ADB អនុម័តជំនួយ ១៧៣លានដុល្លារ ឱ្យកម្ពុជា ដើម្បីពន្លឿនការគ្រប់គ្រងធនធានទឹក សម្រាប់សម្របទៅនឹងអាកាសធាតុ
ភ្នំពេញ៖ ធនាគារអភិវឌ្ឍន៍អាស៊ី ដែលហៅកាត់ថា (ADB) នៅព្រឹកថ្ងៃអង្គារនេះបានសម្រេចអនុម័តកម្ចី និងជំនួយឥតសំណងប្រមាណ ១៧៣លានដុល្លារអាម៉េរិក ឱ្យកម្ពុជា ដើម្បីពន្លឿនការគ្រប់គ្រងធនធានទឹក សម្រាប់សម្របទៅនឹងអាកាសធាតុ លើគម្រោងចំនួន២ នៅតាមបណ្តាខេត្តគោលដៅមួយចំនួន។
យោងតាមសេចក្តីប្រកាសព័ត៌មាន របស ADB បានឱ្យដឹងថា កម្ចី និងជំនួយឥតសំណងសរុបចំនួន១៧៣លានដុល្លារនេះ នឹងត្រូវយកទៅអនុវត្តលើគម្រោងចំនួន២ ដោយគម្រោងទី១ មានទឹកប្រាក់ចំនួន៨៨លានដុល្លារអាម៉េរិក ដែលផ្តោតសំខាន់លើអាងទន្លេសាបក្នុងខេត្តបាត់ដំបង និងខេត្តពោធិ៍សាត់។ គម្រោងទី១នេះ នឹងពង្រឹងការគ្រប់គ្រងធនធានទឹករួមបញ្ចូលគ្នា សម្របតាមអាកាសធាតុ បរិស្ថាន ធ្វើទំនើបកម្មប្រព័ន្ធធារាសាស្ដ្រ និងកាត់បន្ថយហានិភ័យនៃគ្រោះទឹកជំនន់។ រីឯ គម្រោងទី២ ADB អនុម័តហិរញ្ញប្បទានបន្ថែមចំនួន៨៥លានដុល្លារអាម៉េរិក ទៅលើការកែលម្អប្រព័ន្ធធារាសាស្ត្រដែលកំពុងដំណើរការស្រាប់ ដើម្បីជួយដល់ក្រសួងធនធានទឹក និងឧតុនិយម ក្នុងការលើកកម្ពស់ប្រសិទ្ធភាពនៃការចែកចាយទឹក និងធន់នឹងអាកាសធាតុ នៅទូទាំងប្រព័ន្ធធារាសាស្ដ្រចំនួន៤ ដែលមាននៅក្នុងខេត្តបាត់ដំបង កំពង់ចាម កំពង់ធំ និងខេត្តតាកែវ។
គម្រោងទី២នេះ នឹងជួយកសិករកម្ពុជា ដើម្បីបង្កើនភាពធន់នឹងអាកាសធាតុ ប្រសិទ្ធភាពនៃការចែកចាយទឹក រួមជាមួយនឹងការគាំទ្រដល់ការងារការអភិវឌ្ឍសមត្ថភាពប្រតិបត្តិការសម្រាប់មជ្ឈមណ្ឌលទិន្នន័យគ្រប់គ្រងធនធានទឹកជាតិរបស់កម្ពុជា និងប្រព័ន្ធព័ត៌មានធនធានទឹកជាតិដែលពាក់ព័ន្ធផងដែរ។ ADB បានបញ្ជាក់ថា៖«គម្រោងទាំងនេះនឹងផ្តល់សិទ្ធិអំណាចដល់កសិករជាមួយនឹងការអនុវត្តប្រព័ន្ធធារាសាស្ត្រ អាកាសធាតុឆ្លាតវៃ ដើម្បីធានាជីវភាពរបស់ពួកគេ លើកកម្ពស់ផលិតកម្មស្បៀង និងពង្រឹងសន្តិសុខស្បៀង។ ADB មានមោទនភាពក្នុងការធ្វើជាដៃគូជាមួយប្រទេសកម្ពុជា ដើម្បីដោះស្រាយតម្រូវការបន្ទាន់ទាំងនេះ និងជាមូលដ្ឋានគ្រឹះសម្រាប់អនាគតដ៏រឹងមាំមួយ»។
គួរបញ្ជាក់ថា កម្ពុជាតែងតែប្រឈមនឹងគ្រោះទឹកជំនន់ញឹកញាប់ក្នុងរដូវវស្សា ដែលបានធ្វើឱ្យប៉ះពាល់ដល់ប្រជាជនប្រមាណ៤លាននាក់ ឬស្មើនឹងជិតមួយភាគបួននៃចំនួនប្រជាជន។ បញ្ហានេះ បានបណ្តាលឱ្យកម្ពុជារងការខាតបង់ប្រចាំឆ្នាំប្រមាណចំនួន២៥០លានដុល្លារ ដែលស្មើនឹងជាង១ភាគរយ នៃផលិតផលក្នុងស្រុកសរុបរបស់ប្រទេស។ ការប៉ាន់ប្រមាណក៏បានបង្ហាញដែរថា ដីកសិកម្មភាគច្រើនរបស់កម្ពុជានឹងប្រឈមនឹងហានិភ័យនៃការកើនឡើងបញ្ហាគ្រោះរាំងស្ងួត ជាមួយនឹងការកើនឡើងនៃសីតុណ្ហភាព និងភាពតានតឹងដោយសារកម្តៅ ខណៈការខាតបង់ក្នុងផលិតកម្មកសិកម្មក្នុងរយៈពេល២០ឆ្នាំ កន្លងមកនេះ ភាគច្រើនក៏បណ្តាលមកពីទឹកជំនន់ផងដែរ។
