លេខាធិការដ្ឋាននៃគណៈកម្មាធិការគ្រប់គ្រងសំរាម សំណល់រឹងទីប្រជុំជន បើកកិច្ចប្រជុំជាមួយក្រុមបេសកកម្មធនាគារពិភពលោក

ភ្នំពេញ៖ នៅទីស្តីការក្រសួងមហាផ្ទៃ នាព្រឹកថ្ងៃទី៤ ខែធ្នូ ឆ្នាំ២០២៤ ឯកឧត្តម បួន ហេង អគ្គលេខាធិការរងនៃលេខាធិការដ្ឋាន នៃគណៈកម្មាធិការគ្រប់គ្រងសំរាម សំណល់រឹងទីប្រជុំជន និងជានាយកគម្រោង បានអញ្ជើញចូលរួមកិច្ចប្រជុំទ្វេភាគីជាមួយក្រុមបេសកកម្មធនាគារពិភពលោកចុះគាំទ្រការអនុវត្តគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជា ដែលមានអ្នកចូលរួមប្រមាណ ២០រូប។

សូមបញ្ជាក់ផងដែរ ក្រុមបេសកកម្មធនាគារពិភពលោក ដឹកនាំដោយលោកស្រី Katelijn Van den Berg ប្រធានក្រុមបេសកកម្មធនាគារពិភពលោក និងក្រុមការងារបច្ចេកទេសនៃគម្រោង នឹងចុះបំពេញបេសកកម្មនៅប្រទេសកម្ពុជា ចាប់ពីថ្ងៃទី២ ដល់ថ្ងៃទី១២ខែធ្នូ ឆ្នាំ២០២៤។ ក្នុងការចុះបេសកកម្មនេះ ក្រុមបេសកកម្មធនាគារពិភពលោកនឹងមានការជួបពិភាក្សាជាមួយក្រសួង ស្ថាប័នរដ្ឋបាលខេត្តគោលដៅនៃគម្រោង និងអ្នកពាក់ព័ន្ធ៕