ស្ដីពីការអភិវឌ្ឍយុវជនកម្ពុជា
ភ្នំពេញ៖ នាថ្ងៃទី២ ខែធ្នូ ឆ្នាំ២០២៤ អគ្គលេខាធិការធិការដ្ឋាន នៃក្រុមប្រឹក្សាជាតិកម្ពុជាដើម្បីអភិវឌ្ឍយុវជន បានរៀបចំពិធីបើកសិក្ខាសាលាលើកទី៥ ភាពជាដៃគូជាមួយអង្គការមិនមែនរដ្ឋាភិបាល និងវិស័យឯកជន ស្ដីពីការអភិវឌ្ឍយុវជនកម្ពុជា ក្រោមអធិបតីភាព ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និង កីឡា ដោយមានការចូលរួមពីថ្នាក់ដឹកនាំអគ្គលេខាធិការដ្ឋាន ក.ជ.យ. អគ្គនាយកដ្ឋានយុវជន អង្គការដៃគូ អង្គការយុវជន និងវិស័យឯកជន។
ថ្លែងក្នុងឱកាសនោះ ឯកឧត្តមរដ្ឋលេខាធិការ មានប្រសាសន៍ថា “ សិក្ខាសាលាថ្ងៃនេះ គឺជាវេទិកាមួយដើម្បីស្វែងយល់ពីរបៀបដែលយើងក្នុងនាមជាអ្នកពាក់ព័ន្ធមកពីអង្គការមិនមែនរដ្ឋាភិបាល វិស័យឯកជន និងអ្នកពាក់ព័ន្ធផ្សេងៗទៀត អាចសហការគ្នាដើម្បីបង្កើត និងធានានិរន្តរភាពឱកាសនៃការចូលរួមសកម្មភាពក្រៅម៉ោងសិក្សារបស់យុវជន។ តាមរយៈការរួមបញ្ចូលធនធាន គំនិត និងបណ្តាញរបស់យើង យើងជឿជាក់ថាកម្មវិធីក្រៅម៉ោងសិក្សា អាចឆ្លើយតបនឹងតម្រូវការរបស់យុវជនបានគ្រប់ៗគ្នា ប្រកបដោយបរិយាបន្ន និងផលជះល្អប្រសើរ។ ហើយ ហេតុអ្វីបានជារឿងនេះសំខាន់?
១) ការអភិវឌ្ឍន៍ជំនាញ៖ សកម្មភាពក្រៅម៉ោងសិក្សាជំរុញឱ្យមានជំនាញដូចជា ការធ្វើការងារជាក្រុម ការដោះស្រាយបញ្ហា និងការប្រាស្រ័យទាក់ទង ដែលមានសារៈសំខាន់សម្រាប់ការជោគជ័យនៅក្នុងសង្គមបច្ចុប្បន្ននេះ
២) ការចូលរួមក្នុងសហគមន៍៖ ការភ្ជាប់គម្លាតរវាងយុវជន និងសង្គម ដោយអាចឱ្យយុវជនទទួលបានពិសោធន៍ក្នុងការស្វែងរកដំណោះស្រាយចំពោះបញ្ហាប្រឈមនានាក្នុងពិភពជាក់ស្តែង
៣) សុខុមាលភាពផ្លូវចិត្ត៖ ការចូលរួមសកម្មភាពក្រៅម៉ោងសិក្សា នឹងផ្តល់អារម្មណ៍នៃភាពជាកម្មសិទ្ធិ និងបំណងប្រាថ្នាប្រចាំជីវិត ដែលមានសារៈសំខាន់សម្រាប់យុវជនក្នុងការប្រឈមនឹងភាពស្មុគស្មាញនៃជីវិតនាសម័យទំនើប។
ឯកឧត្តមរដ្ឋលេខាធិការ បានបញ្ជាក់បន្ថែមថា “ជំនួបពិភាក្សារវាងតំណាងរាជរដ្ឋាភិបាលកម្ពុជា អង្គការក្រៅរដ្ឋាភិបាលជាតិ និងអន្តរជាតិពាក់ព័ន្ធនឹងការងារយុវជន ជាការចូលរួមចំណែកដោះស្រាយបញ្ហាផ្សេងៗរបស់សង្គមឱ្យសាកសមជាប្រទេសមានអារ្យធម៌ខ្ពស់ តាមរយៈការជំរុញការអភិវឌ្ឍយុវជនលើការអប់រំ ចំណេះដឹង សីលធម៌ សុខភាព ការលើកកម្ពស់ការចូលរួមរបស់យុវជន និងឱកាសការងារសមរម្យដល់អនាគតយុវជនទាំងក្នុង និងក្រៅប្រព័ន្ធ ដែលជាកម្លាំងស្នូលរបស់ប្រទេសជាតិឱ្យកាន់តែមានសមត្ថភាព សក្តានុពលប្រកបដោយសីលធម៌ សុជីវធម៌ និងច្បាប់វិន័យ”។
មុននឹងបញ្ចប់ ឯកឧត្តមរដ្ឋលេខាធិការ ក៏បានថ្លែងអំណរគុណដល់ក្រុមការងារអគ្គលេខាធិការដ្ឋាននៃក្រុមប្រឹក្សាជាតិកម្ពុជាដើម្បីអភិវឌ្ឍយុវជន ដៃគូអភិវឌ្ឍ អង្គការ UNFPA អង្គការ France Volontaire ដែលបានសហការរៀបចំវេទិកាលើកទី៥ នេះឡើង៕
