សារមន្ទីរព្រះនរោត្តមសីហនុ-អង្គរ រៀបចំពិព័រណ៍មិនអចិន្ត្រៃយ៍ តាំងបង្ហាញវត្ថុសិល្បៈដែលបានមកពីការធ្វើកំណាយបុរាណវិទ្យានៅស្ថានីយភូមិល្វា ព្រៃក្មេង និងភ្នំគូលែន

ភ្នំពេញ៖ ចាប់តាំងពីថ្ងៃទី៣០ ខែវិច្ឆិកា ឆ្នាំ២០២៤មក សារមន្ទីរព្រះនរោត្តមសីហនុ-អង្គរ បានរៀបចំពិព័រណ៍មិនអចិន្ត្រៃយ៍មួយ ដើម្បីតាំងបង្ហាញវត្ថុសិល្បៈដែលបានមកពីការធ្វើកំណាយបុរាណវិទ្យា នៅស្ថានីយភូមិល្វា ព្រៃក្មេង និងភ្នំគូលែន ដោយពិព័រណ៍ខាងលើ មានរយៈពេល៣ខែ គ្រោងនិងបញ្ចប់នៅចុងខែមករា ឆ្នាំ២០២៥ខាងមុខ។

វត្ថុសិល្បៈដែលបានដាក់តាំងបង្ហាញនៅសារមន្ទីរព្រះនរោត្តមសីហនុ-អង្គរ ទាំងអស់មានចំនួន៥៧វត្ថុ។ ដោយយកមកពីភូមិល្វា និងព្រៃក្មេង ជាស្ថានីយសម័យបុរេប្រវត្តិសាស្រ្ត ដែលវត្ថុទាំងអស់ គឺយកចេញពីផ្នូរសព គ្រឿងអលង្ការ មានចិញ្ចៀន ក្រវិល និងកងដៃអំពីសំរិទ្ធ។ ហើយក្នុងនោះក៏មានកណ្តឹង ចង្ក្រង់ និងកាក់ធ្វើអំពីសំរិទ្ធ ខ្នារអំបោះ និងគ្រាប់លុញធ្វើពីឥដ្ឋដុតផងដែរ។ រីឯវត្ថុសិល្បៈមកពីភ្នំគូលែនវិញ ជាបុរាណដ្ឋានសម័យប្រវត្តិសាស្រ្ត ដែលវត្ថុទាំងនោះ កំណាយយកចេញពីកន្លែងខុសៗគ្នា មានប្រាសាទ ,បន្ទាយ និងពើងថ្មជាដើម។ វត្ថុដែលរកឃើញមានច្រើនយ៉ាងក្នុងនោះមាន សន្លឹកមាស ,ត្បូង ,ត្រាធ្វើអំពីថ្ម អង្កាំ ,បន្ទះសំរិទ្ធ និងផ្លែកាំបិទជាដើម។

សូមបញ្ជាក់ថា វត្ថុសិល្បៈដែលបានមកពីការធ្វើកំណាយបុរាណវិទ្យនៅភូមិល្វា និងព្រៃក្មេង ជាកិច្ចសហប្រតិបត្តិការស្រាវជ្រាវរវាងសាកលវិទ្យាល័យស៊ីដនី តាមរយៈគម្រោងពីវាលស្រែ ក្លាយមកជាទីក្រុង ជាមួយអាជ្ញាធរជាតិអប្សរា រវាងឆ្នាំ២០១១ ដល់ ឆ្នាំ២០១៤។ រីឯនៅភ្នំគូលែន ជាកិច្ចសហប្រតិបត្តិការរវាងអង្គការមូលនិធិបុរាណវិទ្យា និងការអភិវឌ្ឍន៍ ហៅកាត់ថា ADFជាមួយអាជ្ញាធរជាតិអប្សរា ក្នុងកំឡុងឆ្នាំ២០០៨ ដល់ឆ្នាំ២០១២។

គោលបំណងនៃការតាំងពិព័រណ៍នេះគឺដើម្បីបង្ហាញជូនសារធារណៈជនទូទៅ ដែលចង់ស្វែងយល់អំពីវត្ថុសិល្បៈ និងរបស់ប្រើប្រាស់ផ្សេងៗពីបុរាណ។ ជាពិសេសគឺចង់ឲ្យសារធារណៈជនដឹងថា ក្រោយពេលធ្វើកំណាយរួច តើវត្ថុដែលគេរកឃើញទាំងនោះ គេយកទៅទីណា? ដូច្នេះហើយការតាំងបង្ហាញនៅសារមន្ទីរព្រះនរោត្តមសីហនុ-អង្គរ អាចផ្តល់ភាពងាយស្រួល ដល់សារធារណៈជនដែលចង់យល់ដឹងអំពីប្រវត្តិសាស្រ្ត តាមរយៈវត្ថុសិល្បៈផ្សេងៗ ដែលបុព្វបុរសយើងធ្លាប់ប្រើប្រាស់ក្នុងជីវភាពប្រចាំថ្ងៃផង និងក្នុងកិច្ចគោរពបូជាផង។

ក្នុងន័យនេះ សូមអញ្ជើញសាធារណជន ចូលរួមទស្សនា និងឈ្វេងយល់ពីវត្ថុសិល្បៈ ដែលបានដាក់តាំងបង្ហាញក្នុងសារមន្ទីរព្រះនរោត្តមសីហនុ-អង្គរ ដែលមានទីតាំងក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប និងបើកឱ្យភ្ញៀវទេសចរជាតិ និងអន្តរជាតិ ចូលទស្សនាចាប់ពីថ្ងៃអង្គារ ដល់ថ្ងៃអាទិត្យ វេលាម៉ោង៨:៣០នាទីព្រឹកដល់ម៉ោង៤:៣០ល្ងាច៕