អភិបាលខេត្តតាកែវ៖ កីឡាជនពិការ បាននាំមកនៅមោទនភាពជាតិគួឱ្យស្ងប់ស្ងែង
ភ្នំពេញ៖ ក្នុងឱកាសអញ្ជើញជួបក្រុមកីឡាករ និងកីឡាជនពិការ ដែលទទួលបានមេដាយមាស ប្រាក់ សំរិទ្ធ ចូលរួមប្រកួតកីឡាជាតិលើកទី០៤ និងកីឡាជាតិជនពិកាលើកទី២ ឆ្នាំ២០២៤ នៅថ្ងៃទី៣ ខែធ្នូ ឆ្នាំ២០២៤ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានធ្វើការលើកទឹកចិត្តដល់បងប្អូនកីឡាករជនពិការ ឱ្យប្រឹងប្រែងហ្វឹកហាត់បន្តទៀត ដើម្បីលើកកម្ពស់មុខមាត់ខេត្តតាកែវ ក៏ដូចជាលើកកម្ពស់មុខមាត់ប្រទេសជាតិ តាមរយៈការចូលរួមប្រកួតកីឡាដោយទទួលបានមេដាយមាស ប្រាក់ និងសំរិទ្ធ ជាដើម។
ឯកឧត្តមអភិបាលខេត្ត បានថ្លែងបន្តថា រាជរដ្ឋាភិបាលកម្ពុជា បានយកចិត្តទុកដាក់លើបងប្អូនពិការយ៉ាងក្លាជាទីបំផុត ពោលគឺមិនបានបោះបង់ជនពិការចោលនោះទេ ហើយបងប្អូនជនពិការយើងមួយចំនួនដែលមានសមត្ថភាព ត្រូវបានលើកទឹកចិត្ត និងតែងតាំងឱ្យកាន់មុខតំណែងមួយចំនួន នៅក្នុងក្របខ័ណ្ឌមន្រ្តីរាជការ និងនយោបាយថែមទៀតផង។
ឯកឧត្តមអភិបាលខេត្ត មានប្រសាសន៍បន្តថា ជនពិការនៅកម្ពុជា មិនមានការរើសអើងនោះទេ ជនពិការមានកិត្តិយស មានសមត្ថភាព មានសេចក្ដីថ្លៃថ្នូរ ហើយថែមទាំងបានផ្ដល់នៅមោទនភាពចំពោះប្រទេសជាតិ តាមរយៈការចូលរួមប្រកួតកីឡាដោយឈ្នះបានមេដាយមាស មេដាយប្រាក់ និងសំរិទ្ធ ជាដើម។ នេះគឺជាការខិតខំប្រឹងប្រែងរបស់បងប្អូនជនពិការយើង ដែលបង្ហាញពីសមត្ថភាពពិតរបស់ខ្លួន។
ក្នុងឱកាសនោះ ឯកឧត្តមអភិបាលខេត្តតាកែវ ក៏បានធ្វើការលើកទឹកចិត្តដល់ក្រុមកីឡាករ និងកីឡាករជនពិការទាំងអស់ ដែលទទួលបានមេដាយមាស មេដាយប្រាក់ មេដាយសំរិទ្ធ តាមរយៈការឧបត្ថមថវិការមួយចំនួន ជាការលើកទឹកចឹត្តដល់កីឡាករទាំងអស់ផងដែរ ៕
